Ari, Supai tianmi, shu ángel an, manali tucusha Dioshua cuntra rica. Astaun, Biblia nin “cai pacha atun apu” an (Juan 14:30; Efesios 6:11, 12). Biblia cai cati shutiuna utilizan pai imasna ashcara ricuchingaj:

•   Satanás, nisha nin “Cuntra” (Job 1:6).

•   Supai, nisha nin “Llullasha caudsayachij” (Apocalipsis 12:9).

•   Machacui, Bibliai intindichin umachij ashcara (2 Corintios 11:3).

•   Tintaj (Mateo 4:3).

•   Llullaj (Juan 8:44).

Runaunai tiaj manalira rurana munai mana an

 Huaquin runauna quirinun, Supai ñucanchi, shinallara Dios ucui tiaj manalira rurana munai ashcara. Shinajpi, Supai mana shu sintishcallara an, Biblia ricuchin Supai Yaya Dioshua cuintaj aca. Astaumbas Yaya Dios tucui pai rurashcaunai ucha illaj chuyaj Dios an. Chimanda pai manalira rurana munai mana charina ushan (Deuteronomio 32:4; Job 2:1-6). Shinallara Biblia ricuchin Supai Jesusta tintaca, pai ucha illaj ashas (Mateo 4:8-10; 1 Juan 3:5). Shina asha, Biblia ricuchin Supai sirtu causajmi an.

 ¿Imarasha ashca runauna Supai sirtu tiashcara mana quirinun? Biblia ricuchin Supai ashca tunu llullashcaunahua runaunara umachiun (2 Tesalonicenses 2:9, 10). Por ejemplo, Supai ashca runaunara pandachina ushashca pai mana sirtu tian nisha llullashcahua (2 Corintios 4:4).

  Panda iyai: Lucifer shuj Supai shuti an.

 Sirtu yachachina: Huaquin Bibliagunai Supaimanda rimangaj munasha, “Lucifer” shimi churanushca, cai shimi nisha nin “punzhayachij” (Isaías 14:12). Cai shimi Babilonia apuuna miraimanda rimana textogunai tian, chi apuuna yapa ahuayachishcamanda Yaya Diosmanda taripashca anunga (Isaías 14:4, 13-20). Cai “punzhayachij” nishca shimii utilizashca an chi apuuna vinsishca ashcamanda burlaringaj.

  Panda iyai: Supai Yaya Diosmanda tarbaj an.

 Sirtu yachachina: Supai mana Diospa sirvijchu, astaun paihua chijnij an. Shinallara Diosta sirvijcunamanda, chimanda paigunara turmindachin, caudsayachin (1 Pedro 5:8; Apocalipsis 12:10).