“Qampa tukuy rurasqaykimantam rimallasaq. Atiynikiwan rurasqaykimantam yuyaymanasaq.” (Salmo 77:12)

IMATAM RUNAKUNA NINKU:

Imayna yuyaymananapaqqa achka clasem kan. Hukkunam Asia lawpi hina yuyaymananku. Huk qellqaq runam nirqa: “Imapipas allinta yuyaymananapaqqa manam imawanpas umanchikta intuchikunachu”, nispa. Chayna nisqanman hinam creenku, pipas yuyaymanananpaqqa mana imawan intuchikuspa huk asuntollapi piensanan chaynapi sonqonkupi hawka hinaspa iñisqankupi allin tarikunankupaq.

IMATAM BIBLIA NIN:

Yuyaymanay ancha allin kasqanmantam Bibliaqa yachachin (1 Timoteo 4:15). Cheqap yuyaymanayqa manam huk asuntollapi otaq ima palabrakunallapi piensaspa yuyaymanaychu. Bibliapa yachachisqanman hina yuyaymanayqa imam allinninchikpaq kaqkunapi yuyaymanaymi. Yuyaymanachwanmi Diospa sumay kayninkunapi, kamachisqankunapi otaq unanchasqankunapipas. Diosta serviq huk runam nirqa: “Llapa rurasqaykunapim yuyaymanani. Atiynikiwan rurasqaykikunapim piensani”, nispa (Salmo 143:5). Chaymantapas nirqam: “Camaypi waqtapaykuspaymi qanmanta yuyarini. Tukuy tutam ñoqallayqa qanmanta yuyaymanani”, nispa (Salmo 63:6).

“Contestananpaqmi sumaqta piensan allin kawsaq runaqa.” (Proverbios 15:28)

IMATAM BIBLIA NIN:

Yuyaymanaymanta Bibliapa yachachisqanqa cristiano vidanchikpi chuya sonqo kanapaqmi kallpanchawanchik hinaspapas yanapawanchik ima munasqanchikpi allin tanteowan piensarispa sumaqta rimanapaq (Proverbios 16:23). Chaynata yuyaymanaspaqa vidanchikpim kusisqa tarikusun. Salmo 1:3 nisqanman hina Diospi sapa kuti yuyaymanaspaqa “yarqapapas patallanpiña sumaqllaña wiñaq sachamanmi rikchakun. Chayna runaqa tiempollanpi sumaqllataña ruruykamullachkaq sachamanmi rikchakun. Chayna runapa tukuy ima rurallasqanqa alli-allinpunim haykapipas lloqsiykun”.

Yuyaymanayqa yanapawanchikmi allinta entiendespa piensarinapaq. Diospa unanchasqanmanta otaq Bibliapa yachachisqanmanta estudiaptinchikqa yanapawasunmi astawan entiendenapaq. Chaykunamanta entiendesqanchikta imamanta yachasqanchikwan tupachispa yuyaymanayqa astawanmi yanapawasun. Imaynam wasi ruwaq maestropas sapa ladrillowan perqaspam sumaq wasita qespichin, chaynam ñoqanchikpas yuyaymanaspaqa sapa ladrillota churachkaq hinam astawan yachasqanchik yapakunqa.

“Tukuy imamantapas engañakuqllañam runapa sonqonqa. [. . .] ¿Pitaqsi reqsinman runapa sonqontaqa?” (Jeremias 17:9)

IMATAM BIBLIA NIN:

“Sonqonmanta lloqsiptinmi runaqa huchallikun. Tukuy mana allinkunata piensaspa, suwakuspa, runata wañuchispa, hukwan pierdekuspa, runakunapa imankunatapas munapayaspa, mana allinkunata ruraspa, engañaspa, qanra vidapi purispa, envidiakuspa, [. . .] runa-tukuspa hinaspa loco hina ruraspa” (Marcos 7:21, 22). Erapi trigoman nina rataruptinqa sasa wañuchiymi, chaynam mana allinkunapi yuyaymanaypas sasa chinkachiymi kanman. Mana allinkunapi hinalla piensaptinchikqa mana allinkunata munapayanapaqmi kallpanchasqa kachwan, chaynataqmi ima huchamanpas wichiykuchwan (Santiago 1:14, 15).

Chaymi Bibliaqa kallpanchawanchik yuyaymananapaq allin “imapas cheqap kaqpi, imapas respetanapaq kaqpi, imapas allin ruray kaqpi, imapas mana huchallichikuq kaqpi, imapas allin rimana kaqpi, imapas allin alabanapaq kaqpi” (Filipenses 4:8, 9). Chaykunapi yuyaymanaspaqa sumaq sonqoyoq runam kasun. Piwanpas sumaqllatam rimasun (Colosenses 4:6).