PACHAK watañam pasarun “Foto-Drama de la Creación” nisqa videota ruwasqankumantaqa, kay videom ruwakurqa Biblia Diospa Palabran kasqanpi iñinankupaq. Runakunam mana iñirqakuchu hinaspa kikillanchikmanta rikurisqanchikta yachachiqku, ichaqa kay “Foto-Drama” nisqam qawachirqa Jehova Diosqa Unanchawaqninchik kasqanta.

Chay tiempopiqa Charles T. Russell iñiqmasinchikmi punta apaq karqa, payqa Diospa Palabranmanta runakuna mana sasachakuspalla yachanankutam munarqa. Kimsa chunka wata masninñam Biblia Estudiaqkunaqa qellqakunata servichikurqaku, ichaqa kay “Foto-Drama” nisqata ruwasqankum aswan allinraq karqa.

1890 watapim chayllaraq lloqsimurqa peliculakuna, ichaqa manam uyarinapaqchu karqa, aswanqa qawanallapaqmi. 1903 watapiñataqmi Nueva York llaqtapa huk kaqnin iglesianpi qawarqaku huk peliculata. Chaymi Russell iñiqmasinchik “Foto-Drama” nisqa videota 1912 watapi ruwayta qallaykuptinqa, cine ruwaqkunapas chayllaraq qallarichkarqaku. Russell iñiqmasinchikqa allintam musyarqa runakuna videota qawaspanku Bibliamanta mana sasachakuspalla yachanankuta.

“Foto-Drama” nisqa videoqa 8 hora qawanapaqmi karqa, chaymi tawaman rakinasqa karqa. Karqataqmi Bibliamanta horqosqa 96 discursokunapas. Achka partekunapim takipas uyarikuq. Chaymanta yachaqkunam allinta dibujokunatawan rimasqankuta chaynataq takikunatapas tupachiqku.

Filadelfia, Nueva York, París hinaspa Londres llaqtakunapim makillawan sumaq dibujokunata ruwaqku, chaytam rantirqaku videota ruwanankupaq. Betelpi dibujokunamanta encargakuqkunam achka dibujokunata pintaqku, achka kutipim pakikuptinpas hukta ruwaqku. Chaymantapas, Yonkers  (Nueva York) llaqtapi kaq Betel wasipi llamkaqkuna Abrahanmanta, Isaacmanta hinaspa huk angelmanta actuasqankutam filmarqaku, chay angelmi Abrahamta harkarurqa churinta mana wañuchinanpaq (Gen. 22:9-12).

Kay videomanta rimaspanmi Russell iñiqmasinchikpa yanapaqnin televisionpi llamkaqman nirqa: “Achka runakunatam yanapanqa Bibliaman­ta ­yachayta munanankupaq, manamá imatapas kaynataqa ruwarqakuchu Diosmanta yachanankupaqqa”, nispa. ¿Imaynatam chayta qawarqaku religionpi punta apaqkuna? ¿Kusikurqakuchu chay ruwas­qankuwan Diosmanta yachay munaq runakunaman yachachiptinku? Manamá, aswanmi paykunaqa chay videomanta yanqakunata rimarqaku. Wakinkuqa harkakurqakum mana qawanankupaq. Wakin llaqtapiñataqmi luzpa cablentapas kuchururqaku.

Chaykunata ruwaptinkupas, runakunaqa hinallam riqku “Foto-Drama” nisqa videota qawanankupaq, chayqa mana qollqellapaqmi karqa. Estados Unidos nacionpim sapa punchaw qawarqaku 80 llaqtakunapi. Achka runakunam mana haykapipas qawarqakuraqchu uyarinapaq hinaspa qawanapaq peliculataqa. Fotokuna horqosqankuwanmi qawarqaku runtu toqyaptin chiwchicha imayna lloqsimusqanta hinaspa waytapa umpachan imayna kichakusqantapas. Chay qawasqankum Jehova Dios yachayniyoq kasqanta qawachirqa. Qallariypi nisqanman hinam, “Foto-Drama” videota qawaq runa Russell iñiqmasinchikta qawaspan nirqaraq: “¡Kikin Russellmantaqa astawanmi qawasqanchikpi payman rikchakun!”, nispa.

Cinemanta yachaq Tim Dirks runam “Foto-Drama” videomanta nirqa: “Kaytaqa wamaqmi ruwarurqaku dibujokuna cambiakuptin rimasqanwan tupaqta, chaymantapas chay dibujokunaqa colorniyoqmi karqa”, nispa. Kay videopa ñawpaqninta runakunapa ruwasqanku peliculaqa, manam “Foto-Drama” video hinachu karqa imayna ruwasqa kayninpiqa, astawanraqmi Bibliamanta yachachiypiqa. Chayllaraq qawasqanku watallapim 9 millon runakuna qawarqaku Norteamérica, Europa, Australia hinaspa Nueva Zelanda lawkunapi.

1914 watapim, 11 enero punchawta Nueva York llaqtapi chayllaraq qawarqaku “Foto-Drama” nisqa videotaqa. Qanchis killa pasayllatam enteron Pachapi Punta kaq Guerra qallaykurqa. Chayna kaptinpas waranqantin runakunam “Foto-Drama” videota qawarqaku, hinaspam consuelasqa tarikurqaku Diospa Gobiernonmanta yachasqankuwan. Kay videoqa 1914 watapim admirakuypaq karqa.