Yaqa qallariyllanpim Gail sutiyuq warmimanta rimamurqanchik. Paymi qusan Roberto wañukusqanta yuyarispan kunankamapas hinallaraq llakikusqanmanta nin. Ichaqa kaqmantam qusanwan tupaykuyta munachkan kay pacha sumaq huertayachisqaña kaptin. Chaymi nin: “Ñuqaqa Apocalipsis 21:3, 4, nisqanpim sapa punchaw yuyaymanani”, nispa. Chaypim nin: ‘Diosñataqmi kanqa paykunapa Diosnin. Diosmi pichanqa paykunapa wiqinta, manañam kanqachu wañuypas, [ . . . ] nitaq nanaypas. Ñawpaq kaqkunaqa pasarunñam’, nispa.

Gailqa nintaqmi: “Chaypim biblia nin wañuqkuna kawsarimunanta. Wañuqkuna kawsarimunanmanta runakuna mana yachasqankuraykum, paykunamanta llakikuni”, nispa. Gailqa manam iskayrayanchu hamuq tiempopi wañuy chinkananmantaqa, chaymi Diospa chayna nisqanmanta lliwman willakun.

Ichapas chay willakuykunaqa cuento hinalla rikchakapusunki. Chaynaqa Job sutiyuq runapa ima ruwasqanpiyá yuyaymanay (Job 2:7). Payqa llumpaytam unqururqa, chaymi wañuytapas munarqa. Chayna kaspanpas Jobqa manam iskayrayarqachu Dios kawsarichinantaqa. Chaymi nirqa: “¡Ima allinraq kanman piñakuyniki pasanankama wañuqkunapa kasqanpi pakaykuwaynikiqa! [...] Qayamuptikim contestamusqayki, unanchaqniy kasqaykiraykum kuyakuywan qawariykamuwanki”, nispa (Job 14:13, 15, CQ12). Jobqa manamá iskayrayarqachu Dios kawsarichinanmantaqa.

Jehova Diosqa Jobta hinaspa wara-waranqantin wañusqa runakunatam kawsarichinqa kay pacha sumaq huertayachisqa kaptin (Lucas 23:42, 43, NM). Bibliam willakun wañukuqkunaqa kawsarimunankumanta (Hechos 24:15). Jesuspas nirqam: ‘Kay nisqaymantaqa amayá admirakuychikchu, huk punchawmi Diospa churinpa qayasqanta uyarispanku llapallan wañuqkuna kawsarimunqaku’, nispa (Juan 5:28, 29). Jobqa wañukuqkunawan kuskam kawsarimunqa, hinaptinmi kallpanpas chaynataq aychanpas joven kayninpi hinaraq kaykunqa (Job 33:24, 25). Hina chaynallataqmi kawsarimunqaku Diospa nisqankunamanta mana iskayrayaq runakunapas.

Manamá bibliapa nisqankunata yachasqanchikraykuchu ayllunchik wañukuptinqa manañaqa llakikusunchu. Ichaqa bibliapa nisqankunapi yuyaymanaymi yanapawasun mana llumpayta hukmanyarunapaq (1 Tesalonicenses 4:13).

¿Imatawanmi ruwawaq llaki qatisuptiki mana llumpayta hukmanyanaykipaq? Ichapas tapukurqanki ñakariykuna kananta imanasqa Dios saqisqanmanta. Chayna kaptinqa internetpi maskay jw.org nisqata chaypim tarinki bibliapa nisqanman hina chaymanta yachanaykipaq hinaspa kallpanchasunaykipaq yachachikuykunata.