¿Imanasqataq tukuy chaykunamanta yachayta munarqanki?

Taytaymi ingeniero karqa hinaspam sapa kuti willawaq matematicamanta hinaspa huk yachachiykunamantapas. Yacharqanikum New Paris, Ohio (Estados Unidos) lawpi, chaypim karqa taksa mayukunawan qochakunapas. Warmacha kasqaymantam admirachiwaq wasiypa muyuriqninpi plantakuna hinaspa animalkuna qawasqay. Chaymi tantearurqani Purdue Universidadpi chaykunamanta estudianaypaq.

¿Warma kasqaykimantachu religionniyoq kayta munarqanki?

Arí, familiaypiqa Martín Luteropa yachachisqanpi iñiqmi karqaniku, chaymi taytayqa religionniykumanta astawan yachanaypaq kallpanchawaq. Chaymantapas estudiarqanim griego rimayta, chay rimaypipas Bibliaqa qellqakurqam. Bibliataqa astawanmi chanincharqani.

¿Imatam piensarqanki imapas kikillanmantam rikurimun nisqa yachachikuymanta?

Religionniypiqa chay yachachikuy cierto kasqantam niqku, llamkaqmasiykunapas chaytam yachachiqku, chaymi ñoqapas chayna kasqanmanta mana iskayrayarqanichu. Ichaqa Diospipas creerqanitaqmi. Iskaynin yachachikuy tupasqantam piensarqani. Bibliata chaninchaspaypas manam Diospa Palabran kasqantaqa creerqanichu.

¿Imanasqataq mana chaynatañachu Bibliamantaqa piensanki?

Señoraymanwanmi watukamuwarqaku Stevewan Sandy, paykunaqa Jehova Diospa testigonmi. Yachaysapa runakuna Bibliata mana ruwaptinkupas, runapa yachay tarisqankuwan tupasqantam paykunaqa qawachiwarqaku. Bibliam nin: “Kay pachapa ruyrunpa altonpiraqmi [...] Diosqa tiyachkan”, nispa (Isaias 40:22). Nintaqmi: “Kay pachatam warkusqata hina churarqa  mana imapa hawanpi”, nispa (Job 26:7). Lliw kawsaqkunapa imayna yanapanakusqanta estudianaypaqmi hanaq pachamanta foto horqosqankuta servichikurqani, chaymi admirakurqani kay versiculokunamanta. Kayqa qellqasqañam karqa kay pacha mana imapa hawanpi kasqanta manaraq fotochkaptinku. Stevewan hinaspa Sandywan Bibliata estudiasqaykuman hinam yacharqani Bibliapi willakuykuna cumplikusqanta, allin consejonkuna hinaspa yachachikuykuna kasqanmantapas. Pisi-pisimantam seguroña karqani Bibliaqa Diospa Palabran kasqanta.

¿Haykapimantataq piensanki tukuy imapas unanchasqa kasqanta?

Tiempopa risqanman hinam Steveqa leepuwarqa Bibliapa kayna nisqanta: “Diosmi runata rurarqa ñutu allpamanta”, kayqa mana iskayrayanapaqmi karqa (Genesis 2:7). Bibliapiqa qellqasqam kachkan runapa imayna rikurisqan. Ichaqa tapukurqanim: ¿Runapa yachay tarisqanqa chayna kasqantachu qawachin?, nispa. Stevenmi chay yachachikuymanta estudianaypaq kallpanchawarqa, chaytamá ruwarqani.

¿Imatam yacharurqanki?

Tukuy imatam, imapas kikillanmanta rikurisqanta yachachiqkunaqa imaynanpatapas ninkum kawsaqkuna imayna rikurisqankumanta. Runakunapawan animalkunapaqa kanmi tukuy imankuna: sonqon, qaspannin hinaspa ñawinpas. Mana rikuy atina kaqkunapa ukunpipas kanmi admirakuypaq tukuy imakuna. ¿Imaynatam kaykunaqa rikurirqa? Imapas kikillanmanta rikurirusqanta yachachiqkunam ninku, llapanmanta kawsay atiqkunallapam imanpas tiempopa pasasqanman hina kikillankumanta rikurisqanta. Ichaqa hinallaraqmi tapuy kachkan: ¿Maymantataq rikurirurqa? Kay tapukuyta achkallaña yachaysapa runakuna mana contestay atisqankutam musyarurqani. Animalkunata estudiaq profesormi niwarqa kikillanmanta imapas rikurisqan yachachikuypi mana creesqanta, ichaqa manam chayna kasqantaqa willakunchu llamkayninmanta qarqorunankuta manchakuspan.

Estudiasqaykikunaqa, ¿yanapasurqankichu iñiynikipi?

Arí, llamkayniyqa karqa kawsaqkunapa imayna yanapanakusqanta estudiaymi. Lliw kay Pachapi kawsaqkunaqa necesitanakunkum. Piensay abejakunapiwan waytakunapi. Waytakunapa: colornin, asnaynin, miskin hinaspa rikchayninmi, ruwasqa kachkan abejakuna chayman rinanpaq hinaspa waytapa polvochanwan chapukunanpaq. Abejakunañataqmi kachkan waytakunapa miskinta soqonanpaq hinaspa polvochanta huk waytakunaman apananpaq, chaynapi plantakuna rurunanpaq. Tukuy chaykunam qawachin yanapanakunankupaq ruwasqa kasqankumanta.

Waranqantin plantakunapa, animalkunapa hinaspa rikuy atina otaq mana rikuy atina kaqkunapa kuska kasqankupim qawachinku imayna yanapanakusqankuta. Animalkunaqa plantakunamantam chaskinku mikuytawan wayrata, waytaq plantakunapas yaqa llapanmi animalchakunapa yanapakuyninta chaskinku. Chayna kawsasqankum admirakuypaq hina sasa entiendenapaq, sapakama chaylla chinkaruqman rikchakuspankupas atinmankum waranqantin watakuna hinalla kayta. Imapas qachachaqkuna yanqachaptinpas atinmankum kaqmanta allinyaruyta, chay yanqachaqninkuna chinkaruptinqa. Tukuy kaykunata qawaspaymi mana iskayrayanichu imapas kawsaqkunaqa Diospa unanchasqan kasqanmanta.

¿Imanasqataq Jehova Diospa testigon karurqanki?

Anchatam llakichiwaq kay Pachapi tukuy imatapas runakuna yanqachasqankuta qawasqay. Yacharqanim plantakuna, animalkuna hinaspa rikuy atina otaq mana rikuy atina kaqkunapa kuska kasqankuqa, mana chaylla chinkarunanpaq hina kaspanpas chinkaruy atisqankuta. Ichaqa Jehova Diospa testigonkunam Bibliawan qawachiwarqa ‘kay Pacha chinkachiqkunata’ Dios chinkachinanmanta (Apocalipsis 11:18). Chayqa ñoqapaqmi ancha allin karqa. Hinaspam tiempopa risqanman hina entienderqani Bibliapa nisqanqa confianapaq kasqanta.

Anchatam gustawan yachasqaymanta rimayqa, chaymi yachaysapa runakunamanpas Bibliamanta yachachirqani. 55 wataypim jubilakurqani astawan tiempochakuspay Unanchawaqninchikmanta hinaspa kay Pachapaq ima ruwananmanta runakunaman yachachinaypaq.