“Cai pacha gubirnuuna ña ñucanchi Señorbaj tucunaun, paihua Cristojpas. Pai huiñai huiñaigama mandangami” (Ricuchina [Apocalipsis] 11:​15, Mushuj Pactachina Shimi).

“Ahuai tiaj Diospa Churi nishca anga. Señor Dios paihua yaya Davidpa rey apu tiarinara paita cungami. [...] huiñai huiñaigama, pai mandana ima hurascamas mana tucuringachu” (Lucas 1:​32, 33).

• Cai ali reino o gobierno caran shujta yanapai ushanmi (Santiago 1:​25).

• Ñallai, Diospa Reino cai mundura mandajpi, ungüiguna mana tiangachu, gustu cushi causashun (Ricuchina [Apocalipsis] 21: 4).

Ricushun:

• Jesús ricuchicami Diospa Reino imara pactachingaraun. Jesusga paita catijcunara yachachicami, Diospa Reino shamuchu nisha oraciombi mañanguichi. Shinallara Diospa munai cai Allpai pactarichu nisha mañanguichi yachachica (Mateo 6:​9, 10). Astaumbas Diosta mañashca imasnara pactaringaraujta ricuchica.

  Cai Allpai ashcai, Jesusga yarcaihuajgunara caracami, ungushcagunara alichicami, huañushcagunara causachicami. (Mateo 15:​29-​38; Juan 11:​38-​44). Casna ali rasha, Diospa Reinoi Jesús Rey apu tucungaraushcara ricuchica. Astaumbas cai Allpai causajcunama sumaj munanaita rurangaraushcaras ricuchica (Ricuchina [Apocalipsis] 11:15).

• Mundui pasaushcaunara ricusha yachanchi Diospa Reino ña pactamuun. Diospa Reino gustu ganaslla causana manara pactamujllaira cai munduiga, yarcai, gerrauna, Allpa cuyunauna tiangaraun nisha Jesús rimaca (Mateo 24:​3, 7).

  Cuna punzha tucui Jesús rimashcauna pactariushcara ricuunchi. Chimanda yachanchimi ñalla Diospa Reino turmindusgunara tucuchinga.