Josuey 6:1-27
6 Jerico llaqtaqa Israelpa mirayninkuna mana yaykunanpaqmi suma-sumaq wichqasqa karqa. Manam pipas lluqsirqachu nitaq yaykurqachu.+
2 Hinaptinmi Josueyta Jehova Dios nirqa: “Makikimanmi churaykuni Jerico llaqtata, kamachiqninta hinaspa kallpasapa soldadonkunata.+
3 Chaynaqa, llapallan soldadokunawanmi Jerico llaqtata sapa punchaw huk kutita muyunkichik, chaynatam suqta punchaw ruwankichik.
4 Qanchis sacerdotekunayá baulpa ñawpaqninta richunku carneropa waqranta sapakama apaspa. Qanchis kaq punchawpiñataqmi llaqtata qanchis kutikama muyunkichik, sacerdotekunañataqmi waqrata pukunqaku.+
5 Carneropa waqranta unay pukusqankuta uyarispaykichikqa llapaykichikmi peleaypi qaparisqankuman hina chaylla qaparinkichik. Hinaptinmi llaqtapa murallan tuñirunqa,+ chaymi qamkunañataq llaqtaman yaykunkichik”, nispa.
6 Chaymi Nunpa churin Josueyqa sacerdotekunata qayachimuspan nirqa: “Jehova Diospa baulninta*+ huqariychik, qanchisñataqyá baulpa ñawpaqninta richun carneropa waqranta sapakama apaspanku”, nispa.
7 Josueyqa soldadokunatapas nirqam: “Rispayá llaqtata muyumuychik. Wakin soldadokunañataqyá+ Jehova Diospa baulninpa ñawpaqninta richun”, nispa.
8 Josueypa nisqanman hinam qanchis sacerdotekunaqa Jehova Diospa baulninpa ñawpaqninta rirqaku, paykunaqa carneropa waqranta sapakama apaspankum pukustin rirqaku. Jehova Diospa baulnintañataqmi qipanta aparqaku.
9 Soldadokunaqa rirqaku waqrata pukuq sacerdotekunapa ñawpaqnintam, wakin soldadokunañataqmi sacerdotekuna mana samaykuspa pukustin riptinku baulpa qipanta rirqaku.
10 Josueyqa soldadokunatam nirqaña: “Qamkunaqa amam qaparinkichikchu, nitaqmi imatapas rimarinkichikchu, aswanqa upallallam kankichik. ‘¡Qapariychik!’ niptiyñam lliw qaparinkichik”, nispa.
11 Josuey kamachiptinmi Jehova Diospa baulninta Jerico llaqtapa muyuriqninta huk kutita muyuchirqaku. Chaymantañataqmi wakinkupa kasqanman kutispanku chaypi chay tuta samarqaku.
12 Paqarintintam Josueyqa tuta-tuta hatarirurqa, sacerdotekunañataqmi Jehova Diospa baulninta+ apanankupaq huqarirqaku.
13 Qanchis sacerdotekunañataqmi Jehova Diospa baulninpa ñawpaqninta rirqaku, paykunaqa rirqaku carneropa waqranta mana samaykuspa pukustinmi. Soldadokunañataqmi paykunapa ñawpaqninta rirqaku, wakin soldadokunañataqmi mana samaykuspa waqrata pukuptinku Jehova Diospa baulninpa qipanta rirqaku.
14 Iskay kaq punchawpipas huk kutitam llaqtata muyurqaku, hinaspam wakinkupa kasqanman kutirqaku. Chaynatam suqta punchawpuni ruwarqaku.+
15 Qanchis kaq punchawpiñataqmi chayllaraq achikyachkaptin hatarirurqaku, hinaspam llaqtata muyurqaku wakin punchaw muyusqankuman hina, ichaqa chay punchawllam qanchis kutikama muyurqaku.+
16 Qanchis kuti muyuypipas sacerdotekunaqa waqratam pukurqaku, hinaptinmi soldadokunata Josuey nirqa: “¡Qapariychik!+ ¡Jehova Diosmi llaqtata makikichikman churaykun!
17 Llaqtaqa hinaspa chaypi tukuy imaqa pasaypaq chinkachisqam kanan,+ tukuy chayqa Jehova Diospam. Chuchumika* Rahabwan+ wasinpi kaqkunallayá kawsachunqa, payqa watiqamunankupaq kamachisqanchik runakunatam pakaykurqa.+
18 Ichaqa amam llaqtapa imankunatapas munapayankichikchu,+ chaynapi ama hapikuykunaykichikpaq.+ Chayta ruwaruspaqa Israelpa mirayninkunatam chinkachisqa kananpaq huchallirachiwaqchik hinaspa hatun sasachakuyman churaruwaqchik.+
19 Llapa quri-qullqiqa hinaspa broncemantawan fierromanta tukuy ima ruwasqa kaqkunam ichaqa Jehova Diospaq sapaqchasqa kanan.+ Chaykunaqa Jehova Diospa kapuqninkunamanmi apasqa kanan”, nispa.+
20 Chaymantam waqrata pukuptinku soldadokunaqa qaparirqaku,+ paykunaqa llapan kallpankuwanmi qaparirqaku waqra pukusqankuta uyarispanku, hinaptinmi llaqtapa murallankuna tuñirurqa.+ Chaynapim llaqtaqa soldadokunapa makinpiña karqa.
21 Llaqtapi kaqtaqa espadawanmi lliwta wañurachirqaku qaritapas, warmitapas, musu-sipaskunatapas chaynataq yuyaqkunatapas. Wañurachirqakutaqmi torokunatapas, ovejakunatapas chaynataq asnokunatapas.+
22 Josueyqa chay llaqtata watiqaq iskay qarikunatam nirqa: “Chuchumika warmipa wasinman yaykuspayá rimasqaykichikman hina hurqumuychik paytawan wasinpi lliw kaqkunata”, nispa.+
23 Chaymi chay iskay musukunaqa hurqumurqaku Rahabta, tayta-mamanta, turi-ñañankunata hinaspa paykunawan lliw kaqkunata. Llapallan ayllunkunata hurqumuspankumá+ Israelpa mirayninkunamanta huklawman pusarqaku allinlla kanankupaq.
24 Chaymantam llaqtapi tukuy ima kaqkunatapas qalaypaqta kañaykurqaku. Quri-qullqita hinaspa broncemantawan fierromanta tukuy ima kaqkunatam ichaqa Jehova Diospa kapuqninkuna churana wasiman aparqaku.+
25 Rahabta, taytanpa ayllunta hinaspa paykunawan lliw kaqkunallatañam Josueyqa mana wañuchirqachu.+ Rahabqa Jerico llaqtata watiqanankupaq Josueypa kamachisqan runakunatam pakaykurqa,+ chaymi payqa kunankama Israelpa mirayninkunawan kuska yachachkan*.+
26 Chay kutipim Josueyqa nirqa*: “Jehova Diospa ñakasqanyá kachun kay Jerico llaqtata hatarichiq runaqa. Paypa piwi* churinmi wañunqa kay llaqtapa cimientonkunata churaptinqa. Punkunkunata churaptinñataqmi ñuñupaqwa churin wañunqa”, nispa.+
27 Jehova Diosqa Josueytam yanaparqa,+ hinaptinmi Josueyqa* tukuy hinastinpi ancha riqsisqa rikurirurqa.+
Willakuykuna
^ Hebreo rimaypiqa nichkan: “Dioswan pacto ruwasqanku baulta”, nispam.
^ Utaq: “Qullqipaq piwanpas kakuq”.
^ Utaq: “Tiyachkan”.
^ Ichapas kanman: “Josueyqa runakunatam kaynata rimarichirqa”, niqpas.
^ Utaq: “Punta naceq”.
^ Ichapas kanman: “Jehova Diosqa”, niqpas.
