Warma kaspaymi aylluywan maytapas rispayku qawaq kani sachakunata, waytakunata hinaspa quchakunata, chayqa anchatam kusichiwan. Kuyanitaqmi animalkunatapas, maypipas allquchata utaq misichata rikuruspayqa marqakuruqmi kani. Chaymantapas llakikuqmi kani pipas animalchakunata ñakarichiptinqa, chaymi ñuqa hina piensaq runakunawan hukllawakurqani chaynapi animalchakunata defiendenaykupaq.

Chay runakunawan kuskam autoridadkunapa contranpi hatarispayku nirqaniku “amañayá pipas animalkunataqa wañuchichunchu nitaq qarantapas rantikuchunchu” nispayku, chayta nisqaykuraykum autoridadkunaqa achka kutita presocharuwarqaku.

Llakikurqanitaqmi runakuna imayna tarikusqanta qawaspaypas. Chaymi hukllawakururqani Amnistia Internacional hinaspa Greenpeace organizacionkunaman. Chaypim tukuy ima ruwasqankupi yanapakurqani, tukuytataqmi ruwarqani wakchakunapaqpas.

Imata ruwaspaypas manamá atirqanichu runakuna ñuqa hina piensanankupaqqa nitaq allin kaqkunata ruwanankupaqqa. Autoridadkunaqa imapas nisqaykutam wakillanta uyariwaqku, chayqa llumpaytam piñachiwaq.

Llakisqa kaspaymi Diospi hinaspa bibliapa ima nisqanpi piensayta qallaykurqani. Ñawpaqta Jehova Diospa testigonkuna bibliamanta yachachiwaptinqa manam kaqpaqpas hapiqchu kani. Chaymantam ichaqa sunqumanta yachayta munarqani.

Chaymi bibliata leeyta qallaykurqani, chayqa sunquytam tiyaykachirqa. Leesqaypiqa tarirurqanitaqmi animalkunata imayna uywanamantapas, huknin tarisqaymi Proverbios 12:10 chaypim nin: ‘Allin ruwaq runaqa nanachikunmi animalninkunamanta’, nispa (Chuya Qellqa, CQ). Yacharurqanitaqmi sasachakuykunapi kasqanchikmanta Dios mana huchayuq kasqanmanta, aswanqa Diosmanta karunchakurusqankurayku runakunaqa sasachakuypi tarikusqankumanta. Yacharurqanitaqmi Diosqa kuyakuq hinaspa pacienciakuq kasqanmantapas, chaywanmi hawka tarikurqani (Salmos 103:8-14, CQ).

Huk kutipim Imatapunim bibliaqa yachachin niq qillqata mañakurqani. Chaymantam Jehova Diospa testigonkuna yachachiwarqaku, chaymantapas huñunakuyninkuman riytam qallaykurqani. Bibliamanta yachasqaykunaqa sunquymanmá chayaruwarqa.

Bibliapa nisqanmi yanapawarqa cigarrota manaña pitanaypaq, manaña sinkakunaypaq, manaña qacha simi kanaypaq, allinta allichakunaypaq hinaspa autoridadkunata respetanaypaq (Romanos 13:1). Warmikunawanpas manañam hukwan-hukwanñachu kakurqani.

Ñuqapaqqa aswan sasaraqmi karqa hukllawakusqay runakunata saqiyqa. Ñawpaqtaqa piensarqanim paykunapa ruwasqanku allin kasqanta, chaymantam ichaqa yacharurqani Diospa kamachikuynillan ima sasachakuytapas allichananmanta. Chaymi kallpanchakurqani Diosmanta runakunaman willakunaypaq hinaspa yachachinaypaq (Mateo 6:33).

Ñawpaqtaqa ñuqapaqqa allin runakunawan mana allin runakunallam karqa, chaymi mana allin runakunataqa chiqniq kani. Bibliamanta yacharuspaymi ichaqa runamasiytaqa manaña chiqninichu, aswanqa kallpanchakunim paykunata kuyanaypaq (Mateo 5:44). Runakunata kuyasqanraykutaqmi hamuq tiempopi Diosninchik imakunata ruwananmanta willani. Chaymantapas kusisqam tarikuni runamasinchikkuna Jehova Diosmanta yachaspanku hawka tarikusqankuta qawaspay.

Kunanqa ima sasachakuy kaptinpas Diospa makinpim saqini, chayta ruwaspaymi hawka tarikuni. Chaymantapas yachanim Dioslla runakunapa sasachakuyninta allichananmanta, hinaspapas animalkuna ñakarichisqa kanantaqa manam saqinqañachu. Manataqmi saqinqachu allpanchikta qalaypaqta chinkachinankutapas. Payqa churinwanmá allichanqa runakunapa mana allin ruwasqankuta (Isaias 11:1-9, CQ). Kusisqamá tarikuni Jehova Diosta riqsisqaymanta hinaspa paymanta runamasiykunaman yachachispay.