Jesús quishpichica chuyaj shungu runaunara pai huañushcahua (Mateo 20:28). Chiraigu Biblia ninmi Jesús ‘cai pachara Quishpichij’ ashcara (1 Juan 4:14). Shinallara nin “quishpina illanmi. Cai pachai shu shutiras runaunama mana cushcachu ñucanchi quishpichi tucungaj” (Hechos 4:12).

 Jesús paita sirtura quirijcunamanda huañucami (Hebreos 2:9; Juan 3:16). Yaya Dios paita atachica huañushcaunamanda, huasha shu ángel cuinta ahua pachama tigraca (Hechos 3:15). Ahua pachamanda, Jesús “paimanda Diospajma shamujcunara shinallara puchucaigama quishpichinara ushanmi, pai huiñaigama causaj asha paigunamanda Diosta mañangaj” ushanmi (Hebreos 7:25).

¿Imarasha ministinchi Jesús ñucanchimanda Diosta mañachu?

 Tucuiguna uchayuj ashcamanda (Romanos 3:23). Uchamanda huañunchi shinallara ucha rashcauna Diosmanda ñucanchira caruyachin (Romanos 6:23). Shinajpi shu abogado cuinta Jesús ñucanchij “shu yanapaj” tucun pai huañushcai quirijpi (1 Juan 2:1). Jesús ñucanchimanda paihua causaira cuca, chiraigu Yaya Diosta ñucanchimanda mañana ushan ñucanchi ucha rashcaunara perdonangaj (Mateo 1:21; Romanos 8:34). Yaya Dios, Jesús mañashcaunara cutipan pai munashca cuinta ashcamanda. Pai Jesusta Allpama cachamuca “paimanda cai pachara quishpichingaj” (Juan 3:17).

¿Quishpichingaj Jesuspi quirinallachu ministinchi?

 Mana. Jesuspi quirina ajpis quishpirinara charingaj mana chilla ministinchi (Hechos 16:30, 31). Biblia nin: “Imasna runa aicha alma illaj huañushcami, shinallara quirinas ali ranauna illaj huañushcami” (Santiago 2:26). Quishpiringaj caita ministinchi:

•   Jesús, paihua Yaya Jehovamandas yachangaj (Juan 17:3).

•   Paigunai quirinara charingaj (Juan 12:44; 14:1).

•   Quirinara ricuchina anchi Diospa mandashca shimiunai casusha (Lucas 6:46; 1 Juan 2:17). Jesús rimacami mana tucui ‘Señorda’ cayaj quishpiringami nisha, maspas paihua Yaya rimashcara pactachijcuna (Mateo 7:21).

•   Shinzhi llaquiunara charishas quirinara ricuchisha catina anchi. Jesús caita nica: “puchucaigama ahuantaj runa quishpingami” (Mateo 24:13).