Eclesiastes 12:1-14
12 Musu-sipasllaraq kachkaspaykiyá unanchaqnikita yuyariy,+ manaraq sasachakuy punchawkuna chayamuchkaptinyá unanchaqnikita yuyariy.+ “Manañam kusikuyta tarinichu” ninayki punchawkuna manaraq chayamuchkaptinmi yuyarinayki.
2 Intipas, achkipas, killapas hinaspa lucerokunapas manaraq tutayachkaptinmi yuyarinayki,+ pararamuptin puyukuna kaqmanta manaraq kutiramuchkaptinmi yuyarinayki.
3 Wasita waqaychaqkuna manaraq katkatatachkaptinmi yuyarinayki, kallpasapa runakuna manaraq kurkunpalla purichkaptinmi yuyarinayki, asllaña kasqankurayku warmikuna manaraq kutayta saqichkaptinmi yuyarinayki, wasipa ventananta qawaq warmikuna tutayayta manaraq qawachkaptinmi yuyarinayki .+
4 Calleman qawaq punkukuna manaraq wichqakuchkaptinmi yuyarinayki, molinopa qaparisqan uyarikuchkaptinraqmi yuyarinayki, urpipa takisqanwan rikcharinayki tiempo manaraq chayamuchkaptinmi yuyarinayki, takiq warmikunapa takisqan uyarikuchkaptinraqmi yuyarinayki.+
5 Altoman qispiyta manaraq manchakuchkaspaykim yuyarinayki, callekunapi purispa manaraq manchakuchkaspaykim yuyarinayki, almendras sacha manaraq sisachkaptinmi yuyarinayki,+ aqarway urukuna manaraq laqanpa purichkaptinmi yuyarinayki, mikuy ganaspas manaraq chinkachkaptinmi yuyarinayki*, runaqariki wiñaypaq wasinmanmi richkan,+ llakisqa runakunaqariki callekunapim purichkanku.+
6 Qullqimanta ruwasqa waska manaraq tipikuruchkaptinmi yuyarinayki, qurimanta tazon manaraq pakipakuruchkaptinmi yuyarinayki, puyñupas pozopa patanpi manaraq pakikuruchkaptinmi yuyarinayki, pozomanta yakuta hurqunanku rueda manaraq pakikuruchkaptinmi unanchaqnikita yuyarinayki.
7 Allpaqa allpallamanmi kutiykun,+ samayñataqmi* qusuqniki Diosman kutiykun.+
8 Yachachiqmi+ nin: “¡Tukuy imapas yanqam! ¡Tukuy imapas yanqallam!”, nispa.+
9 Yachachiqqa yachayniyuq kaspanpas llaqtapi runakunamanmi yachasqanta yachachiq,+ chaymantapas yuyaymanarqam, hinaspam allinta yachaykuspan sumaq yachachikuykunata achkata huñurqa.+
10 Yachachiqqa sumaq rimaykunata tarinanpaqmi kallpanchakurqa,+ kallpanchakurqataqmi chiqap rimaykunata imam kaqta qillqananpaqpas.
11 Yachayniyuqpa rimasqankunaqa tuksikuq hinam,+ sumaqllaña rimaykuna yachasqanpas allin takasqa clavokuna hinam, paypa rimasqankunaqa huk michiqllapa yachachisqanmi.
12 Churilláy, kay yachachikuykunamanta huktaraq uyariyta munaspaykiqa kaytayá yuyariy: Achka librokunata qillqayqa mana tukuriqmi, chay ruwayllaman qukuruyqa pitapas pisipachinmi.+
13 Tukuy kaykunata uyariruspaykipas Diosta manchakuy,+ kamachikuyninkunata kasukuy,+ chaytamriki runaqa ruwanan.+
14 Diosmiriki tukuy ima ruwasqankunamantaqa juzganqa, pakallapi ruwasqankunamantapas juzganqam allin utaq mana allin kasqanta yachananpaq.+
Willakuykuna
^ Hebreo rimaypiqa nichkan: “Alcaparrapa rurun manaraq kichakuchkaptinmi yuyarinayki”, nispam.
^ Utaq: “Espirituñataqmi”.
