DIOSTA Salomon qepancharuptinmi Jehová Diospa nisqanman hina Israelqa iskayman rakikururqa. Rantinpim Roboanña kamachirqa, llaqtanta llumpayta ñakarichiptinmi norte lawpi 10 ayllukuna rakikurqaku. Jerusalenpi Davidpa kamachiyninta respetaq iskay ayllukunañataqmi sur law Judapi karqaku.

Kamachiqninkuna mana kasukuq hinaspa mana iñiyniyoq kasqankuraykum, norte lawpi chaynataq sur lawpi ayllukunaqa mana hawkachu kawsarqaku. Norte lawpi ayllukunam astawan huchallikurqaku kamachiqninkuna taytacha-mamachakunata yupaychayta qallaykusqankurayku. Diosmi kacharqa willakuq Eliastawan Eliseota, wakin wañuqkunata kawsarichiptinkupas runakunaqa manam kasurqakuchu. Hinaptinmi Dios saqerqa Asiria runakuna puchukachinanpaq.

Pachak wata masnin pasaruptinmi, sur lawpi Juda naciontapas Dios castigarqa. Profetankunam reykunaman willakurqaku, ichaqa wakillanmi kasukuspanku llaqtata yanapanankupaq kallpanchakurqaku. Rey Josiasmi taytacha-mamachakunata chinkachinanpaq tantearurqa, hinaspapas Jehová Diospa templontam allicharqa. Hinaptinmi Moisespa chaskisqan Leykunata tarirurqaku. Chaymi Josiasqa astawanraq kallpanchakurqa taytacha-mamachakunata chinkachinanpaq.

Ichaqa Josiasmanta qatiqnin reykunaqa manam pay hinachu karqaku. Chaymi Diosqa saqerqa Juda nacionta Babilonia runakuna dueñochakuspan Jerusalentawan templota puchukachinankupaq. Mana wañuqkunatañataqmi Babiloniaman aparqaku, hinaptinmi Dios nirqa 70 watamanta kutimunankupaq. Chaykamam Juda llaqtaqa purmachisqa kanan karqa.

Prometesqa Rey otaq Mesias hamunankamam, Davidpa mayqan mirayninpas mana kamachirqachu. Davidpa mirayninmanta kaq yaqa llapallan reykunam rurasqankuwan qawachirqaku, runakunaqa kamachinakuyta mana atisqankuta. Arí, Mesiasllam kamachiytaqa atinqa. Chaymi tukuynin reyta Dios nirqa: ‘Coronaykipas [. . .] manam hukpañachu kanqa kamachikunanpaq derechoyoq runapa hamunankama hinaptinmi paymanña qosaq’, nispa (Ezequiel 21:26, 27).

(1 Reyes; 2 Reyes; 2 Cronicas 10-36; Jeremias 25:8-11.)