JAPÓN nacionpim Hiroshima sutiyuq llaqta kachkan, chaypim Motoyasu sutiyuq mayu patanpi hatun wasi raqayrayachkan 1945 watamantapacha. ¿Imanasqataq kunankama mana allichankuchu?

Chay wasiqa ruwasqa karqa aparatokunata ruwanankupaq kallpanchanankupaqmi. Ichaqa 6 agosto 1945 watapim 8:15 achikyaqman chay wasipa hichpallanpi hatun bomba tuqyarurqa. Chaypi kaqkunaqa lliwmi chaylla wañururqaku, ichaqa wasipa pirqankunam wakillan taqmakururqa.

Chay wasitaqa manañam kaqmantaqa hatarichirqakuñachu, chaymi qiparurqa runamasinku ñakarichisqankuta yuyarinankupaq. * Chaytam sutichanku Hiroshima llaqtapi hawkayay haypasqankuta yuyarinapaq nispa. 1996 watapim lliw allpantinpi riqsisqa kananpaq akllarurqaku.

Manamá kayna raqaykuna qawasqanchikwanpas runamasintin wañuchinakuytaqa saqinchikchu, chayqa kachkan hukkunapa kaqninta munapayasqanrayku, llaqtanta, castanta aswan allinpaq hapisqanrayku hinaspa Dios yupaychaypi rakinasqa kasqankuraykum. Chaynaqa, ¿manachu haykapipas tukunqa wañuchinakuy?

Bibliam Salmo 46:9 nin: “Flechana arcokunatam pakiparun. Peleana lanzakunatam pakiparun. Guerrapaq carretakunatam kañarun”, nispa. Diosmi manapas unaymanta kay pachapi wañuchinakuyta chinkachinqa. Chaymantapas lliw kamachiqkunata tukuchispam, huk kamachikuqllataña lliw allpa Pachapaq churanqa, chay kamachikuqqa “reykunapapas reynin” Jesucristom (Apocalipsis 11:15; 19:16).

Jesucristo kamachiptinqa, manañam kanqañachu chayna wasikuna wañuchinakuy kasqanta yuyarinapaqqa. Isaias 65:17 nin: ‘Punta kaqkunaqa kanqa qunqasqañam chaynataq mana pipapas yuyarisqanñam’, nispa.