Yayauna paiguna punda huahuara charisha cushi sintinungami shinajpis turbarinungami. Llullu huahuara cuirangaj ashca timpura, ursairas ministishcara cuinta urmanguichima. Mana ali samana ushashcamanda yapa llaquilla sintishcamanda piñarishcamandas camba carihua o huarmihua huaquimbi piñanunguichimi. Chiraigu ishquindi imasna llullu huahua cuiranara cari huarmi paigunapura cuiranunaras cuintanuna anguichi. ¿Imasnara Bibliamanda iyaigunaga cai problemagunara alichingaj yanapan?

BIBLIA NINMI: “Llaquina unaira chapanmi, ali shunguyujmi [...], paihuajllara mana mascanzhu, mana dsaslla piñarinzhu” (1 Corintios 13:​4, 5). Mamaga punda llullu huahuara charishaga, huahuara cuiranalla pasangami. Shina tucujpimi camba cari paita ichushca cuinta sintiringami, chiraigu camba carihua timpu pasanara ama cungaringuichu. Mana dsas piñarisha ali shunguyuj tucusha paita ministishcara ricuchina ushangui shinallara pai yanapashcara valichinas angui.

“Cariuna, canguna shinallara, intindinahua canguna huarmiunahua causaichi.” (1 Pedro 3:7.) Yaya tucushaga, ricunguimi camba huarmira mas timpura ministinga huahuara cuirangaj, chiraigu turbarishca, sambayashca, llaquirishcas sintiringami ashca rurana tiashcamanda. Shina ajpi huaquimbi canhua piñaringachari, chimanda can paihua ama dsas piñaringuichu, astaumbas “paigunahua ama milli tucuichichu” (Colosenses 3:19). Chiraigu riparangui camba huarmi ministishcara tucuira cungaj (Proverbios 14:29).

CAMANA USHANGUICHARI:

• Yaya ashaga: Llullu huahuara cuirangaj tutas camba huarmira yanapai. Astaumbas mas shujta raigunamanda camba huarmihua llullu huahuahua timpu pasangui

• Mama ashaga: Camba cari, huahuara cuirangaj yanapasha nijpiga chasquingui. Cari, huahuara mana cuirangaj ushajpi mana valichina randi llaquihua yachachingui imasnara huahuara cuirana

BIBLIA NINMI: “Ishquindi shu aichalla tucunaungami” (Mateo 19:5). Familiai yaparijpis ama cungaringui camba huarmihua o carihua “shu aichalla tucunaungami”. Cangunapura caruyana randi mas ali apanungaj ursaringuichi.

Huarmi, camba cari yanapaira pagarachungui. Can pagarachu nina “ali yanapana shimiuna” an (Efesios 4:29). Cari, camba huarmira ashca llaquishcara paita valichishcaras rimangui astaumbas familiamanda tarbashcaraigu pagarachungui (Proverbios 31:​10, 28).

“Pihuas paihua quiquin ali tucunara ama mascachu, astaun shujpaj ali tucunara mascachu.” (1 Corintios 10:24.) Tucui huras camba carira o huarmira cushiyachingui pai yanapashcaras riparangui. Timpura llucchinguichi parijumanda cuintanungaj uyangajpas. Casarashca cari o huarmi puñusha paigunapura causanara mana caran quiquin munashcara raichichu. Camba cari o huarmi ministishcara riparangui. Biblia ninmi: “Ama mitsanuichichu. Huaquin hurasllai ishquindimanda munashaga saquinauchu” (1 Corintios 7:​3-5). Chiraigu pariju tucui cuintanuichi. Mana piñanunusha, ali intindinusha cangunapura mas ali apanunaga mana tucuringachu.

CAMANA USHANGUICHARI:

• Camba carihua o huarmihua paihua sapalla pasanara ama cungaringuichu

• Cangunapura llaquinushcara imashituhuaras cuyasha ricuchinuichi

BIBLIA NINMI: “Ichilla huahua hurasmanda pacha Diospa Santu Quillcashcaunara ricsishcangui. Cai shimiuna canda alma quishpichina yachanara cunaun” (2 Timoteo 3:15). Camba huahuara imasna yachachinara iyangui. Huahuaga manara pagarishcallaira ashca yachana ushajta riparana ushangui. Ña icsa ucui ashallara sintinmi mama llaquilla o cushilla sintirishca, yaya mama shimiras ricsina ushanmi. Chiraigu pagarishcamanda pacha leana angui, can leashcara mana intindijpis, huasha yanapangami leanara gustachu.

Yaya Diosmanda yachachingaj camba huahua yapa ichillami nisha ama iyangui. Huahua ñaupai Jehová Diosta mañangui (Efesios 6:4). Huahuahua pariju pujllaushcai Yaya Dios rurashcaunamanda cuintangui (Salmo 78:​3, 4). Iñasha riushaga cuinta urmangami can Jehová Diosta llaquishcara shinami paihuas Diosta llaquisha callaringa.

CAMANA USHANGUICHARI:

• Sabiru tucusha huahuara ali yachachingaj oracionda rangui

• Huahuara yachachingaj cuti cuti chi iyaillara shimiunaras rimangui