7 KAQ YACHACHIKUY
¿Imataq Diospa munaychakusqanqa?
1. ¿Imataq Diospa munaychakusqanqa?
¿Imanasqam Jesusqa allin kamachiq kanqa? (MARCOS 1:40-42.)
Hanaq pachapi hatarichisqan gobiernonmi, chay gobiernom kay pachapi gobiernokunata chaylla chinkachinqa hinaptinmi Diospa munaynin rurakunqa kay Pachapipas hanaq pachapi hina. Diosman sonqo kaq runakunatam Allpantinpi huk sonqollata kawsachinqa. ¿Kusikuypaqmi kay noticiaqa, aw? Leey Daniel 2:44; Mateo 6:9, 10; 24:14.
Sapa gobiernopam kamachiqnin kan, Jehová Diospas Churin Jesucristotam Rey kananpaq Gobiernonpi churarun. Leey Apocalipsis 11:15.
Qaway “¿Imataq Diospa munaychakuyninqa?” niq videota.
2. ¿Imaynanpitaq Jesusqa allintapuni gobiernanqa?
Diospa Churinqa allin gobiernaqmi kuyapayakuq hinaspa allin ruraq kasqanrayku (Mateo 11:28-30). Atiyniyoqtaqmi runakunata yanapananpaq hanaq pachamanta kamachimusqanrayku. Kawsarimusqan qepatam payqa hanaq pachaman kutirqa, chaypim Diospa alleqninpi suyachkarqa kamachikuyta qallarinankama (Hebreos 10:12, 13). Diosmantam atiyta chaskirunña, chaymi hanaq pachamanta kay Pachata gobiernamunqa. Leey Daniel 7:13, 14.
3. ¿Pikunawantaq Jesusqa kamachimunqa?
Diosman sonqo akllasqa kaqkunawanmi Jesusqa gobiernanqa. Paykunamantam Biblia nin: ‘Diospaq sapaqchasqa kaqkuna’, nispa (Daniel 7:27). Jesuspa apostolninkunatam Diosqa puntata sapaqcharqa. Sapaqchasqa kanankupaqmi Jehová Diosqa qarikunatawan warmikunata hinallaraq akllachkan. Hanaq pachapi kawsanankupaqmi wañuspankuqa espiritu cuerpotaña Jesus hina chaskinku. Leey Juan 14:1-3; 1 Corintios 15:42-44.
¿Haykataq hanaq pachamanqa rinqaku? ‘Asllam’ (Lucas 12:32). Kay Pachatam Jesusqa gobiernanqa 144.000 akllasqakunallawan. Leey Apocalipsis 14:1.
4. ¿Imam pasarqa kamachinanpaq atiyta chaskiruptin?
1914 kaq watapim Jesusqa rey kananpaq nombrasqa karqa hinaptinmi Satanastawan supaykunatapas hanaq pachamanta chaylla wischumurqa. * Chaymi Diabloqa ancha rabiasqallaña sasachakuykunata Allpantinpi hatarichirqa (Apocalipsis 12:7-10, 12). Chay watamantapacham runakunaqa aswan sasachakuypi kachkanku. Guerrakuna, onqoykuna, terremotokuna, muchuykuna kasqanmi qawachin Diospa Gobiernonqa kamachinanpaqña kasqanta. Leey Lucas 21:7, 10, 11, 31.
5. ¿Imakunatam Jesusqa gobiernonpi ruranqa?
Diosmanta Allpantinpi allin noticia willasqa kasqanwanmi chay gobiernoqa “achka-achkallaña” runakunata huñuchkan. Kaymi qawachin Diosman sonqo wara-waranqantin warmi-qarikuna Jesuspa kamachisqan kasqankuta. Paykunam salvakunqaku Diospa Gobiernon mana allin ruraqkunata chinkachiptin. Chaymi Jesusta kasukunanchik Diospa Gobiernonwan amparasqa kayta munaspaqa. Leey Apocalipsis 7:9, 14, 16, 17.
Jesusqa waranqa wata kamachisqanpim qallariypi runakunapaq Diospa munayninta cumplichinqa. Enteron Allpa pacham sumaq huertaman tikrachisqa kanqa. Chaymantam Jesusqa Kamachinanpaq autoridad chaskisqanta Taytanman kutichinqa (1 Corintios 15:24-26). ¿Munawaqchu chay Gobiernomanta pimanpas willayta? Leey Salmo 37:10 11, 29.
^ par. 6 1914 watamanta Bibliapa willakusqan imayna cumplikusqanmanta yachayta munaspaqa ¿Imamantam bibliaqa yachachiwanchik? niq libropi qaway willakuykuna niqpi 22 kaqta, 248-251 paginankunapi.
