22 YACHACHIKUY
¿Imaynatam Diosmanta sumaq willakuyta willakuwaq?
Bibliamanta imam kaqta yacharuspaqa ninkipaschá: “¡Lliw runakunam kaytaqa yachananku!”, nispa. Ichaqa manchapakunkipaschá yachasqaykimanta hukkunaman willaytaqa. Qatiqninpiyá yachaykusun mana manchakunaykipaq imakuna yanapasunaykimanta.
1. ¿Imaynatam riqsisqaykikunaman bibliamanta willawaq?
Jesuspa qatiqninkunam nirqaku: ‘Manam upallaymankuchu rikusqaykumantawan uyarisqaykumanta willakuytaqa’, nispanku (Hechos 4:20). Paykunaqa munarqakumá hukkunaman Diosmanta willakuyta. Qampas atiwaqmi aylluykikunaman hinaspa amistadnikikunaman kuyakuyllawan Diosmanta willakuytaqa (leey Colosenses 4:6).
Hukkunaman imaynata willakunaykipaq
-
Aylluykiman bibliamanta willayta munaspaykiqa niwaqmi: “Kay semanam kaymanta yacharqani”, nispa.
-
Amistadniki unquptinqa utaq llakisqa kaptinqa kallpanchanaykipaqmi bibliata leeykapuwaq.
-
Samasqayki punchawpi ima ruwasqaykimanta llamkaqmasikikuna tapusuptikiqa, willaykuy bibliapi hinaspa huñunakuykunapi ima yacharusqaykita.
-
Amistadnikikunaman yachaykachiy jw.org niqman yaykunankupaq.
-
Hukkunatapas niwaqmi bibliamanta yachachisuptiki kuska uyarinaykichikpaq. Utaq yachaykachiy jw.org nisqanpi mañakuptin paytapas yachaykachinankupaq.
2. ¿Imanasqataq ancha allin iñiqmasinchikkunawan Diosmanta willakuynikiqa?
Jesuspa qatiqninkunaqa manam riqsisqan runakunallamanchu willakurqaku. Paykunatam Jesusqa ‘iska-iskayta’ kamachirqa ‘llapallan llaqtakunaman’ rispa Diosmanta willakunankupaq (Lucas 10:1). Chayna kamachisqanmi yanaparqa achka runakunaman Diosmanta willakunankupaq. Chaymantapas Jesuspa qatiqninkunaqa kuska willakusqankuwanmi kusisqa tarikurqaku (Lucas 10:17). ¿Munawaqchu qampas iñiqmasinchikkunawan kuska Diosmanta willakuyta?
ASTAWAN YACHAYKUSUN
Yachaykusun Diosmanta mana manchakuspa kusisqa willakunaykipaq ima yanapasunaykimanta.
3. Jehova Diosmi yanapasunki
Wakinkuqa Diosmanta willakuyta munaspankupas manchakunkum runakuna mana uyarinankuta piensaspanku utaq asipayanankuta piensaspanku.
-
Qampas ¿manchakunkichu Diosmanta willakuyta icha manachu? ¿Imanasqa?
VIDEOTA qawaykuychik hinaspa qatiqninmanta rimariychik:
-
Video qawasqanchikpi musu-sipaskunataqa, ¿imataq yanaparqa mana manchakunankupaq?
Leeychik Isaias 41:10 hinaspa qatiqninmanta rimariychik:
-
¿Imanasqataq Diosta mañakunayki paymanta willakuyta manchakuspaykiqa?
Yachaykunaykipaq
Achka iñiqmasinchikkunam piensarqaku Diosmanta willakuyta mana haykapipas atinankumanta. Sergey sutiyuq runapas hukkunawan rimaytam llumpayta manchapakuq, chayna kaspanpas bibliatam estudiayta qallaykurqa. Paymi nin: “Chayna manchapakuq kaspaypas kallpanchakurqanim yachasqaymanta hukkunaman willakunaypaq. Chaywanmi ancha kusisqa tarikurqani, chayqa yanapawarqam bibliapi yachachikuykuna sunquypi astawan takyananpaq”, nispa.
4. Respetowanmi rimana
Diosmanta pimanpas manaraq willachkaspaykim puntata piensarinayki imamanta hinaspa imaynata willanaykipaq. Leeychik 2 Timoteo 2:24 hinaspa 1 Pedro 3:15, chaymantañataq qatiqninmanta rimariychik:
-
¿Imaynatam bibliapi chayna nisqanta kasukuchwan runakunaman bibliamanta yachachispa?
-
Aylluyki utaq amistadniki willasqaykita mana uyariyta munaptinqa ¿piñakunaykichu, qaqchanaykichu? ¿Imaynata rimanaykipaqtaq kallpanchakuwaq?
-
Bibliamanta yachachispa “kaynam utaq waknam” ninamantaqa, ¿imanasqataq aswan allin kuyakuywan hinaspa respetowan rimapayayqa?
5. Diosmanta willakuyqa kusichiwanchikmi
Jehova Diosmi Jesusta kamachirqa sumaq willakuymanta willakunanpaq. ¿Jesuspaqqa ima hinataq karqa Diosmanta willakuyqa? Leeychik Juan 4:34 hinaspa qatiqninmanta rimariychik:
-
Allinta mikuspaqa kusisqam hinaspa sanom kawsakunchik. ¿Imanasqataq Jesus nirqa Diosmanta willakuyqa allin mikuyta mikuy hina kasqanmanta?
-
Diosmanta willakuyqa ¿yanapasunkimanchu kusisqa kawsakunaykipaq? ¿Ima niwaqtaq?
Kaykunata ruway
-
Diosmanta imaynata willakunapaq huñunakuypi yachachikuyta allinta uyariy chayman hina runakunaman yachachinaykipaq.
-
Yachachisuqnikiman niy allin yachachiq kanapaq huñunakuypi ñawpaqman lluqsispa rimariy munasqaykimanta, tapuytaq chaypaq imakunapi kallpanchakunaykimantapas. Chaypi imaynata yachachinaykipaq nisusqaykim yanapasunki mana manchakuspa Diosmanta rimanaykipaq.
-
Kay libropim tarinki “wakin runakunam ninku” chaynataq “wakin runakunam nisunkiman” niqta. Chayta leespayki piensariy imaynata runakunawan rimanaykipaq.
WAKIN RUNAKUNAM NISUNKIMAN: “¿Imaynataq kachkanki? ¿Kay punchawkuna imatataq ruwarqanki?”, nispanku.
-
Chaynata tapusuptikiqa ¿ima nispataq bibliamanta willaykuwaq?
YUYARIYKUSUN
Kaypim yacharunchik Diosmanta willakuyqa anchata kusichiwasqanchikmanta. Yacharunchiktaqmi mana manchakuspa Diosmanta willakunapaq imakunapi kallpanchakunamanta.
¿Ima niwaqtaq?
-
¿Imanasqataq kallpanchakunayki Diosmanta runakunaman willakunaykipaq?
-
¿Imaynatam respetowan Diosmanta willakuwaq?
-
¿Imataq yanapasunki mana manchakuspa Diosmanta willakunaykipaq?
ASTAWAN YACHANAYKIPAQ
Kaypi qaway jw.org tarjetachawan runakunaman imaynata willakunapaq.
Jw.org nisqaman yaykunapaq tarjetachata imayna servichikunamanta video (1:43)
Diosmanta sumaqta willakunaykipaqmi kay yachachikuyqa yanapasunki.
“¿Munawaqchu runakuna challwayta?” (Willakuq, septiembre 2020)
Warmallaraq kaspaykipas Diosmanta mana manchakuspa willakuytaqa atiwaqmi. Chaypaq kay videota qaway.
¿Imaynatam bibliamanta willawaq Jehova Diosta manaraq riqsiq aylluykikunaman? Chaypaq qatiqnin yachachikuyta leey.
“¿Imaynatam mana iñiq ayllunchikta yanapachwan Diospi iñinankupaq?” (Willakuq, 15 marzo 2014)
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
