2010 wata abril killapim, lamar qocha ukupi petroleo horqonanku lawpi, yaqa kimsa killapuni lamar qochaman achka-achka petroleowan gas usururqa. Iskay killa parten pasaruptinmi, chay pasakusqanta estudiaqkuna nirqaku petroleo ususqanwan yakuta qachachaqqa manaña kasqanmanta. Piensankutaqmi mana rikuy atina uruchakuna chay yaku qachachaqta chinkarachisqanta. Ichaqa wakinkum mana creenkuchu, piensankum petroleoqa lamar qochapa uku pampanman tiyarusqanta.

Rusia nacionpi runakunata 18-35 watayoqkunata tapuptinkum, llapallankumanta yaqa wakiqnin nirqaku: “Tukuy imayoq otaq reqsisqa kanapaqqa imayna kawsanapaq yachachisqa kasqaykita hinaspa allinta ruwaspa kawsakuytam qepanchanayki”, nispa. Chaytam willakun Rossiiskaya Gazeta sutiyoq periodico.

Una-unay wataña churasqa kaspantin sarata tarisqankum (hanaypi rikurisqanman hina) qawachin, kay nacionpa norte lawninpi runakunaqa 3.000 wata ñawpaqtaraq saramanta harinata hinaspa hamkata mikusqankuta.

Adria-Rovigo lawmanta Lucio Soravito De Franceschi obispom piensan, Diosmanta willakuyqa runakunapa yachasqan lawman rispa paykunawan rimanapaq kasqanta. Ninmi: “Runakunata yanapanapaqqa wasinkupa punkuntam tocana iglesiapa campanankunata tocanamantaqa”, nispa.

Rinoceronte animalpa waqrantam hampipaq pakasqallata rantikunku, chayraykum kunanqa huk kilolla cuestan 65.000 dolar qollqe. 2011 watapim Sudáfrica lawllapi 448 rinoceronte animalkunata wañurachirqaku, manam haykapipas chaynataqa wañuchirqakuchu. Chaymantapas autoridadkunapa rantikusqanku lawman hinaspa museokunamanmi suwakuna yaykurqaku rinocerontepa waqranta maskaspanku. Chay animalkunata cuidana sitiokunapipas manachusmi librechu kachkanku suwakuna yaykurunanmantaqa.