Pastorkunaqa utaq curakunaqa Diosmanta yachachinankumantaqa qullqiraykullam runakunata imapipas yanapaq tukunku. Chaymantapas iglesiankupim tukuyta rantikunku achka qullqipa chaninpi. Chayna ruwasqankumantam qatiqninpi yachasunchik:

•   Huk curam 13 watapuni achka-achka qullqita gastarqa suma-sumaq avionkunapi hinaspa carrokunapi purikuspan. Chaymantapas wasinta allichachispanmi tawa millon dolar qullqita gastarqa. Chay gastasqan qullqiqa karqa iglesiapaq churasqankum.

•   Africa lawpim huk kaqnin pastorta uyarinankupaq wara-waranqantin runakuna rinku. Chay pastorpa iglesianpim hampikunankupaq aceiteta rantikunku, rantikunkutaqmi pachakunatapas pastorpa fotonta laqaruspa chaynataq imakunatapas. Payqa apu-apu runam, uyarinankupaq riqkunañataqmi wakcha kanku.

•   China nacionpim budismo religionpi kaqkuna yupaychanankupaq tawa urqukunaman rinku. Chayman yaykunankupaqqa achka qullqitam paganku. Chaymi chay religionpi punta apaqkunaqa apullaña kanku.

•   Estados Unidos nacionpi pastorkunam runakunapa llamkayninkuman rispanku Diosmanta yachachiq tukuspanku qullqita cobranku.

 Diosmanta yachachiq tukuspanku qullqita mañakusqankumanta ¿ima niwaqtaq? ¿Diosqa imaynataq tarikun paymanta yachachiq tukuspanku qullqita mañakuptinku?

 Bibliapim willawanchik ñawpa tiempopi sacerdotekuna qullqiraykulla Diosmanta yachachiyta qallaykusqankumanta, chaywanmi Diosqa anchata piñakurqa (Miqueas 3:11 a). Piñakurqataqmi yupaychanankupaq wasipi negociota ruwasqankuwanpas, nirqam: “¿Suwakunapa machayninpaqchu kay sapaqchakusqay wasita hapinkichik?”, nispa (Jeremias 7:11).

 Jesuspas manam munarqachu Diosmanta yachachiq tukuspanku qullqita mañakunankutaqa. Jesus kay pachapi kachkaptinmi chay tiempopi sacerdotekuna qullqita chaskikunankurayku Jerusalen templopi negociantekuna imatapas rantikunankupaq saqirqaku. Chay negociantekunaqa Diosta yupaychanankupaq hamuqkunamanmi imatapas llumpay preciopi rantikuqku. Chaymi Jesusqa llumpayta piñakuspan chay negociantekunata qarqururqa, nirqam: “¡Taytaypa wasintaqa amayá negocio ruwana wasita hinaqa ruwaychikchu!”, nispa (Juan 2:14-16).

 Jesusqa taytantam qatipakurqa, chaymi taytanpa munasqanman hina imatapas ruwarqa (Juan 8:28, 29). Jesusqa Diosmantam yachachirqa, milagrota ruwaspanmi yarqaymanta kaqkunaman mikuchirqa, unquqkunatam sanoyachirqa, wañukuqkunatam kawsarichirqa. Tukuy chaykunata ruwasqanmantaqa manam qullqitaqa mañakurqachu. Payqa manamá apu kaytaqa munarqachu, chaymi wasillanpas mana karqachu (Lucas 9:58).

 Jesusqa qatiqninkunamanmi kaynata nirqa: “Qamkunaqa mana imallapaqmi chaskirqankichik, mana imallapaqtaqyá quychikpas”, nispa (Mateo 10:8). Chayna nisqanta kasukuspankum Jesuspa qatiqninkunaqa Diosmanta yachachispankuqa qullqitaqa mana mañakurqakuchu. Qatiqninpiyá astawan yachaykusun:

•   Huk kutipim Simon sutiyuq runa apostol Pedroman qullqita munachirqa milagrokunata ruwananpaq atiyta quykunanpaq. Apostol Pedroñataqmi kaynata nirqa: “Qanwan kuskayá qullqiki chinkachun, qamqariki mana imallapaq Diospa qusqantam qullqikiwan tariyta piensarqanki”, nispa (Hechos 8:18-20).

•   Apostol Pabloqa llaqtan-llaqtanmi iñiqkunaman watukuspan yachachirqa, chayna yachachisqanmantaqa manam paypas nitaq puriqmasinkunapas qullqitaqa mañakurqakuchu. Chaymi nirqa: “Ñuqaykuqa manam wakin runakuna hinachu Diospa palabranwanqa negociota ruwaniku”, nispa (2 Corintios 2:17). Chaymantapas nirqaraqmi: “Ñuqaykuqa tuta-punchawmi llamkarqaniku, chaynapi Diosmanta sumaq willakuyta qamkunaman willasqaykupi mayqinnikichiktapas mana gastachinaykupaq”, nispa (1 Tesalonicenses 2:9).

 Jesuspa qatiqninkunaqa huk lawkunapi Diosmanta willakunankupaq chaynataq iñiqmasinkuta imapas pisipuqninpi yanapanankupaqqa qullqitam necesitarqaku. Chaywanpas Diosmanta yachachispankuqa manam qullqitaqa mañakuqkuchu. Pipas imatapas paykunaman quspanqa bibliapa nisqanman hinam tukuy sunqunkuwan quykuqku, qatiqninpi yachaykusun bibliapi ima nisqanmanta:

•   2 Corintios 8:12 nin: “Imapas tukuy sunquwan yanapakuy qusqanchiktaqa Diosqa chaskinmi, payqa munan pipas atisqanman hina qunantam, manam mana atisqanman hina qunantachu”, nispa.

   Ima ninantaq chayqa: Jehova Diosqa tukuy sunqunchikwan qusqanchiktam chaskiwanchik manam achkata qusqanchikraykuchu.

•   2 Corintios 9:7 nin: “Sapakamayá sunqunpi imam tantiasqanman hina quchun, amayá llakikuspachu nitaq obligasqachu, Diosqa kuyan kusikuywan quqtam”, nispa.

   Ima ninantaq chayqa: Diosqa manam munanchu pipas mana munastin qunantaqa. Payqa kusikun tukuy sunqunkuwan quptinkum.

 Bibliapa nisqanman hinaqa Jehova Diosqa manam lliw religionkunatachu chaskin (Mateo 7:21-23). Bibliapim pantay yachachiq religionkunata tupachin chuchumika warmiwan. ¿Imaynampi? Qullqirayku utaq imapipas yanapachikunankupaq autoridadkunaman sayapakusqankuraykum (Apocalipsis 17:1-3; 18:3). Bibliapiqa nintaqmi qullqiraykulla Diosmanta yachachiq religionkunaqa hamuq punchawkunapi pasaypaq chinkanankumanta (Apocalipsis 17:15-17; 18:7).

 Chaykamaqa Jehova Diosqa munachkanmi llampu sunquyuq runakuna pantay yachachiq religionkunamanta lluqsikuspanku bibliapi yachachikuykunaman hina yupaychanankuta (Mateo 24:11, 12; 2 Corintios 6:16, 17).