Shu cari shu huarmi casarashaga, huaquin problemagunara charinguichimi, caran tunu iyai charishcamanda sintishcamanda o caran tunu familiaguna iñachishcamandas. Astaumbas problemaguna mana huasi ucumandalla cungaimandas ricurimungaraun.

Mana cungailla purinachu an mana problemara charij shina, randi Biblia nin problemagunara riparasha alichinami an nisha (Mateo 5:​23, 24). Canlla problemara alichina randi Bibliamanda iyaiguna pactachishami problemara sumaj alichingaraungui.

BIBLIA NINMI: “Timpu saquishca tianmi [...] rimana timpu” (Eclesiastés 3:​1, 7). Timpura llucchisha problemamanda cuintangui; shu problemamanda camba carira o huarmira can imasna sintishcamanda ima iyashcamandas tucuira cuintaringui. Tucui huras imamandas ciertora rimangui (Efesios 4:25). Chara piñarishca ashas, piñanuna munashas ahuantaringui. Mana piñarisha ali rimashaga mana imahuamandas atun piñanunara charinguichu (Proverbios 15:4; 2 Timoteo 2:24).

Camba cari o huarmi rimashcaunara mana munashas; piñanuna randi llaquinara respetanaras ricuchisha catingui (Colosenses 4:6). Canguna piñarishcaunamanda dsas alichingui, cuintanunaras ama saquinguichu (Efesios 4:26).

CAMANA USHANGUICHARI:

• Problemamanda cuintanungahua timpura llucchingui

• Camba cari o huarmi rimaushcai, chillaira rimana munashas chapangui. Uyashca huasha can rimanara ushangui

BIBLIA NINMI: “Parijumanda llaquinuichi, uquipura cuinta; caran duiñu parijumanda ahuayachisha” (Romanos 12:10). Uyanara ministirinmi camba cari o huarmi ima rimaushcara intindisha uyangaj, “shu sintinallahua, uquipurasna [...] mansu shunguyujcuna” shina (1 Pedro 3:8; Santiago 1:19). Mana uyaj cuinta ranachu angui. Usharijpiga camba cari o huarmi rimaujpi ima raushcaras saquisha paita uyapangui, mana ushashaga tapungui huasha cuintanui ushanchichu nisha. Camba carira o huarmira camba amigo cuinta pariju tarbaushcasna ricuna angui mana camba mana amigo cuinta, shina ricusha mana dsas piñaringuichu (Eclesiastés 7:9).

CAMANA USHANGUICHARI:

• Camba cari o huarmi rimaushcara mana uyana munashas alira riparasha uyangui

• Rimashcara uyashaga imara niun nisha alira riparana angui. Ima sintiushcara imasna rimaushcaras riparana angui

BIBLIA NINMI: “Ama sambayashunchi alira rangaj. Ñucanchi mana sambayasha, pactarishca punzhai pallashunmi” (Gálatas 6:9). Ishquindipura problemara imasna alichinara yachashaga mana chillai saquinachu anguichi. Ministirinmi chi problemara alichingaj. Chita alichingahua mana sambayasha catijpimi problemaguna ali tucunga (2 Tesalonicenses 3:13). Pariju tarbaj tucushami, “cushiyanun” (Eclesiastés 4:9).

CAMANA USHANGUICHARI:

• Caran duiñu ima rurana ushangui, problemara alichingaj nisha iyarina angui

• Ña semanaguna o quillauna pasajpi tapuringui cai problemara imasna ña aliyasha riun nisha