2 Corintios 4:1-18
4 Chaynaqa Diosmi llakipayawaspanku kay ruwayta quwarqaku, chaymi qipamanqa mana kutinikuchu,
2 aswanqa saqirunikuñam pakasqallapi pinqaypaq ruwaykunata, manataqmi pitapas pantachistinchu purichkaniku, nitaqmi Diospa palabrantapas yapaykuspachu nitaq qichuykuspachu willakuniku,+ aswanqa Diospa qayllanpi chiqap yachachikuyta willakuspaykum llapa runakunaman* pi kasqaykuta riqsichikuniku.+
3 Chaymantapas sumaq willakuymanta willakusqayku pakasqa kaspanqa, wañuypaq kaq runakunapaqmi pakasqa kachkan.
4 Kay tiempopi* mana iñiq runakunapa yuyayninkutam kay pachapa diosnin+ tutayarachin,+ chaynapi kancharichkaq Cristomanta* sumaq willakuy paykunata mana kancharinanpaq.+ Cristoqa Diospa rikchayninmi.+
5 Ñuqaykuqa willakuchkaniku manam kikiykumantachu, aswanqa Jesucristo señor kasqanmantam, willakuchkanikutaqmi Jesusrayku qamkunapa sirvientekichik kasqaykumantapas.
6 Diosmi nirqa: “Tutayaymantayá achki kancharichun”, nispa.+ Paymi suma-sumaq yachayninwan sunquykuta kanchaykun+ Cristopa kancharichkaq uyanwan.
7 Kay sumaq llamkayqa mitumanta ruwasqa mankapi*+ churasqa quri-qullqi hinam+ ñuqaykupi kachkan, chaynaqa kachkan runakunapa mana haypay atisqan hatu-hatun atiy chaskisqaykuta qawachinaykupaqmi, chay atiyqa manam ñuqaykumantachu hamun, aswanqa Diosmantam.+
8 Kaylawmanta-waklawmanta imaymana sasachakuykuna hamuspanpas manam ñitiruwankuchu mana kuyurinapaq hinaqa, manataqmi iskayrayaspaykupas pasaypaqchu hukmanyaruniku,+
9 imatapas ruwawanankupaq maskasqa kaspaykupas manam qunqasqachu kaniku,+ llumpay ñakarichisqa kaspaykupas manam wañurunikuchu.+
10 Jesus hinam ñakariniku hinaspa wañuypa patanpi tarikuniku,+ chaytam tukuy tiempo aguantaniku, chaynapi Jesucristo hina kawsakusqayku sutilla kananpaq.
11 Ñuqaykuqa Jesusraykum sapa punchaw wañuypa patanpi kaniku,+ chaynapi Jesucristo hina kawsakusqayku sutilla kananpaq, ñuqaykuqa wañuruqlla runakunaraqmi kaniku.
12 Ñuqaykuqa wañuypa patanpim kachkaniku, qamkunam ichaqa kawsakuyta tarinkichik.
13 Qillqasqam kachkan: “Diospi hapipakusqayraykum rimarqani”, niq.+ Ñuqaykupas Diospi hapipakusqaykuraykum rimaniku.
14 Ñuqaykuqa yachanikum Jesusta kawsarichiq ñuqaykutapas payta hina kawsarichiwanankuta, hinaspam qamkunawan kuskata Jesuspa ñawpaqninman pusawanqaku.+
15 Tukuy chaykunaqa qamkunapa allinnikichikpaqmi, chaynapi aswan achka runakunaraq Diospa ancha kuyakuyninta* chaskinankupaq, achka runakunamiki Diosta agradecekuspanku hatunchachkanku.+
16 Chaymi mana hukmanyanchikchu, cuerponchik machuyaptinpas imayna kasqanchikqa astawanmi sapa punchaw musuqyachkan.
17 Llumpay ñakariykunaqa tukuruqllam, hinaspapas mana kaqpaq hinallam, chayna kaptinpas chay ñakariykunaraykum allin kaqkunata chaskisun, chay allin kaqkunaqa suma-sumaqmi, hinaspapas wiña-wiñaypaqmi.+
18 Ñuqanchikqa mana iskayrayaspam suyachkanchik ñawinchikpa mana rikusqan kaqkunata, manam rikusqanchik kaqkunatachu.+ Rikusqanchik kaqkunaqa manam unaypaqchu, mana rikusqanchik kaqkunam ichaqa wiña-wiñaypaq.
Willakuykuna
^ Griego rimaypiqa nichkan: “Runakunapa conciencianman”, nispam.
^ Qaway “kay tiempo” niqpa ima ninan kasqanta.
^ Utaq: “Diospa akllasqanmanta”.
^ Utaq: “Puyñupi”.
^ Kaypiqa rimachkan mana kuyana kachkaspa kuyasqa kaymantam.
