2 Reyes 4:1-44
4 Diosmanta willakuq+ runapa* viudanmi Eliseoman rispan nirqa: “Taytáy, qusayqa wañukunñam. Yachasqaykipi hinapas payqa Jehova Diosta kasukuqmi karqa.+ Debekusqay runa hamuruspanmi iskaynin wawaykunata pusayta munachkan serviqnin kanankupaq”, nispa.
2 Chaynata niptinmi Eliseoñataq nirqa: “¿Imapitaq yanapaykiman? ¿Kachkanraqchu wasikipi imallaykipas?”, nispa. Chaymi viudañataq nirqa: “Taytáy, manam imallaypas kanñachu, puyñuchapi aceitellayñam kapuwachkan”, nispa.+
3 Hinaptinmi Eliseoqa nirqa: “Kutispaykiyá llaqtamasikikunamanta achka puyñukunata mañakaramuy.
4 Chaymantam wawaykikunapiwan wasi ukupi wichqakurunki. Hinaspam llapallan puyñukunaman aceiteta hillpunki, huntachisqaykiman hinam sapaqmanña churanki”, nispa.
5 Chaynata niykuptinmi viudaqa wasinman kutikurqa.
Wasipi wichqakuruptinkum wawankuna puyñukunata haywarqa, hinaptinmi viudañataq aceiteta hillpurqa.+
6 Puyñukunaman aceite huntaruptinmi huknin wawanta nirqa: “Huk puyñutawan haywamuway”, nispa.+ Wawanñataqmi nirqa: “Manam kanñachu”, nispa. Chaynata niruptillanmi aceiteqa tukururqa.+
7 Chaymi viudaqa Diospa runan Eliseoman willamurqa. Hinaptinmi Eliseoqa nirqa: “Chay aceiteta rantikuspaykiyá* manuykikunata pagamuy. Puchuqñataqmi kanqa qampaqwan wawaykikunapaq”, nispa.
8 Huk kutipim Eliseoqa Sunem llaqtata rirqa,+ chaypim yacharqa* ancha riqsisqa warmi. Paymi Eliseota hikutarqa wasinpi mikunanpaq.+ Eliseoqa sapa kuti chayninta rispanmi chay warmipa wasinpi mikuq.
9 Chaymi chay warmiqa qusanta nirqa: “Yacharunim kayninta sapa kuti pasaq runaqa Dios yupaychaq kasqanta.
10 Altuspiyá cuartochata ruwarapusunchik,+ hinaspayá camata, sillata hinaspa mecherota churapusunchik watukamuwaspanchik chaypi samakunanpaq”, nispa.+
11 Huk kutipim Eliseoqa chayarurqa, hinaspanmi chay cuartoman samananpaq yaykurqa.
12 Chaymi yanapaqnin Gueazita+ nirqa: “Wasiyuq warmita qayaykamuy”, nispa.+ Hinaptinmi chay warmita niykamurqa hamunanpaq.
13 Chaymantam Eliseoqa Gueazita nirqa: “Ama hina kaspaykiyá niykamuy: ‘Tukuy imata ruwaspam yanapaykuwankiku.+ ¿Imapitaq yanapaykikuman?+ ¿Ichachu llaqta kamachiqta utaq soldadokunapa kamachiqninta nimuyman imallapipas yanapaykusunaykipaq?’”, nispa.+ Hinaptinmi chay warmiñataq nirqa: “Amaraq, allinmi kachkani. Aylluykunawanmi hawka kawsakuchkani”, nispa.
14 Chaymi Eliseoqa Gueazita nirqa: “Hinaptinqa, ¿imatataq paypaq ruwayman?”, nispa. Gueaziñataqmi nirqa: “Paypaqa manam wawan kanchu,+ qusanpas yuyaqñam”, nispa.
15 Hinaptinmi Eliseoqa nirqa: “Kaqmanta qayaramuy”, nispa. Qayaramuptinmi warmiqa punkupi sayarqa.
16 Chaymi Eliseoqa warmita nirqa: “Wataman kunan hinatam qari wawata wachakunki”, nispa.+ Hinaptinmi warmiñataq nirqa: “Taytáy, ¡qamqa kanki Diospa runanmi! Amayá llullakuwaychu”, nispa.
17 Ichaqa Eliseopa nisqanman hinam qatiqnin watata qari wawata wachakururqa.
18 Wawaqa wiñaruspanmi huk punchaw taytan qawaq rirqa, taytanqa kawsayta huñuqkunawanmi kachkarqa.
19 Hinaspanmi taytanta nirqa: “¡Way, umallaymi nanawachkan! ¡Umallaymi nanawachkan!”, nispa. Hinaptinmi taytanñataq runanta nirqa: “Mamanman aparuy”, nispa.
20 Chaymi warmata mamanman kutirachirqa. Mamanpa marqayninpim chawpi punchawkama karqa, chaymantam wañukurqa.+
21 Hinaptinmi Eliseopa samakunan cuartoman aparuspan puñunanman siriykachirqa.+ Hinaspanmi punkuta wichqaykuspan pasakurqa.
22 Chaymantam qusanta qayaspan nirqa: “Ama hina kaspayá huknin runanchikta kachamuway asnontinta, chaynapi Diospa runanman rirunaypaq, chayllam kutiramusaq”, nispa.
23 Qusanñataqmi nirqa: “¿Imanasqataq kunanqa rinki? Manam llullu killachu nitaq samana punchawchu*”, nispa.+ Hinaptinmi warminñataq nirqa: “Ama llakikuychu, manam imapas pasanchu”, nispa.
24 Chaymantam warmiqa asnota karunaruspan runanta nirqa: “Apurawman risunchik, amam maypipas sayaykusunchu ñuqa ninaykama”, nispa.
25 Warmiqa Diospa runan Eliseomanmi rirqa Carmelo urquta. Eliseoqa karullataraq richkaptinmi rikuramuspan yanapaqnin Gueazita nirqa: “¡Qaway! Sunem llaqtayuq warmim hamuchkan.
26 Ama hina kaspayá taripaykuspayki tapuykamuy: ‘¿Allinllachu kachkanki? ¿Allinllachu qusayki kachkan? ¿Allinllachu warmaykipas?’”, nispa. Tapuykuptinmi warmiñataq nirqa: “Allinllam kachkaniku”, nispa.
27 Carmelo urquman chayaruspanmi warmiqa Eliseopa chakinmanta hapipakururqa.+ Hinaptinmi Gueaziqa asuykurqa warmita asurichinanpaq. Eliseoñataqmi nirqa: “Ama imanaychu, llumpay llakisqam kachkan. Imanasqaya llakisqa kachkan, Jehova Diosqa manam willawanchu”, nispa.
28 Hinaptinmi warmiqa nirqa: “Taytáy, manam ñuqaqa mañakurqaykichu wawataqa. ¿Manachu nirqayki: ‘Ama llullakuwaychu’, nispay?”, nispa.+
29 Chaymantam Eliseoqa Gueazita nirqa: “Wiqawnikiman pachaykita watakuykuspaykiyá+ tawnayta aparikuspayki riruy. Pitapas amam rimakuykunkichu, amataqmi chaskikunkichu pipas rimaykusuptikiqa. Chayaruspaykim tawnaytaqa warmapa uyanman churaykunki”, nispa.
30 Warmapa mamanñataqmi Eliseota nirqa: “Jehova Diospa sutinpim niki, mana qam riptikiqa manam kutisaqchu”, nispa.+ Chaynata niptinmi Eliseoqa hatariykuspan paywan rirqa.
31 Gueaziqa paykunamanta puntata chayaruspanmi warmapa uyanman tawnata churaykurqa. Ichaqa manam warmaqa kuyurirqachu.+ Hinaptinmi Gueaziqa Eliseoman kutimuspan nirqa: “Warmaqa manam rikcharinchu”, nispa.
32 Wasiman Eliseo yaykuykuptinmi warmaqa puñunanpi wañusqa chutarayachkasqa.+
33 Eliseoqa yaykuykuspanmi wichqakaramurqa, hinaspanmi Jehova Diosta mañakurqa.+
34 Chaymantam warmapa hawanman kumuykuspan siminta tupanaykachirqa warmapa siminman, ñawinta ñawinman, makinkunatañataq makinman. Chayna kachkaptinmi warmapa cuerponqa quniriyta qallaykurqa.+
35 Eliseoqa wasi ukupim kaynaman-waknaman ichikacharqa. Hinaspanmi kaqmanta warmapa hawanman kumuykurqa. Hinaptinmi warmaqa qanchis kutikama hachiruspan qawarikururqa.+
36 Chaymantam Eliseoqa Gueazita qayaykuspan nirqa: “Warmapa mamanta qayaykamuy”, nispa. Qayaramuptinmi warmiqa cuartoman yaykuykurqa. Hinaptinmi Eliseo nirqa: “Hatarichiy warmaykita”, nispa.+
37 Warmiqa yaykuykuspanmi Eliseopa ñawpaqninpi qunqurakuykuspan kumuykurqa. Hinaspanmi warmanta hatariykachispan lluqsirurqa.
38 Guilgal llaqtaman Eliseo kutiruptinqa, muchuymi* chaylawpiqa kakuchkarqa.+ Chay kachkaptinmi ñawpaqninpi Diosmanta willakuqkuna*+ tiyarqaku, hinaptinmi Eliseoqa yanapaqninta nirqa:+ “Hatun mankapi mikuyta yanuramuy Diosmanta willakuqkunapaq”, nispa.
39 Paykunamanta hukninmi yuyu pallaq rirqa. Hinaspanmi purun calabazata tariruspan millqaynin* huntata pallarurqa. Chaytam kutispan picarurqa, hinaspanmi mankaman talliykurqa ima kasqanta mana yachachkaspanpas.
40 Chaymantam mikunankupaq qararqaku, hinaptinmi malliykuspanku qaparirqaku: “¡Eliseo kay mikuyqa venenoyuqmi kasqa!”, nispa. Chaymi mana mikurqakuchu.
41 Hinaptinmi Eliseoqa nirqa: “Harinata apamuychik”, nispa. Aparamuptinkum mankaman talliykuspan nirqa: “Runakunaman qaramuy”, nispa. Chay mikuyqa manañam paykunataqa imanarqachu.+
42 Baal-salisa+ allpamantam huk runa Eliseoman apamurqa cebadapa punta kaq rurunmanta ruwasqa 20 tantata.+ Apamurqataqmi wayqachapi chayllaraq huñusqanku cebadatapas.+ Hinaptinmi Eliseoqa yanapaqninta nirqa: “Kayta runakunaman quy mikunankupaq”, nispa.
43 Yanapaqninñataqmi nirqa: “¿Imaynataq 100 runakunamanqa kaytaqa haypachiyman?”, nispa.+ Eliseoñataqmi nirqa: “Runakunaman quy mikunankupaq, Jehova Diosmi nin: ‘Llapanku mikuruptinkupas puchunqaraqmi’”, nispa.+
44 Chaymi runakunaman qurqa, hinaptinmi Jehova Diospa nisqanman hina mikuruptinku puchururqaraq.+
Willakuykuna
^ Hebreo rimaypiqa nichkan: “Diosmanta willakuqkunapa huknin churinpa”, nispam.
^ Utaq: “Venderuspaykiyá”.
^ Utaq: “Tiyarqa”.
^ Utaq: “Sabadochu”.
^ Hebreo rimaypiqa nichkan: “Diosmanta willakuqkunapa churinkuna”, nispam.
^ Utaq: “Yarqaymi”.
^ Utaq: “Marqaynin”.
