Killankuwan manaña onqospaqa sasachakunkum
50 watanpiña kaq Reynam * nin: “Qonqayllamantam sonqoypi llakisqa tarikuq kani. Waqay hapiwaptinmi piensaq kani locayasqaypaq”, nispa.
55 watanpiña kaq Anam nin: “Rikchariruptiymi wasiypi tukuy imaykunapas mana allichasqa kasqanpaq rikchakuwaq. Imapas maypi churasqaytam mana yuyaqchu kani. Imapas chaylla ruwayniykunatam manaña atiqchu kani, ichaqa manam yacharqanichu imanasqa chayna tarikusqaytaqa”, nispa.
KAY warmikunaqa manaña wawayoq kananku tiempomanmi chayachkanku, chayraykum chayna tarikunku manam imawanpas onqosqankuraykuchu. Chay tiempomanqa lliw warmikunam chayanku, chaytam sutichanku menopausia nispa. Ichapas chay tiempomanña chayachkanki otaq chay tiempopiña tarikunki. Chaynaqa killaykiwan manaña onqospayki imayna tarikusqaykimanta kikikipas chaynataq familiaykipas allinta yachaynikichikqa allinmi kanman. Imayna kasqanmanta allinta entiendespaqa atinkichikmi yanapanakuyta.
Killankuwan manaña onqospa sasachakusqankumanta
Yaqa lliw warmikunam killankuwan sasachakuyta qallarinku 40 otaq 50 watankumanta, wakinñataq 60 watankumanta. * Yaqa sapa kutim sapa killapi yawarninku sutun as-aschallataña. Wakinqa wakin killapim onqonku wakin killapiñataq mana. Wakinñataqmi mana sapa killa hinañachu otaq llumpayta yawarninku sutun. Wakin warmikunallam killankuwanqa mana musyayllata manaña onqonkuñachu.
Huk librom nin: “Killankuwan manaña onqoq warmikunaqa manam hina kaq sasachakuyllawanchu llapanku sasachakunku”, nispa. (Menopause Guidebook.) Chaymantapas ninmi: “Yaqa llapantam rupapakuy hapin chaymantañataq wakintaqa katkatatanankama chirin”, nispa. Chaywan puñuyta mana atispankum mana valorniyoq tarikunku. ¿Hayka watataq chaywan ñakarinku? Huk librom nin: “Wakin warmiqa rupapakunku otaq chiriwan hapichikunku watapi otaq iskay watapim iskay-kimsa kutillata. Wakinqa chaywanmi sasachakunku achka watakuna, wakinñataqmi yuyaqyanankukama”, nispa. * (The Menopause Book.)
Killankuwan manaña onqospaqa wakinpiqa sonqonkupi llakisqa otaq hukmanyasqa tarikusqankuwanmi imamantapas chaylla waqanku, wakinpiqa qonqay sonqoyarunkum. Ichaqa manam lliwchu chaynata sientekunku. Huk librom nin: “Killankuwan manaña onqospaqa manam lliwchu tukuywan sasachakunku”, nispa (The Menopause Book).
Imakunam yanapanman
Killankuwan manaña onqospa rupapakuywan sasachakusqankupim wakin warmikunata kaykuna yanapan: cigarrota manaña pitasqanku, tragota, cafeyta manaña tomasqanku, uchuta manaña mikusqanku otaq azucarmanta dulcekunata manaña mikusqanku, chaynataq alimentoyoq kaq mikuykunata mikusqankupas.
Ejerciciotapas ruwawaqmi, chayqa yanapasunki manam tulluykikuna allin kanallanpaqchu nitaq sano sientekunallaykipaqchu, yanapasunkim miskita puñunaykipaq chaynataq kusisqa kawsakunaykipaqpas. *
Imayna sientekusqaykimanta rimay
Qallariypi rimamusqanchik Reynam nin: “Manam upallallaqa ñakarinachu. Imayna sientekusqanchikmanta kuyasqa ayllunchikman otaq amistadninchikman willakuptinchikqa ima pasawasqanchikmanta yachaspankum entiendewasun”, nispa. Bibliapas ninmi: “Pipas kuyakuyniyoqqa pacienciakuqmi”, nispa (1 Corintios 13:4).
Jehova Diosta mañakuyninkupas achka warmikunatam kallpanchan wawayoq kayta manaña atisqankuwan hukmanyasqa kaptinkupas. Bibliam nin: “[Diosmi] kallpanchawanchik tukuy sasachakuyninchikpi”, nispa (2 Corintios 1:4). Killaykiwan manaña onqospayki sasachakuykunaqa pasaruqlla kasqanmanta yachasqaykim yanapasunki ima sasachakuytapas aguantanaykipaq. Hinalla saludnikita cuiday, hukman sientekusqayki pasaruptinqa allinñam sientekunki.
^ par. 2 Sutikunaqa cambiasqam kachkan.
^ par. 6 Huk wataña killankuwan manaña onqospa sasachakusqankutam doctorkuna sutichanku menopausia nispa.
^ par. 7 Wakinpiqa rupapakunku ima hampitapas tomasqankuraykum otaq imawanpas onqosqankuraykum. Chaymi wakin rupapakuyqa manam killankuwan manaña onqosqankuraykuchu.
^ par. 11 Wakin doctorkunaqa atiendesqan warmikuna llumpayta mana sasachakunankuraykum ninku hormona nisqankuta tomanankupaq, hawkalla kanankupaq hampikunata tomanankupaq otaq imakunata mikunankupaqpas. ¡Rikchariy! revistaqa manam ninchu ima hampita tomanankupaq otaq ima mikuyta mikunankupaqqa.
