Cai quillcai ricushcangui, ashca Bibliamanda iyaiguna tianmi cai iyaiguna canda camba familiaras yanapangami. Jehová Dios munanmi cushiuna anuchu. Astaumbas, pai nin paita aduranara pundai churajpi, “cai tucuira cangunajta yapangami” (Mateo 6:33). Yaya Dios camba amigo tucunara munanmi. Chiraigu paihua amigo tucungaj imaras rurangui. Tucui runaunahua amigo tucuna randiga Yaya Dioshua amigo tucuna mas yali valishcami (Mateo 22:​37, 38).

BIBLIA NINMI: ““Ñuca Yaya tucusha cangunahua, cangunaga churiuna ushushiuna tucunguichimi ñucahua,” tucuira ushaj [‘Jehová’, NM] nin” (2 Corintios 6:18). Yaya Dios camba amigo tucuna munan, oracionga paihuajma llutachin. Jehová Diosllara ñucanchira cumbiran: “Mana saquisha mañaichi” nisha (1 Tesalonicenses 5:17). Can turbarishcaunara, shungüi sintishcaunaras cuintachu pai munan (Filipenses 4:6). Camba familiahua oracionda rajpimi, camba familiaga can Dioshua camba ali amigo ajta ricununga.

Yaya Dioshua rimashas, paita uyana angui. ¿Imasnara uyanguima? Bibliara, Bibliamanda yachana quillcaunaras estudiasha (Hechos 17:11). Yachashcaunaras cuti cuti iyarisha (1 Timoteo 4:15). Yaya Diosta uyangaj ministirinmi Bibliamanda yachangaj, tandarinaunamas ringaj (Hebreos 10:​24, 25).

Shinallara Jehová Diosmanda shujcunama rimashami mas ali paihua apanunushun. Mas caran cutin rimashaga, mas paihua mayambi sintirishunmi (Mateo 28:​19, 20).

CAMANA USHANGUICHARI:

• Caran punzha oracionda rangaj Bibliara leangajpas timpura llucchingui

• Ñaupara yanga shujta ranaunai timpura pasana randi pundai Diosta sirvingaj camba familia pasachun yanapangui

BIBLIA NINMI: “Diospajma mayanllayamuichi, shina rajpi pai cangunama mayanllayamungami” (Santiago 4:8). Shu punzha shu hora camba familiahua Bibliamanda yachangaj ajllangui (Efesios 6:4). Mana chilla ranachu angui: caran punzha Yaya Diosta ama cungaringuichu astaumbas camba familia Dioshua mas ali apanunaras yanapangui. Biblia casna ninmi: “Cai mandashcaunara [...] yachachi [Jehovamanda] camba huasi tiaushcai, ñambira puriushcai, puñungaraushcai, ataringaraushcais” (Deuteronomio 6:​6, 7). Can rurangaj ajllashca Josué cuinta ningui, pai nica: “Ñuca, ñuca familiahuas, ñucanchi Jehová Diosta sirvishunmi” (Josué 24:15).

CAMANA USHANGUICHARI:

• Familiaibi caran shuj ima ministishcara caran semanaibi yachachingaj purunturingui