Inglaterra nacionpa Londres llaqtanpim nacerqani. Mamaywan hinaspa kimsa ñañaykunawanmi yacharqani. Taytayñataqmi tomakuq kasqanrayku wasiykumanqa wakillanpi kutiykamuq.

Warmachallaraq kachkaptiymi mamayqa yachachiwarqa Diosta imaynata mañakunaypaq. Uchuychalla bibliaypim karqa Salmos qillqalla, chaymi chayta ñawinchaspay takiq kani piensasqayman hina. Huk qillqapim leerurqani “runaqa wañunallanchikpaqmi kawsanchik” niqta. Chaypi piensaspaymi puñuytapas mana tarirqanichu. Chaymi nirqani: “Manachusmi wañunallanchikpaqqa kawsachwanchu”, nispa. Ñuqaqa ¡manamá wañuytaqa munarqanichu!

Animakunamantam yachayta munarqani. Chaymi wañuqkunawan rimayta munasqayrayku warmamasiykunawan panteonkunaman rirqaniku. Almakunamanta videokunatapas qawarqanikum. Tukuy chaykunata qawaspayku mancharisqallaña kaspaykupas munarqanikum hinalla qawayta.

Chunka watallaypiraqmi cigarro pitayta hinaspa drogakuyta qallaykurqani. 11 wataypiñataqmi trago tomaytaña qallaykurqani, trago hukman rikchakuwaptinpas munarqanim sinka kayta. Chaymantapas, takikuna uyariyta hinaspa tusuytam munarqani, chaymi fiestakunaman ripayarqani. Tutallanmi wasiymanta upallalla pasakuq kani hinaspaymi achikyaqtaña upallalla kutiykamuq kani. Chaymi paqarinnintinqa puñunsay kasqayrayku estudiaqpas manaña rirqanichu. Rispaypas tragotam tomakuq kani.

Secundariayta tukusqay watapiqa mana allin notayuqkunam karqani. Mana allin vidapi purisqayta mamay yacharuspanmi llumpay llakisqa tarikurqa. Chaymanta mamay qaqchawaptinmi kutipakurqani, chaymi wasiymanta pasakuspay riqsinakusqay Tony sutiyuq mozowanña yacharqani, chaymi manapas unaymanta wiksayakururqani, hinaptinmi 16 watallaypi piwi waway nacerurqa. Chay mozoqa  suwakuq, drogata rantikuq hinaspa maqakuqllañam karqa.

Warmisapakunapaq gobiernopa wasi qusqanpim wawaywan kuska yacharqani, chaymanmi Jehova Diospa iskay testigonkuna wakin warmisapamasiykunaman bibliamanta yachachiq hamuqku. Testigokuna yachachichkaptinmi pantaypi kasqankuta qawachinaypaq asuykurqani. Hinaptinmi paykunaqa mana piñakuspallanku tukuy tapukusqaymanta bibliawan yachaykachiwarqaku. Kuyakuqllaña hinaspa sumaq sunqu kasqankuta qawasqayraykum bibliamanta yachachiwanankupaq niwaptinkupas “arí” nirqani.

Wañuqkuna kawsarimunanmanta Jesuspa yachachisqanta bibliapi yachasqaymi vidayta cambiarurqa, ñuqaqa wañuytam manchakurqani (Juan 5:28, 29). Yacharurqanitaqmi Diosqa ñuqamanta nanachikusqanmantapas (1 Pedro 5:7). Jeremias 29:11 nisqanmi sunquyta tiyaykachirqa, chaypim nin: ‘Ñuqa tayta Diosmi nini: Favornikichikpi imam ruway piensasqaytaqa sumaqtam yachani. Manaña ñakarispa hawka kanaykichikpaqmi piensachkani chaynapi hamuq punchawkunapi confianzawan kanaykichikpaq’, nispa. Kay pacha sumaq huerta kaptin wiñaypaq kawsakuy atinaymanta bibliapa nisqantam yacharurqani (Salmo 37:29).

Jehova Diospa testigonkunaqa kuyakuqllañam ñuqawan karqaku. Huñunakuyninkuman chayllaraq riruspaymi qawarqani allin runakuna kasqankuta. Llapallankum kuyakuyllawanña chaskiykuwarqaku (Juan 13:34, 35). ¡Manamá haykapipas iglesiaypiqa chaynataqa chaskiykuwarqakuchu! Jehova Diospa testigonkunaqa manam imayna kasqayraykuqa pinqawarqakuchu, aswanqa tiempochakuspankum kuyakuyninta qawachiwarqaku. Chaymi aylluyta hinaña paykunataqa qawayta qallaykurqani.

Bibliamanta yachasqayman hinam musyakurqani Diospa chaskisqan kanaypaqqa vidayta cambianaymanta. Chaymi sasa kaptinpas cigarro pitayta saqirurqani. Chaymantapas musyakurqanim uyarisqay takikuna drogakunaypaq kallpanchawasqanta, chaymi huk takikunataña uyarirqani. Fiestakunaman riytapas saqirurqanim, chaynapi trago tomayman kaqmanta mana wichiykunaypaq. Kallpanchakurqanitaqmi allin amistadkunata maskanaypaqpas (Proverbios 13:20).

Chay tiempopiqa Tonytapas testigokunam bibliamanta yachachichkarqaku. Tapukusqankunata bibliawan yachachiptinkum payqa manaña iskayrayarqachu yachasqankunaqa chiqap kasqanmanta. Chaymi mana allin amistadninkunawanqa manaña hukllawakurqañachu, manañataqmi suwakurqañachu nitaq drogakurqañachu. Ñuqaykuqa munarqanikum Diospa kuyasqan kayta hinaspa warmayku allin uywasqa kananta, chaymi 1982 watapi casarakururqaniku.

Willakuq hinaspa ¡Rikchariy! * qillqakunapim maskarqani ñuqa hina runakuna vidanku cambiasqankumanta willakusqankuta. Chaykuna ñawinchasqaymi yanapawarqa qipaman mana kutinaypaq. Jehova Diostam sapa kuti qayakullarqani: “Amayá amirullawaychu”, nispay. 1982 watapa julio killanpiñataqmi Tonywan kuska bautizakurqaniku Jehova Diospa testigon kanaykupaq.

Diosta riqsirusqayraykum manaqa wañururqanichu. Qusaypiwanmi cuentata qukuniku Jehova Diosqa ima sasachakuypipas yanapawasqankumanta. Chaymi ima sasachakuypiña tarikuspaykupas Diosllapi hapipakuniku, payqa hinallam yanapawachkanku allinlla kanaykupaq (Salmo 55:22).

Kusisqam kachkaniku warmaykuta Diosta riqsinankupaq yanapaykusqaykurayku. Kusisqataqmi tarikuni willkaykunapas Diosta hinalla riqsisqankumanta.

Kunanqa miskitañam puñunipas, manam ñawpaqta hinañachu wañuytaqa manchakuni. Chaymantapas qusaywan kuskam sapa semana Jehova Diosta yupaychasqanku wasikunaman riniku iñiqmasiykuta kallpanchaq. Paykunawan kuskataqmi runakunaman yachachiniku Jesuspi iñispallanchik wiñay kawsayta haypananchikmanta.