DIOSPA serviqninkuna, ¿atinmankuchu hinalla Diosman sonqo kayta yanqapaq hina rikchakuptinpas? Job sutiyoq runam chayna sasachakuypi tarikurqa. Qawasun imapim tukurqa.

Jobqa Abrahampa ayllunmi karqa, israelitakuna Egiptopi kachkaptinkum payqa kunan Arabia nacionpa kasqan lawpi yacharqa. Huk punchawmi, Jehová Diosqa angelninkunawan hanaq pachapi huñunakurqaku hinaspam Jobmanta rimarqaku. Satanaspas chaypim tarikurqa. Diosqa llapankupa qayllanpim Jobta alabarqa Payman sonqo kasqanmanta, chaywanmi qawachirqa Jobpi anchata confiasqanta. Satanasmi ichaqa Jobta nirqa tukuy kapuqninta Dios qoptillan chaynataq cuidasqanraykulla servisqanta. Nirqataqmi lliw kapuqninkuna manaña kaptinqa, Diosta ñakananmanta.

Diosmi saqerqa, Jobpa kapuqninkunatawan churinkunata Diablo chinkarachinanta hinaspa onqoywanpas hapirachinanta. Jobqa manam yacharqachu tukuy chaykunata Satanas rurasqantaqa, chaymi mana entienderqachu imanasqa Dios saqesqanta. Chaywanpas manam haykapipas Diostaqa qepancharqachu.

Hinaptinmi Jobta watukurqaku amistadnin tukuq kimsa runakuna hinaspam qaqcharqaku. Yaqa llapanpim Job libropi rikurin paykunapa rimasqanku, chaywanmi creechiyta munarqaku pakasqa huchanmanta Dios castigasqanta. ¡Chayqa hatun llullamá karqa! Nirqakuraqmi serviqninkunamantaqa Dios mana interesakusqanta nitaq confiasqantapas. Jobmi ichaqa yanqa rimasqankuta mana kasukurqachu hinaspam nirqa wañukunankama Diosman sonqo kananta.

Chaywanpas kikinpi llumpayta piensaspanmi Jobqa pantarurqa. Eliu mozom rimasqankuta uyarichkarqa, hinaspam corregirqa kikillanpi piensaspan Jehová Diosta mana hatunchasqanmanta. Qaqcharqataqmi amistadnin tukuqkunatapas.

Chaymantapas, kikin Jehová Diosmi Jobta corregirqa. Admirakuypaq unanchasqankunata servichikuspanmi Jobta qawachirqa, runaqa Diosman mana igualay atiq kasqanta. Jobqa humilde kaspanmi pantasqanta reqsikurqa. Jehová Diosqa ‘kuyapayakuq hinaspa llakipayakuq’ kaspanmi sanoyaykachirqa, hinaspam bendecirqa ñawpaq kapuqninkunamantapas huk chaynawanraq; yapamantam chunka churiyoqraq karqa (Santiago 5:11). Jehová Diosta Job mana qepanchasqanmi qawachin runakunaqa ancha sasachakuypi tarikuspankupas Diosman sonqo kay atisqankuta.

(Job libromanta.)