1, 2. ¿Imaynatam yanapawanchik hanaq pachapiwan kay Pachapi kaq Diospa llaqtanpi yuyaymanayqa?

ANCHATAMÁ kusikunchik hanaq pachapi chaynataq kay Pachapi serviqninkunawan kuska Diospa llaqtanpi kaspanchikqa. Ezequiel libropa 1 kaq capitulonpi hinaspa Daniel libropa 7 kaq capitulonpim qawanchik munaynin ruwakunanpaq Jehova Dios tukuy ima ruwasqanmanta. Jesusmi kay Pachapi Diospa llaqtanta yanapan predicaypi astawan kallpanchakunankupaq hinaspa iñiyninkupi allin takyasqa kanankupaqpas. Hukkunatapas yanapachkanmi Jehova Diospa yupaychanankupaq. Chaykunaraykum mana iskayrayaspa Jehova Diospa llaqtanpi hapipakunanchik (Mat. 24:45).

² Hinaptinqa, ¿kasukunchikchu Diospa llaqtanpi tukuy ima niwasqanchikta? ¿Kallpanchakuchkanchikchu Diospa munayninta astawan ruwanapaq icha hukmanyachkanchikchu? Kay tapukuykunapi yuyaymanaspaqa ichapas musyakusun Dios serviyninchikpi amiruchkaq hina tarikusqanchikta otaq manaña ñawpaqpi hina Diospaq llamkasqanchikta. Arí, llapallanchiktam chayqa pasaruwachwan. Punta cristianokunapa tiemponpim apostol Pabloqa iñiqmasinkunata kallpancharqa Jesusta qatipakunankupaq. ¿Imanasqa? Paymi nirqa: “Pisiparuspa sonqoykichikpi mana hukmanyarunaykichikpaq”, nispa (Heb. 12:3). Pasaq yachachikuypim qawarqanchik Diospa llaqtan kunan tiempopi imakuna ruwasqanmanta. Chaymanta yachayninchikqa allintamá yanaparuwarqanchik Diospa munayninta kusikuywan hinalla ruwanapaq.

3. ¿Imatam ruwananchik Dios serviyninchikpi mana amirunapaq, hinaspa imamantam qawasun kay yachachikuypi?

³ Pabloqa nirqataqmi Dios serviyninchikpi mana amirunapaq ‘imapas allin ruraypi’ hinalla kallpanchakunamanta (Gal. 6:9). Chayta ruwanapaqmi lliw cristianokuna kallpanchakunanchik. Qawasun pichqa yanapakuykunata, kaykunam yanapawasun iñiyninchikpi allin takyasqa kananchikpaq hinaspa llaqtanwan hinalla ñawparinapaqpas. Yanapawasuntaqmi Dios serviyninchikpi  imayna tarikusqanchikta qawakuspa imakunapi astawan kallpanchakunapaq.

4. ¿Imataq qawachin cheqap yupaychaypi huñunakuykunaqa ancha allin kasqanmanta?

⁴ Jehova Diospa serviqninkunapaqqa ñawpaqmantaraqmi ancha allin karqa huñunakuyninkuqa. Hanaq pachapipas lliw angelkunam Jehova Diospa qayllanpi huñunakunku (1 Rey. 22:19; Job 1:6; 2:1; Dan. 7:10). Ñawpaq tiempopipas Israel runakunaqa huñunakunankum karqa uyarinankupaq hinaspa yachachisqa kanankupaqpas (Deut. 31:10-12). Punta pachak watapipas judiokunaqa sapa kutim huñunakunanku wasiman riqku Diospa Palabranta leenankupaq (Luc. 4:16; Hech. 15:21). Cristianokunapas anchatam chaninchaqku huñunakuykunataqa. Kunan tiempopipas ancha allinmi huñunakuykunaqa Jehova Diosta yupaychanapaq. Cheqap cristianokunaqa huñunakunchikmi ‘kuyanakunapaq hinaspa allinkuna ruwanapaq’. Sapa kutim necesitanchik kallpanchanakuyta, astawanraqmi ‘Señorpa chaylla kutimunanta yachaspaqa’ (Heb. 10:24, 25).

5. ¿Imaynatam kallpanchanakuchwan huñunakuykunapi?

⁵ Iñiqmasinchikkunawan kallpanchanakunapaqqa ancha allintaqmi huñunakuykunapi rimariyninchikqa. Rimarichwanmi tapukuykunata kutichispa, Bibliapa huk kaqnin textonmanta rimarispa otaq Bibliapa yachachikuyninkuna allintapuni yanapakusqanmanta qawachiq pisillapi experienciakunata willakuspapas (Sal. 22:22; 40:9). Hayka wataña huñunakuykunaman riptinchikpas, mozo-sipaskunapa otaq yuyayniyoq iñiqmasinchikkunapa huñunakuykunapi rimarisqankuqa anchatamá kallpanchawanchik.

6. ¿Imaynatam iñiyninchikpi anchata yanapawanchik huñunakuykunaqa?

⁶ ¿Imakunaraykuraqtaq Jehova Diosqa munan huñunakuykunaman hinalla rinanchikta? Salonpi huñunakuykunawan asambleakunaqa anchatam kallpanchawanchik Diosmanta hinalla willakunapaq hinaspa runakuna contranchikpi churakuptinku otaq Bibliamanta mana yachayta munaptinku mana hukmanyarunapaq (Hech. 4:23, 31). Chay huñunakuykunapi Bibliamanta yachachikuykunaqa allintataqmi iñiyninchikta kallpanchan (Hech. 15:32; Rom. 1:11, 12). Chaymantapas, chaypi yachachikuykunaqa hinaspa iñiqmasinchikkunawan kallpanchanakusqanchikqa anchatamá kusichiwanchik hinaspapas “sasachakuy punchawkunapim” hawkayachiwanchik (Sal. 94:12, 13). Diospa llaqtanpi Yachachikuymanta Encargakuqkunam, qawanku Jehova Diospa llaqtanpi lliw huñunakuykuna imayna apakunanmanta. ¡Anchatamá agradecekunchik sapa semana huñunakuyninchikpi yachachikuykuna chaskisqanchikmantaqa!

7, 8. a) ¿Imapaqmi huñunakuykunamanqa astawan rinchik? b) ¿Imaynatam huñunakuykunaqa qamta yanapasunki?

⁷ Huñunakuykuna anchata yanapawaptinchikpas, Jehova Diosta yupaychanapaqmi astawanqa rinchik (leey Salmo 95:6). Arí, ¡mayna sumaqmi Diosninchikta alabayqa! (Col. 3:16.) Unanchawasqanchikraykum Diosninchiktaqa sapa kuti yupaychananchik, chaytam ruwanchik huñunakuykunaman rispa hinaspa chaypi rimarispanchikpas (Apoc. 4:11). Chaymi Jehova Diosqa kallpanchawanchik ‘wakinkunapa costumbrasqanman hina huñunakuyman riyta mana’ saqenapaq (Heb. 10:25).

⁸ Huñunakuykunaqa Jehova Diospa piñakuynin punchaw chayamunankamam allinta yanapawasun ima sasachakuykunatapas atipanapaq. Chaymi aswan “allin kaqkunata” hina qawananchik, mana ancha tiempoyoq kaspanchikpas tukuytam ruwana huñunakuykunaman rinapaqqa (Filip. 1:10). Llumpay sasachakuypi tarikusqanchikraykullachá manaqa atisunchu huñunakuykunaman riytaqa.

9. ¿Imataq qawachin Diosmanta willakuyqa ancha allin kasqanta?

⁹ Diospa llaqtanpa tukuy niwasqanchikta kasukunapaqqa yanapawasuntaqmi tukuy kallpanchikwan Diosmanta willakuypas. Chay ruwaytam Jesus qallarichirqa kay Pachapi kachkaspan (Mat. 28:19, 20). Chaymantapacham Diospa llaqtanqa astawan kallpanchakun Paypa gobiernonmanta willakuypi hinaspa Jesuspa qatiqnin kanankupaq runakunata yanapaypipas. Iñiqmasinchikkunapa willakusqankum qawachiwanchik angelkuna yanapawasqanchikta hinaspa ‘wiñay kawsay’ munaq runakunata tarinapaqpas (Hech. 13:48; Apoc. 14:6, 7). Kay Pachapi Diospa llaqtanqa astawanmi kallpanchakuchkan chay llamkayta ruwananpaq. ¿Imatam niwaq qanmanta? ¿Yaqachu Diosmanta willakuynikita puntapi churachkanki?

10. a) ¿Imataq huk iñiqmasinchikta yanapan cheqap yachachikuykunata hinalla kuyananpaq? b) ¿Imaynatam qamtapas Diosmanta willakusqayki yanapasurqanki cheqap yachachikuykunata hinalla kuyanaykipaq?

¹⁰ Tukuy sonqonchikwan Diosmanta willakuyninchikqa yanapawanchikmi cheqap yachachikuykunata astawan kuyanapaq. Rimarisun Mitchel iñiqmasinchikmanta. Payqa unay watañam congregacionpi anciano hinaspa precursor, paymi nin: “Anchatam kusikuni cheqap yachachikuykunata runakunaman willaspay. Willakuq hinaspa ¡Rikchariy!, qellqanchikkunapa chayllaraq lloqsimuq yachachikuyninkunapi piensaspaymi admirakuni suma-sumaq ruwasqa kasqanmanta. Munanim Diosmanta willakuyta hinaspa runakuna chay yachachikuyninkunata qawaspanku ima  ninankumanta qawaytapas. Diosmanta willakuyqa allintam vidaypi yanapawan. Imapas ruwanay kaptinqa kallpanchakunim manaraq predicachkaspay otaq predicayta tukuruspayña chayta ruwanaypaq”, nispa. Diosmanta willakuypi kallpanchakusqanchikqa yanapawanchiktaqmi kay tukupay punchawkunapi iñiyninchikpi allin takyasqa kananchikpaqpas (leey 1 Corintios 15:58).

11. ¿Imanasqam Diospa qowasqanchik qellqanchikkunawan yanapachikunanchik?

¹¹ Kallpanchasqa tarikunanchikpaqmi Jehova Diosqa Bibliamanta achka qellqakunata qowanchik. Yaqapaschá haykapipas mayqan qellqanchikkunata leespanchik kaynata nirqanchik: “¡Kayqa ñoqapaq hinam! ¡Yaqachusmi kaytaqa ñoqapi piensaspan Jehova Diosqa qellqarachirqa!”, nispa. Chayna kasqanqa manam qonqayllamantachu, Jehova Diosqa qellqanchikkunawanmi yachachiwanchik hinaspa kawsayninchikpi pusawanchik. Paymi nirqa: “Ñoqam entiendechisqayki qamtaqariki. Ñoqam yachachillasqayki kawsakuytaqa”, nispa (Sal. 32:8). Chaynaqa, ¿kallpanchakunchikchu lliw qellqanchikkunata leenapaq? ¿Yuyaymananchikchu leesqanchikkunapi? Chayna ruwayninchikqa yanapawasunmi kay tukupay punchawkunapi Diospa munayninta hinalla ruwanapaq hinaspa iñiyninchikpi allin takyasqa kananchikpaqpas (leey Salmo 1:1-3; 35:28; 119:97).

12. ¿Imataq yanapawasun qellqanchikkunata chaninchanapaq?

¹² Piensarinanchiktaqmi qellqanchikkuna imayna ruwasqa kasqanpipas. Diospa llaqtanpi Yachachikuykuna Qellqaymanta Encargakuqkunam, qawanku lliw qellqanchikkuna imayna ruwakunanpaq, corregikunanpaq, tikrakunanpaq hinaspa imayna dibujoyoq kananpaqpas. Qellqanchikkunata maquinakunawan achkanpi ruwaq Betel wasikunam karupi otaq hichpallanpi kaq congregacionkunaman apachinku. ¿Imapaqmi tukuy chaykunata ruwanku? Jehova Diospa llaqtan iñiyninkupi allin takyasqa kanankupaqmi (Is. 65:13). Chaynaqa, yanapachikusunyá Diospa llaqtanpa qowasqanchik lliw qellqakunawan (Sal. 119:27).

13, 14. ¿Pikunataq hanaq pachapi Diospa llaqtanta yanapachkanku? ¿Imaynatam ñoqanchikpas yanapakusqanchikta qawachichwan?

¹³ Revelacionninpim apostol Juan qawarqa señorninchik Jesucristo yuraq caballopi risqanta chaynapi Jehova Diospa contranpi kaqkunata atipananpaq (Apoc. 19:11-15). Juanqa qawarqataqmi kay Pachamanta rantisqa runakuna hinaspa achkallaña angelkunapas Jesuspa qepanta qatisqankuta. Kaymi qawachin kamachiqninta hina Jesusta qawasqankuta (Apoc. 2:26, 27). Chayna kasqankum yachachiwanchik Diospa churasqan punta apaqkunata kasukunapaq.

¹⁴ Chaynallataqmi kay Pachapi kawsanankupaq suyakuyniyoq kaqkunapas, tukuy sonqonkuwan yanapanku hanaq pachapi kawsanankupaq suyakuyniyoq kaqkunata, paykunam kay Pachapi Diospa llaqtanta pusanku (leey Zacarias 8:23). ¿Imaynatam sapakamapas Jehova Diospa llaqtan yanapasqanchikta qawachichwan? Qawachichwanmi congregacionpi punta apaqkunata kasukuspa (Heb. 13:7, 17). Rimarisun congregacionpi ancianokunamanta. Paykunamanta piwanpas rimarispaqa, ¿qawachinchikchu respetasqanchikta? ¿Warmanchikkunata kallpanchanchikchu paykunata respetanankupaq hinaspa Bibliawan consejachikunankupaq? Chaymantapas, ¿rimanchikchu familianchikwan enteron Pachapi Diosmanta willakuy apakunanpaq qollqenchikwan imayna yanapakunamanta? (Prov. 3:9; 1 Cor. 16:2; 2 Cor. 8:12.) ¿Allintachu cuidanchik Huñunakunanchik Salonta? Jehova Diospa espiritunqa yanapawasunmi chayna respetakuq hinaspa huk sonqolla kaptinchikqa. Yanapawasuntaqmi kay tukupay punchawkunapi Dios serviyninchikpi mana amirunapaq (Is. 40:29-31).

15. ¿Imanasqam sapa punchaw anchata kallpanchakunanchik Diospa munasqanman hina kawsanapaq?

¹⁵ Dios serviyninchikpi mana amirunapaq hinaspa Diospa llaqtanpa tukuy niwasqanchikta kasukunapaqqa, yanapawasuntaqmi yachachisqanchikman hina kawsayninchikpas. Chaypaqqa, imayna kawsasqanchikmi ‘Señorninchikta agradananpaq’ hina kanan (Efes. 5:10, 11). Pantaq hinaspa Satanaspa munaychakusqan kay Pachapi kasqanchikraykum, mana allinkunawan sapa punchaw atipanakuchkanchik. Kuyasqa wawqe-panillaykuna, wakiqnikichikqa sapa punchawmi anchata kallpanchakuchkankichik Jehova Dioswan amistadnikichik mana chinkarunanpaq, chayraykum Jehova Diosqa anchata kuyasunkichik. ¡Amayá amiychikchu! Jehova Diospa munasqanman hina kawsaspaqa, hawkam tarikunchik hinaspapas manam iskayrayanchikchu Dios yupaychayninchik mana yanqapaq kananmantaqa (1 Cor. 9:24-27).

16, 17. a) ¿Imatam ruwananchik hatun huchata ruwaruspaqa? b) ¿Imatam yachachwan Anne iñiqmasinchikmanta?

¹⁶ Ichaqa, ¿imatam ruwananchik hatun huchata ruwaruspaqa? Chayllam yanapakuyta maskananchik. Huchanchikta pakaspaqa aswan sasachakuykunapim tarikuchwan. Davidmi huchan pakarusqanmanta nirqa: “Huchallayta mana willakuptiyqa cuerpollaymi aswan debilyarun. Tukuy punchawllaña waqasqayraykum cuerpollayqa aswan debilyarun”, nispa (Sal. 32:3). Huchata pakayqa llumpaytam hukmanyachikun, “huchanta willakuspa wanakuq runam ichaqa Diospa kuyapayasqan kanqa” (Prov. 28:13).

¹⁷ Rimarisun Anne * sutiyoq iñiqmasinchikta ima pasasqanmanta. Payqa sipasllaraq kasqanpim precursora karqa. Ichaqa Dios serviyninpim iskay uya karqa, chaymi mana allinkunaman wichiykurqa. Paymi nin: “Mana allin ruwarusqaymantam concienciay tumpawarqa. Sapa punchawmi llumpay hukmanyasqallaña tarikuq kani”, nispa. ¿Imataq yanaparurqa? Huk kaqnin huñunakuypim Santiago 5:14, 15 nisqanman hina yachachikuyta uyarirqa, hinaspanmi musyakururqa yanapakuy maskananmanta chaymi ancianokunawan rimaq rirqa. Paymi nin: “Chay textoqa iñiyninchikpi allinyanapaq Jehova Diospa qowasqanchik hampi hinam. Sasaniraqmá kasukuyqa, ichaqa yanapasunkim. Chay textopa nisqanta kasukusqayqa allinpim tukurqa”, nispa. Kunanqa iskay-kimsa watañam Anne iñiqmasinchikqa Jehova Diosta kusisqa chaynataq allin concienciayoq servichkan.

18. ¿Imata ruwanapaqmi tanteakunanchik?

¹⁸ Ancha kusikunapaqmi kay tukupay punchawkunapi Jehova Diosta serviyqa hinaspa llaqtan ukupi kayninchikpas. Chaynaqa, kallpanchakusunyá familianchikwan kuska lliw huñunakuykunapi kanapaq, maskasunyá allin sonqoyoq runakunatapas, allintataqyá yanapachikusun qellqanchikkunawanpas. Chaymantapas, kasukusunyá punta apaqkunata hinaspa yachachisqanchikman hinayá kawsasun. Chaynata ruwaspaqa, Jehova Diospa llaqtanpa tukuy niwasqanchiktam kasukusun, manataqmi haykapipas allin kaqkuna ruwaytaqa amirusunchu.