5 KAQ YACHACHIKUY
¿Imatam Dios munan Allpa pachapaq?
1. ¿Imapaqtaq Diosqa unancharqa kay Pachata?
Kay Pachatam Diosqa unancharqa chaypi kawsananchikpaq. Diosqa manam hanaq pachapi kawsanankupaqchu Adantawan Evataqa unancharqa. Angelkunatam ichaqa hanaq pachapi kawsanankupaq unancharqa (Job 38:4, 7). Eden sutiyoq huertapim Adantaqa churarqa (Genesis 2:15-17). Diosqa munarqataqmi Adanwan mirayninkunapas kay Pachapi wiñaypaq kusisqa kawsanankuta. Leey Salmo 37:29; 115:16.
Eden huertaqa huk hawaqllapim karqa. Enteron Allpa pachatam Adanwan Evaqa mirayninkunawan huntachinanku karqa (Genesis 1:28). Allpa pachaqa wiñaypaq kawsananchikpaqmi, manam haykapipas chinkachisqachu otaq puchukachisqachu kanqa. Leey Salmo 104:5.
Qaway “¿Imapaqtaq Diosqa kay allpa pachata unancharqa?” niq videota.
2. ¿Imanasqataq Allpa pachaqa manaña sumaq huertachu?
Diosta mana kasukusqankuwanmi Adanwan Evaqa Eden huertamanta qarqorachikurqaku. Chaymi chay sumaq huertaqa manaña karqachu, manam pipas chaynapiqa kawsarqañachu. Bibliapa nisqanman hinam: ‘Diosqa mana allin ruraqkunapa makinman kay pachataqa churarun’ (Job 9:24). Leey Genesis 3:23, 24.
Chaynaqa, ¿manañachu Jehová Diosqa cumplinqa kay Pachapaq munasqanta? Tukuy atiyniyoq kasqanraykum cumplinqapuni, haykapipas mana fracazaqmi payqa (Isaias 45:18) Munayninta cumplisqanwanmi runakunaqa qallariypi hina wiñaypaq kawsanqaku. Leey Salmo 37:11, 34.
3. ¿Imaynatam kay pachaqa huertayanqa?
Diospa Gobiernonwanmi Jesusqa Allpa pachata huertayachinqa. Jesusqa angelkunapiwanmi Armagedonwan sutichasqa guerranpi Diospa enemigonkunata wañuchinqa. Chaymantam Satanasta waranqa watapaq presochanqa. Diosta serviqkunaqa librasqam kanqaku chay guerramanta, Jesusmi paykunata amparaykunqa hinaptinmi sumaq huertayasqa Allpapiña kawsanqaku. Leey Apocalipsis 20:1-3; 21:3, 4.
4. ¿Haykapitaq ñakariykunaqa tukunqa?
¿Haykapim mana allin ruraqkunata Diosqa chinkachinqa? Jesusmi chaymanta cuentata qokunapaq willarqa. Allpantinpi tukuy ima pasasqanmi runapa vidanta peligropi churachkan, chaymi tukupay tiempopiña kasqanchikta sutillata qawachin. Leey Mateo 24:3, 7-14, 21, 22.
Hanaq pachamanta Allpa pachata waranqa wata kamachimusqanwanmi Jesusqa imawanpas ñakarisqanchikkunata chinkachinqa (Isaias 9:6, 7; 11:9). Kamachiq Rey kaspanpas sacerdotekunapa jefen kasqanraykum Dios serviqkunapa huchanta chuyanchanqa. Chaynapim Diosqa chinkachinqa onqoyta, machu-payayayta hinaspa wañuytapas. Leey Isaias 25:8; 33:24.
5. ¿Pikunataq sumaq Allpa pachapi kawsanqaku?
Huñunakuyman rispaykiqa reqsinkim tukuy sonqonkuwan Diospa munaynin ruraqkunata
Diosta kasukuqkunaqa chay sumaq Allpa pachapim kawsanqaku (1 Juan 2:17). Jesusqa discipulonkunatam kamachirqa Diospa favornin tariy munaq llampu sonqo runakunata yanapanankupaq. Sumaq Allpa pachapi kawsanankupaqmi Jehová Diosqa wara-waranqantin runakunata kunanpuni yachachichkan (Sofonias 2:3). Huñunakuna Salonpi Jehová Diospa testigonkunawan huñunakuqkunaqa yachankum Bibliapa yachachikuyninkunawan allin warmi kayta allin qosa kayta chaynataq allin tayta-mama kaytapas. Leey Miqueas 4:1-4.
