Llumpay huchasapata hina chaqnaruspankum Jesustaqa Anasman pusarqaku. Anasqa Jesus warmallaraq kaptinmi sacerdotekunapa kamachiqnin karqa, chayna warmallaraqmi Jesusqa Diospa wasinpi kaspanpas Diosmanta yachachiqkunawan rimarqa (Lucas 2:42, 47). Anaspa wakin churinkunapas sacerdotekunapa kamachiqninmi karqaku, Jesusta presochasqanku punchawkunapim ichaqa Anaspa masan Caifasña sacerdotekunapa kamachiqninqa karqa.

Anaspa wasinpi Jesus kanankamam Caifasqa tukuy rikchaq autoridadkunata qayarachirqa, paykunaqa 71 runakunam karqaku. Chaypiqa karqam sacerdotekunapa kamachiqnin hinaspa ñawpaqta sacerdotekunapa kamachiqninkunapas.

Anasmi Jesusta tapurqa “qatiqninkunamanta hinaspa ima yachachisqanmantapas”. Jesusñataqmi nirqa: ‘Ñuqaqa lliwpa qayllanpim rimarqani. Ñuqaqa sapa kutim yachachirqani yupaychana wasipi hinaspa templopi, chaypim lliw judiokuna huñunakuqku. Manamá imatapas pakallapiqa rimarqanichu. ¿Imanasqamá tapuwankiqa? Tapuychikyá uyariqniykunata. Paykunam yachan imam nisqayta’, nispa (Juan 18:19-21).

Hinaptinmi chaypi sayaq huknin guardia laqichuruspan nirqa: “¿Chaynatachu ninki riqsisqa sacerdoteta?”, nispa. Jesusqa allinllata rimasqanraykum nirqa: “Mana allinta rimaruptiyqa, niway imata mana allinta ruwarusqayta. Ichaqa nisqay allin kaptinqa, ¿imanasqamá maqawankiqa?”,  nispa (Juan 18:22, 23). Chaymantam Anasqa masan Caifaspa wasinman Jesusta pusachirqa.

Chaykamaqa Caifaspa wasinpiñam tukuy rikchaq autoridadkunaqa kachkarqaku. Leyninkupim nirqa pascua tutapiqa pipas mana juzgasqa kananmanta, ichaqa chayna nisqanta mana kasukuspankum Jesusta chay tuta juzgarqaku.

Chayna juzgasqankuqa manam allinchu karqa. Paykunaqa Lazarota kawsarichisqanmantapacham Jesusta wañuchinankupaqqa tantearurqakuña (Juan 11:47-53). Religionkunapi punta apaqkunapas tantearurqakuñam Jesusta wañurachinankupaqqa (Mateo 26:3, 4). Chaymi Jesusta juzgasqankuqa yanqallaña karqa.

Chay runakunaqa leyninkupa nisqanta mana kasukuspam huñunakurqaku, chaymantapas mana allin llulla runakunatam maskarqaku Jesusta yanqakunamanta tumpanankupaq. Achkallañam Jesuspa contranpi hukta-hukta yanqakunata rimarqaku. Chaymantam iskay runakuna Jesuspa contranpi rimaspanku nirqaku: “Uyarirqanikum: ‘Runapa ruwasqan kay templotam ñuqa tuñirachisaq, hinaspam mana runapa ruwasqanta kimsa punchawllapi hukta hatarirachisaq’ nisqanta”, nispa (Marcos 14:58). Chay runakunapa willakusqankupas manam tuparqachu.

Caifasñataqmi Jesusta tapurqa: “¿Manachu imallatapas rimarinki? ¿Imatataq kaykunaqa contraykipi rimachkanku?”, nispa (Marcos 14:60). Jesusqa manam imatapas nirqachu chay runakunapa rimasqanmantaqa. Chaymi Caifasqa yanqamanta tumpanankupaq hukmanpataña tapurqa.

Caifasqa yacharqam “Diospa churinmi kani” nispa pipas niptinqa judiokuna llumpayta piñakusqankumanta. Unayñam judiokunaqa Jesusta wañurachiyta munarqaku “Diosqa taytaymi” nisqanrayku, paykunaqa tumparqakum ‘Dios hina kayta’ munasqanmanta (Juan 5:17, 18; 10:31-39). Chayta yachaspanmi Caifasqa yanqamanta tumpanankupaq Jesusta nirqa: “Kawsaq Diosrayku juray chiqaptapuni rimanaykipaq: Niykuwaykuyá, ¿qamchu kachkanki Diospa churin Cristo?”, nispa (Mateo 26:63). Jesusqa achka kutipim nirqa Diospa churin kasqanmanta (Juan 3:18; 5:25; 11:4). Upallakuykuspanqa negakuchkanmanchá karqa Diospa churin kasqanta chaynataq Diospa akllasqan kasqantapas. Chaymi Jesusqa nirqa: “Arí, ñuqam kachkani, qamkunaqa runapa churintam rikunkichik atiyniyuqpa alliqninpi tiyachkaqta hinaspa cielopi puyukunawan hamuchkaqta”, nispa (Marcos 14:62).

Chayna nisqanta uyariruspanmi Caifasqa pachantapas llikispanraq nirqa: “Diospa contranpim mana allinkunata rimarun. ¿Imapaqraqtaq testigokunataqa munanchik? Kayqaya uyarirunkichikña mana allinkuna rimasqanta. ¿Ima ninkichiktaq?”, nispa. Hinaptinmi lliw autoridadkuna nirqaku: “¡Wañunanmi!”, nispanku (Mateo 26:65, 66).

Hinaspam Jesusta asipayaspanku takaparqaku hinaspa uyanpi tuqaspa laqichurqaku. Uyanta taparuspankuñataqmi kaqmanta takaparqaku, hinaspam asikuspa nirqaku: “Niwaykuyá: ¿Pitaq maqasuchkanki?”, nispa (Lucas 22:64). Chaynatam Diospa churin Jesusqa ñakarillarqa yanqakunamanta tumpaspa tutapi juzgaptinku.