Salmos 64:1-10
-
Mana allin ruwaqkunapa tantiasqanmanta harkaykusqanmanta
-
“Diosmi paykunataqa flecharunqa” (7)
-
Takiqkunata yachachiqpaq.Davidpa takisqan.
64 Diosnilláy, qayakamusqaytayá uyariykullaway.+
Chiqniwaqniykuna mana imanawananpaqyá harkaykullaway.
2 Mana allin ruwaqkunapa tantiasqanmantayá harkaykullaway.+
Achkallaña mana allin runakunamantayá harkaykullaway.
3 Qallunkupas kuchukuq espada hinam.
Mana allin rimasqankupas flechakuna hinam.
4 Mana allin rimasqankuwanmi pakakusqankumanta mana huchayuq runakunata flechanku.
Mana manchakuspankum qunqaymanta flechanku.
5 Mana allin tantiasqankupim hapipakunku.
Tuqllakunata churanankupaqmi rimanakunku.
Ninkum: “Kay tuqllakunataqa manam pipas rikunqachu”, nispa.+
6 Mana allinta ruwanankupaqmi tantianku.
Runata imaynata pantarachinankupaqmi pakallapi tantianakunku.+
Sunqunkupi imam tantiasqankutaqa manam yachachwanchu.
7 Diosmi paykunataqa flecharunqa.+
Paykunataqa flecham qunqaymanta hapirunqa.
8 Rimasqallankum paykunataqa sasachanqa.+
Sasachakuypi kasqankuta rikuqkunaqa umankuta aywispam asipayanqaku.
9 Hinaptinmi llapallan runakuna mancharikunqaku.
Diospa ruwasqanmantam willakunqaku,imam ruwasqantam yachanqaku.+
10 Allin ruwaq runaqa Jehova Diosraykum kusikunqa, pay pakaykunanpaqmi kallpaykunqa*.+
Allin sunquyuqkunaqa kancharinqakum.
Willakuykuna
^ Utaq: “Raskiykunqa”.
