Hechos 11:1-30
11 Judeapi kaq iñiqkunawan apostolkunam yacharurqaku huklaw nacionniyuq runakunapas Diospa palabran uyarisqankuta.
2 Chaymi Jerusalenman Pedro riptin ‘qari kayninkutam señalakunanku’+ niq runakuna Pedrowan atipanakuyta qallaykurqaku.
3 Paykunam nirqaku: “Mana señalasqa runakunapa wasinman yaykuruspaykim qamqa paykunawan mikurqanki”, nispa.
4 Hinaptinmi Pedroqa tukuy ima pasasqanmanta paykunaman kaynata willarqa:
5 “Jope llaqtapim Diosta mañakuchkarqani, chaymi musquypi hina* qawaspay rikurqani linomanta hatun tela hina tawan puntanmanta warkusqa hanaq pachamanta uraykamuchkaqta, chayqa uraykamurqa ñuqapa kasqaymanpunim.+
6 Chaypa hawanpim rikururqani kay pachapi tawa chakiyuq animalkunata, purun animalkunata, qasqunpa puriq animalkunata chaynataq alton pawaqkunatapas.
7 Uyarirqanitaqmi: ‘¡Pedro hatariy! Chayta nakaspayki mikuy’, nimuwasqantapas.
8 Ñuqañataqmi nirqani: ‘Manapunim mikuymanchu señor, ñuqallayqa manam haykapipas mikurqanichu mana mikuna kaqkunatawan millakuypaq kaqkunataqa’, nispay.
9 Hinaptinmi hanaq pachamanta huktawan nimurqa: ‘Diospa chuyanchasqan kaqkunataqa amañayá mana mikuna kasqantaqa niyñachu’, nispa.
10 Chaymantapas huktawanraqmi rimamuqta uyarirqani, hinaptinmi lliw chaykunaqa hanaq pachaman kaqlla huqarikururqa.
11 Chay ratollam Cesarea llaqtamanta maskaqniy hamuq kimsa qarikuna samapakusqayku wasipa punkunpi sayachkasqaku.+
12 Hinaptinmi Diospa espiritun* niwarqa ama imamantapas iskayrayaspa paykunawan rinaypaq. Ñuqawantaqmi rirqaku kay suqta iñiqmasiykunapas, hinaspam llapayku chay runapa wasinman yaykurqaniku.
13 Paymi willawarqaku wasinpi angel rikuriruspan kayna nisqanmanta: ‘Jope llaqtaman qarikunata kachaspaykiyá Pedrowan sutichasqa Simonta qayachimuy,+
14 paymi nisunki qampas hinaspa wasikipi kaqkunapas imata ruwaspa salvasqa kanaykichikmanta’, nispa.
15 Rimayta qallaykuptiyñataqmi Diospa atiynin* paykunaman huntaykurqa imaynam ñuqanchikmanpas qallariypi huntaykuwasqanchikman hina.+
16 Chaymi yuyarirurqani señorninchikpa nisqanta, payqa sapa kutim nirqa: ‘Juanqa yakuwanmi bautizarqa,+ qamkunam ichaqa chuya espirituwan bautizasqa kankichik’, nispa.+
17 Jesucristopi iñiqkunaqa chaskirqanchikmi Diospa mana imallapaq qusqanta, paykunapas ñuqanchik hina chaskichkaptinkuqa, ¿pitaq ñuqaqa karqani Diosta harkakunaypaqqa?”, nispa.+
18 Chaykunata uyariruspankum paykunaqa acuerdopiña karqaku, hinaspam Diosta hatunchaspanku nirqaku: “Chaynaqa, ¡Diosqa munanmi huklaw nacionniyuq runakunapas huchankumanta wanakuspa kawsanankuta!”, nispanku.+
19 Estebanta wañuchisqanku qipatam ñakariy kasqanrayku chiqirurqaku+ Feniciaman, Chipreman hinaspa Antioquiaman, paykunaqa judiokunallamanmi Diospa palabranmantaqa willakurqaku.+
20 Chipremanta hinaspa Cirenemanta wakin iñiqkunam ichaqa Antioquiaman chayaruspanku griego rimaq runakunaman señor Jesusmanta sumaq willakuyta willakurqaku.
21 Chaymantapas Jehova* Diosmi paykunawan karqa, achkallaña runakunapas iñikuspankum señorninchikman kutirikurqaku.+
22 Jerusalenpi iñiqkuna paykunamanta yacharuspankum Bernabeyta+ Antioquiakama kacharqaku.
23 Bernabeyqa chayaruspanmi Diospa ancha kuyakuyninta* qawaspan kusikurqa, hinaspam llapallanta kallpancharqa tukuy sunqunkuwan kallpanchakuspanku señormanta mana rakikunankupaq.+
24 Bernabeyqa karqa Diospa atiyninpa* huntasqan runam hinaspa Diospi anchata hapipakuq runam. Chayraykum achkallaña runakuna señorman iñikurqaku.+
25 Chaymantam Bernabeyqa Tarso llaqtaman rirqa Saulota maskaq.+
26 Tariruspanñataqmi Antioquiaman pusarqa. Hinaptinmi paykunaqa iñiqkunawan watantin huñunakurqaku hinaspam achkallaña runakunata yachachirqaku. Antioquiapim iñiqkunata Diospa yanapakuyninwan “Cristopa qatiqnin” nispa chayllaraq suticharqaku.+
27 Chay punchawkunapim Diosmanta willakuqkuna*+ Jerusalenmanta Antioquiaman rirqaku.
28 Hukninpa sutinmi karqa Agabo,+ paymi sayarispan Diospa atiynin yanapaptin willakurqa enteron pachapi muchuy* kananmanta.+ Chaynamá karqa Claudiopa tiemponpi.
29 Chaymi iñiqkunaqa tantiarurqaku Judeapi yachaq* iñiqkunaman sapakama atisqankuman+ hina imallatapas apachinankupaq.+
30 Chay qusqankutam iñiqkunapi punta apaqkunaman* apachirqaku Bernabeywan hinaspa Saulowan.+
Willakuykuna
^ Utaq: “Revelacionpi”.
^ Qaway “chuya espiritu” niqpa ima ninan kasqanta.
^ Utaq: “Chuya espiritu”.
^ Qaway A5 kaq yachachikuyta.
^ Kaypiqa rimachkan mana kuyana kachkaspa kuyasqa kaymantam.
^ Utaq: “Chuya espiritupa”.
^ Utaq: “Profetakuna”.
^ Utaq: “Yarqay”.
^ Utaq: “Tiyaq”.
^ Utaq: “Ancianokunaman”. Qaway kay palabrapa ima ninan kasqanta.
