1 Tesalonicenses 2:1-20
2 Wawqi-panillaykuna, qamkunaqa yachankichikmi watukamusqaykuqa mana yanqapaq kasqanta.+
2 Yachankichiktaqmi Filipos+ llaqtapi maqapasqa chaynataq ñakarichisqa kasqaykutapas, chaywanpas Diosninchikmi mana manchakuq kanaykupaq kallpanchawarqaku, chaynapim achkallaña runakuna harkakuchkaptinkupas* Diosmanta sumaq willakuyta willarqaykiku.+
3 Ñuqaykupa imapas rimasqaykuqa* manam pantay yachachikuymantachu nitaq imapas millakuypaq kaqmantachu, manataqmi engañowanchu,
4 aswanqa Diosmi allinpaq qawawaspanku churawanku sumaq willakuyta willakunaykupaq, chaymi ñuqaykuqa rimaniku Diosta kusichinaykupaq, manam runakunata kusichinaykupaqchu, Diosmi qawan sunqunchik imayna kasqantaqa.+
5 Yachasqaykichikpi hinapas, ñuqaykuqa manam haykapipas favorniykupi kananpaqqa pitapas alabarqanikuchu nitaq iskay uyapas karqanikuchu imatapas llumpayta munapayaspaqa,+ Diospas chaytaqa yachanmi.
6 Chaymantapas, Cristopa* apostolninkuna* kasqaykurayku gastachinayku kachkaptinpas, manam runakunapa alabasqan kaytachu nitaq qamkunapa utaq wakin runakunapa alabasqan kaytachu maskarqaniku,+
7 aswanqa wawankunata kuyakuywan uywaq mama hinam llampu sunqulla qamkunawan karqaniku.
8 Qamkunata anchata kuyasqaykuraykum ñuqaykuqa mana Diosmanta sumaq willakuyta willayllatachu munarqaniku, aswanqa qamkunata yanapayta munaspaykum tukuyta ruwarqaniku*.+ Chaytaqa ruwarqaniku anchata kuyasqaykuraykum.+
9 Wawqi-panillaykuna, qamkunaqa yuyachkankichikmi llamkasqaykutaqa hinaspa anchata kallpanchakusqaykutaqa. Ñuqaykuqa tuta-punchawmi llamkarqaniku, chaynapi Diosmanta sumaq willakuyta qamkunaman willasqaykupi mayqinnikichiktapas mana gastachinaykupaq.+
10 Qamkunapas chaynataq Diospas yachanmi qamkunawan kaspaykuqa rimasqaykuman hina imatapas ruwasqaykuta*, allin ruwaq kasqaykuta hinaspa mana huchayuq kasqaykuta.
11 Yachankichiktaqmi, imaynam taytapas+ churinkunata yanapan, chaynam ñuqaykupas sapakamata kallpancharqaykiku, sunquykichikta tiyaykachirqaniku hinaspa imayna kanaykichikpaq rimapayarqaykiku,+
12 chaynapi Diospa munasqanman hina hinalla kawsakunaykichikpaq.+ Diosmi qayasuchkankichik payña kamachiptin+ chaypi kanaykichikpaq hinaspa paypa hatunchasqan kanaykichikpaq.+
13 Chayraykum ñuqaykupas Diosta tukuy tiempo agradecekuniku.+ Qamkunaqa Diospa palabranta willaptiykum chaskirqankichik, ichaqa manam runapa rimasqanta hinallachu, aswanqa Diospa chiqap palabranta hinam, chay palabranqa qamkunatam yanapasuchkankichik.
14 Qamkunaqa wawqi-panillaykuna, Judea lawpi huñunakuq Jesucristowan* huklla kaq iñiqkuna hinam kachkankichik, paykunatam judiokuna ñakarichichkanku, chaynallatam qamkunatapas llaqtamasikichikkuna ñakarichisuchkankichik.+
15 Judiokunam señor Jesusta+ hinaspa Diosmanta willakuqkunata* wañurachirqaku, ñuqaykutapas wañuchiwanankupaqmi maskawarqaku,+ paykunaqa manam Diospa munasqanman hinachu kawsanku, paykunapa ruwasqankuqa pipaqpas manam allinchu.
16 Paykunaqa huklaw nacionniyuqkuna salvakunankupaq+ willanaykutam harkakunku. Chaynata ruwaspankum aswan mastaraq huchallikunku, ichaqa paykunapa hawanpiñam Diospa piñakuyninqa.+
17 Wawqi-panillaykuna, ñuqaykuqa pisi tiempollam qamkunamanta karunchasqa karqaniku, chaywanpas sunqullaykupim qamkunaqa kachkankichik. Qamkunata qawaykuyta munaspaykum anchata kallpanchakurqaniku qamkunawan tupaykunaykupaq.
18 Chayraykum qamkuna watukuyta munarqaniku. Ñuqa Pablom qamkunaman hamuyta munarqani, manam huk kutillapichu aswanqa iskay kutipim, ichaqa satanasmi harkaruwarqaku.
19 Señorninchik Jesus chayaramuspan kaypi kaptinqa* qamkunam paypa qayllanpi kankichik ñuqaykupa hapipakunayku, kusikunayku hinaspa alabakunayku*.+
20 Arí, qamkunam kusikuyniyku hinaspa alabakunaykuqa kankichik.
Willakuykuna
^ Ichapas kanman: “Sasachawachkaptinkupas”, niqpas.
^ Utaq: “Kallpanchasqaykuqa”.
^ Utaq: “Diospa akllasqanpa”.
^ Utaq: “Kachasqan runankuna”.
^ Utaq: “Kikiykupa vidayku quytapas munarqaniku”.
^ Utaq: “Mana saqisqaykuta”.
^ Griego rimaypiqa nichkan: “Cristo Jesuswan”, nispam.
^ Utaq: “Profetakunata”. Qaway kay palabrapa ima ninan kasqanta.
^ Qaway “chayaramuspa kaypi kasqan” niqpa ima ninan kasqanta.
^ Utaq: “Alabakunayku corona hina”.
