APOCALIPSIS sutichasqa libropi kaq wakin willakuykunaqa tupanachiykunapiwan rikchanachiykunawanmi qellqakurqa. Ejemplopaq, willawanchikmi huk chuchumika warmipa urkunpi “Hatun Babilonia” nispa qellqasqa kasqanmanta. Willawanchiktaqmi ‘achka yakukunapa’ hawanpi tiyasqantapas (Apocalipsis 17:1, 5, 15). Manam chay ruraytaqa atinmanchu aychayoq tulluyoq cheqap warmiqa, chaymi “Hatun Babilonia” nisqaqa huk tupanachiylla. ¿Imamantaq rikchakun?

 Apocalipsis 17:18 nisqapim willakun “Hatun Babilonia” ‘kay pachapi reykuna kamachiq hatu-hatun llaqta’ kasqanta. “Llaqta” nisqan palabraqa huñulla kaq achkallaña runakunapim piensarichiwanchik. Hina kay ‘hatu-hatun llaqtataqmi’ ‘kay pachapi reykunata’ munaychakun. Chaynaqa allpantinpi munaychakuq hatu-hatun llaqtamanmi rikchakun Hatun Babilonia nisqaqa. ¿Imayna kaq llaqtataq? Chay llaqtaqa Allpantinpi munaychakuq religionkunam. Qawarisun imaynatam Apocalipsis libropi willakusqan yanapawanchik chayna kasqanta yachananchikpaq.

Kay pachapi atiyniyoq munaychakuqqa kanman allpantinpi kaq kamachikuqkunam, allpantinpi kaq hatun negociantekunam otaq allpantinpi kaq religionkunapas. Hatun Babiloniaqa manam allpantinpi kaq kamachikuqkunachu kanman, Diospa Palabranqa ninmi “kay pachapi reykunam [llapallan kamachikuqkunam] paywan huchapakurqaku”, nispa. Kay pachapi llapallan kamachikuqkunawan huchapakusqanmi rikchakun paykunawan hukllawakusqanta. Chayraykum Hatun Babiloniataqa sutichakun “chuchumika warmi” nispa (Apocalipsis 17:1, 2; Santiago 4:4).

Bibliam willawanchik kay chuchumika warmi puchukachisqa kaptin hatu-hatun llakiwan “kay pachapi negociantekunapas” waqanankumanta. Chaynaqa manataqmi allpantinpi kaq negociantekunachu Hatun Babilonia nisqaqa. Bibliapa textonkunam qawachiwanchik imaynam puchukachisqa kaptin kay pachapi reykunapas hinaspa negociantekunapas “karullamanta” qawarayanqaku (Apocalipsis 18:3, 9, 10, 15-17). Chaynaqa manamá Hatun Babiloniaqa allpantinpi kaq kamachikuqkunachu nitaq allpantinpi kaq negociantekunachu, aswanqa enteron pachapi munaychakuq religionkunam.

Allpantinpi munaychakuq religionkuna kasqantataqmi yachanchik llapallan nacionkunata ‘layqakusqanwan’ engañasqanpi (Apocalipsis 18:23). Espiritismoqa religionmi demoniokuna kallpanchasqankurayku. Chaymi mana admirakuypaqchu Hatun Babilonia nisqata ‘demoniokunapa yachanan’ nispa Biblia niptinqa (Apocalipsis 18:2; Deuteronomio 18:10-12). Chaymantapas kay Hatun Babiloniaqa cheqap cristianokunapa contranpim churakun; arí, ‘Diosmanta willakuqkunatawan’ ‘Diosllapaqña kawsaqkunatam’ qatikachan (Apocalipsis 18:24). Cheqap cristianokunatam llumpayta cheqnikun, chaymi ‘Jesusmanta willakuqkunata’ llumpayta qatikachan hinaspapas wañuchinmi (Apocalipsis 17:6). Chaynaqa Hatun Babiloniaqa allpantinpi kaq llapallan tukuy rikchaq pantay munaychakuq religionkunam.