Romanos 7:1-25
7 Wawqi-panillaykuna, ¿manachu yachankichik runa kawsachkaptillan Moisespa chaskisqan kamachikuykunaqa runapi munaychakusqanta? Kaytaqa nichkani kamachikuykunata riqsiqkunamanmi.
2 Kamachikuykunaman hinaqa qusan kawsanankamam casada warmiqa qusanwan casarasqa kachkan, qusan wañukuptinmi ichaqa qusanpa kamachikuyninmantaqa libreña tarikun.+
3 Chaymi qusan kawsachkaptinraq hukpa warmin karuspanqa “pierdekuq warmi” nispa sutichasqa kanman.+ Qusan wañukuptinmi ichaqa libreña qusanpa kamachikuyninmantaqa, hinaptinqa hukpa warmin karuspanqa manam hukwan pierdekuq warmichu.+
4 Chaynaqa wawqi-panillaykuna, Moisespa chaskisqan kamachikuykunata kasukuspaykichikqa casada warmi hinam karqankichik, Cristopa* wañukusqanwanmi* ichaqa libreña chaymantaqa kachkankichik.+ Chaynapi wañusqakunapa kasqanmanta kawsarichisqa Jesucristopaqña+ kanaykichikpaq hinaspa Diospa munayninta ruwananchikpaq.+
5 Aychapa munasqanman hina kawsaptinchikqa huchata ruwanapaq munaykunam cuerponchikta* tanqarqa wañuyman apaq kaqkunata ruwanapaq,+ chay munaykunatam Moisespa chaskisqan kamachikuykuna qawachirqa.
6 Kunanmi ichaqa Moisespa chaskisqan kamachikuykunamanta librasqaña karunchik+ kasukunapaq manaña kamachisqa kasqanchikrayku*. Kunanqa Diospa serviqninkunam kachkanchik atiyninwan+ yanapawasqanchikrayku, manam ñawpaq qillqasqa kamachikuykuna nisqanraykuchu.+
7 Hinaptinqa, ¿mana allinñachu* Moisespa chaskisqan kamachikuykunaqa rikurirun? ¡Manam! Moisespa chaskisqan kamachikuykuna mana kaptinqa hukchu hucha imam kasqantaqa riqsiyman karqa.+ Manachá hukpa kaqninta munapayay imam kasqantaqa yachaymanchu karqa “amam hukpa kaqtaqa imantapas munapayankichu” nispa Moisespa chaskisqan kamachikuypi mana niptinqa.+
8 Chay kamachikuy kasqanraykum hucha ima kasqanta yacharuni, riqsikunimá tukuy ima munapayaqllaña kasqayta. Chay kamachikuykuna mana kaptinqa manam hucha ima kasqanta yachaymanchu karqa.+
9 Moisespa chaskisqan kamachikuykunata manaraq riqsispayqa sumaq kawsakuy chaskiytam suyarqani, chay kamachikuykuna chayaramuptinmi ichaqa huchasapa kasqayta musyakuruni, chaymi sumaq kawsakuy suyasqayqa chinkarurqa.+
10 Hinaptinmi chayraq yacharurqani chay kamachikuyqa sumaq kawsakuyman+ apawananmantaqa wañuyman apawasqanta.
11 Chay kamachikuywanmi hucha ima kasqanta yacharurqani, huchayuq kasqayraykum imapas munapayasqaykunawan aysachikuspay wañusqa hinaña karqani.
12 Qawasqanchikman hinaqa Moisespa chaskisqan kamachikuykunaqa chuyam, chaypi kaq yachachikuykunapas chuyam, allin ruwayman hinam, hinaspapas allinpunim.+
13 Hinaptinqa, ¿Diospa allin kamachikuyninchu wañuyman apawaqniy rikurirun? ¡Amayá chayqa haykapipas kachunchu! Hucham wañuyman apawaqniyqa rikurirun.+ Diospa allin kamachikuyninwanmi huchaqa wañuyta chayarachimuwan hucha imam kasqanta yachanaypaq. Diospa kamachikuyninwanmi yachanchik huchaqa runakunapaq llumpay mana allin kasqanta.+
14 Yachasqanchikman hinapas Moisespa chaskisqan kamachikuykunaqa Diosmantam hamun, ñuqam ichaqa huchaman rantikusqa* pantaqllaña runa kani.+
15 Ñuqaqa manam entiendenichu imanasqa imapas ruwasqaytaqa. Ñuqaqa manam imapas ruway munasqaytaqa ruwanichu, aswanqa mana ruway munasqaytam ruwani.
16 Ñuqapaqqa allinmi Diospa kamachikuyninkunaqa, chaywanpas allin ruway munasqaytaqa manam ruwayta atiniraqchu.
17 Ichaqa manam ñuqachu mana ruway munasqaytaqa ruwani, aswanqa ñuqapi kaq hucham ruwachiwan.+
18 Ñuqaqa yachanim runalla kasqayta, aychaypiqa manam ima allinpas kanchu, ñuqaqa allin ruwaytam munachkani, ichaqa munaspaypas manam allin ruwaytaqa atinichu.+
19 Allin ruway munasqaytaqa manam ruwanichu, aswanqa mana ruway munasqay mana allin kaqkunallatam ruwani.
20 Chaynaqa, mana ruway munasqaytaqa manañam ñuqachu ruwani, aswanqa ñuqapi kaq hucham ruwachiwan.
21 Chaynaqa, kamachiwachkanmanpas hinam allin kaqta ruwayta munaptiypas mana allin kaqta ruway munay ñuqapi kachkan.+
22 Chiqaptapunim Diospa kamachikuyninkunamantaqa sunquypi kusikuni.+
23 Ichaqa yachanim kamachiwachkanmanpas hina cuerpoypi mana allin kaqta ruway munay ñuqapi kasqanta+ chaynataq chay mana allin munasqay allin kaqta ruway munasqaywan peleachkaq hina kasqanta.+ Chay kamachiwaqniy hinaqa cuerpoypi kaq hucham, chaymi mana allinta ruwanaypaq aysakachawan*.
24 ¡Imapiraq rikukullani! ¿Pitaq wañuyman apawaqniy cuerpoymanta libraykullawanman?
25 ¡Diosmanyá gracias kachun! Payqa señorninchik Jesucristowanmi libraykuwanqa. Chaynaqa, yuyayniyqa Diospa kamachikuyninkunapa nisqanman hinam* kachkan, aychaypa munasqanñataqmi huchapa kamachisqan* kachkan.+
Willakuykuna
^ Utaq: “Diospa akllasqanpa”.
^ Griego rimaypiqa nichkan: “Cuerponwanmi”, nispam.
^ Griego rimaypiqa nichkan: “Cuerponchikpa partenkunata”, nispam.
^ Griego rimaypiqa nichkan: “Hapiwaqninchik kaqpaq wañurusqanchikrayku”, nispam.
^ Utaq: “Huchachu”.
^ Utaq: “Vendesqa”.
^ Utaq: “Controlawan”.
^ Utaq: “Serviqninmi”.
^ Utaq: “Serviqnin”.
