Yanapanakusun Dios serviypi ñawparinapaq

YANAPANAKUYQA ancha allinmi Dios serviypi familiantin ñawpariyta munaqkunapaqqa. Adantawan Evata unanchaspanmi Diosqa qawachirqa yanapanakuy ancha allin kasqanta: Evam Adanpa ‘yanapaqnin’ kanan karqa, chaynaqa casado vidapiqa warmi-qarim yanapanakunanku (Gen. 2:18; Ecl. 4:9-12). Chaymantapas familiapiqa churi-wawakunapas yanapakunankum Diospa kamachisqanta llapanku cumplinankupaq.

Familiantin Diosta yupaychaymanta

Barry hinaspa Heidim 5 warmayoq kanku. Paykunam musyakurunku hinalla familianwan Bibliata estudiaspa ñawparinankupaq yanapanakuyqa allinpuni kasqanta. Barrym nin: “Wakinpim familiaywan estudianaykupaq warmachaykunaman tareata qoni. Ninim, ¡Despertad! revistapa hukkaqnin yachachikuyninta leespa willakunankupaq. Predicanaykupaqpas ensayanikum chayman hina sapakama warmachayku predicanankupaq”, nispa. Señoran Heidipas ninmi: “Sapakamapam qellqasqaña kan Dios serviypi haypay munasqayku, chaymantam wakinpiqa estudiasqaykupi rimaniku imakunataña hayparusqaykumanta”, nispa. Paykunaqa tantearunkutaqmi wakin tutakunapi mana televisionta qawaspanku qellqanchikkunata leenankupaqpas.

Huñunakuykunapaq

Mike hinaspa Denisem 4 warmankunata uywarqaku. ¿Imaynatam yanapanakusqanku yanaparqa? Mikem nin: “Huñunakuyman tiempowan chayanaykupaq allin tanteasqaykupas wakinpiqa yanqachakuqmi, ichaqa musyakururqanikum yanapanakuspayku atisqaykuta”, nispa. Señoran Denisepas ninmi: “Warmayku uchuyllaraq kaptinkum imapas ruranankuta niq kaniku. Kim sutiyoq wawaymi yanukuypiwan, mesa alistaypi yanapawaq”, nispa. Michael qari wawanmi nin: “Sapa martes tutaykuqtam wasiykupi huñunakuy kaq. Chaymi huñunakunayku sitiota limpiaspayku, sillakunatapas churaq kaniku”, nispa. Matthew wawanpas ninmi: “Taytaymi huñunakunayku tutapaq llamkayninmanta tiempowan chayamuspan alistawaqku”, nispa. ¿Ima bendicionkunatam chaskirqaku?

Yanapanakuyqa allinpim tukun

Mikem nin: “1987 watapim señoraypiwan precursor kayta qallarirqaniku. Chaykamaqa kimsa churiykunam wasiykupiraq yacharqaku. Iskaymi precursor kayta qallarirqaku, wakinñataqmi Betelpi wasikuna ruraypi yanapakurqaku. Chaymantapas anchatam kusikuniku 40 runakunata bautizakunankupaq yanapasqaykumanta. Yanapakurqanikutaqmi Salonkunata ruraypi, chaynataq huk nacionkunapipas”, nispa.

Hinaptinqa familiapi yanapanakuyqa allinpunim. Chaynaqa, ¿imakunapitaq familiaykiwan yanapanakuwaqchik? Arí, sonqomanta yanapanakuyqa familiaykitam allintapuni yanapanqa Dios serviypi ñawparinankupaq.

[28 kaq paginapi dibujo]

Predicanapaq ensayayqa yanapakunmi Diosmanta allinta willakunapaq