Costa Rica nacionpim Puerto Limón sutiyuq llaqtapi wiñarqani. Tayta-mamaypa churinkunam karqa pusaq, ñuqaqa kani qanchis kaqñam. Taytaykum wañukurqa pusaq watayuqllaraq kachkaptiy, chaymi mamallayña uywawarqaku.

Béisbol * nisqankupim warmacha kasqaymantapacha anchata pukllarqani. Chaymi mozo kaspayqa pukllarqaniña yachasqay lawpi runakunawan. Yaqa 20 watayuqña kachkaptiymi, huk runa niwarqa Nicaragua nacionpi riqsisqa runakunawanña pukllanaypaq, ichaqa manam munarqanichu mamay unqusqanrayku. Watakuna pasaytam huk runaña niwarqa Costa Rica nacionniypaq pukllanaypaq. Nacionniypaqmi pukllarqani 1949 watamanta 1952 watakama. Pukllaqmi rirqani Cuba, México hinaspa Nicaragua nacionkunaman. 17 kutikama pukllasqaypim mana imallapipas pantarqanichu. Kusikuqmi kani runakuna qapariyllawanña sutiyta rimaptinku.

Warmiy kachkaptinpas hukwan-hukwanmi kakuq kani. Trago tomaymanpas wichiykurqanim. Huk punchawmi llumpayta sinkarurqani, chaymi paqarinnintinta rikchariruspay mana yuyarqanichu imaynam wasiyman chayasqaytapas. Qullqipaqtaqmi dominó nisqanku pukllaypipas pukllaq kani, qullqi gananapaq sorteopipas pukllarqanim.

Chay tiempopim mamayqa Jehova Diospa testigon kananpaq bautizakurqa. Kallpanchakuqmi yachasqankunamanta rimapayawananpaq, ñuqam ichaqa mana kaqpaqpas hapirqanichu pukllayllapi umayuq kasqayrayku. Pukllaspayqa manam mikuytapas yuyaqchu kani.

Ichaqa 29 watayuq kachkaptiymi huk kutipi pukllachkaptiy chakiypi kaq ankuykuna tipirurqa. Chaymi manaña pukllarqaniñachu. Chaywanpas allinyaruspaymi béisbol  pukllay munaqkunata yachachirqani wasiy lawpi.

Jehova Diospa testigonkunapa hatun huñunakuyninmi pukllasqay hatun estadiopi apakurqa 1957 watapi. Chay huñunakuyman rinaypaqmi invitawarqaku, hinaptinmi rirqani. Chaypim qawarqani testigokunaqa respetakuq runakuna kasqankuta, pukllaqkunata qawaq runakunaqa manam chaynachu karqaku. Chayta qawasqayraykum testigokunawan biblia estudiayta qallaykurqani hinaspa huñunakuyninkuman riytapas.

Bibliapim yacharurqani kay tukupay punchawkunapi Diospa munaychakuynin enteron pachapi willakusqa kananmanta (Mateo 24:14). Yacharurqanitaqmi Diosta chiqap serviqkunaqa mana imallapaq Diosmanta willakusqankutapas. Jesusmi kaynata nirqa: “Mana imallapaqmi chaskirqankichik, mana imallapaqtaqyá quychikpas”, nispa (Mateo 10:8).

Bibliamanta yachasqayman hinam qawarqani testigokunaqa bibliapa nisqanman hina kawsakusqankuta. Qawarqanim Diosmanta willakunankupaq imayna kallpanchakusqankutapas. Chaymi musyarurqani paykunaqa Jesuspa qatiqninkuna hina kuyakuq kasqankuta. Marcos 10:21 nisqanta ñawincharuspaymi Jehova Diospa testigon kaytaña munarqani.

Ichaqa wakin mana allin ruwayniykunatam sasata saqirqani. Achka watam sapa semana “allin suerte apamuq numerowan” qullqipaq pukllarqani. Ichaqa bibliapim yacharurqani Diosqa “allin suerte apamuq” taytacha yupaychaqkunata mana allinpaq qawasqanta (Isaias 65:11; Colosenses 3:5). Chaymi chay pukllaytaqa saqirurqani. Ichaqa mana pukllasqay semanaraqmi ganarurqani. Chayraykum riqsinakusqay runakunaqa asikuwarqaku imanasqa chay semana mana pukllasqaymanta, hinaspam hikutawarqaku hinalla pukllanaypaq. Ichaqa manam chaymantapacha pukllarqaniñachu.

Testigo kanaypaq bautizakurusqay punchawllatam ‘musuq runaña kasqayta’ qawachinay karqa (Efesios 4:24). Tutaykuyta samasqay hotelman kutiruptiymi ñawpaq riqsinakusqay warmi ñuqawan puñuyta munaspan cuartoypa punkunpi suyaruwasqa. Hinaptinmi nirqani manaña kanaykumanta. Nirqanitaqmi Diospa munasqanman hinaña kawsakusqaytapas (1 Corintios 6:18). Chaynata nichkaptiypas hinallam hikutawarqa kaqmanta kanaykupaq. Ichaqa manam munarqanichu, chaymi punkuyta wichqakururqani. 1958 watapi bautizakusqaymantapacham kunankama hinalla Diospa munasqanman hina kawsakuchkani.

Bibliapa nisqanman hina kawsakusqayraykum allin kaqkunata chaskirqani. Kunanqa allin amistadniykunam kan, hinaspapas kusisqam kawsakuni.

Hinallaraqmi béisbol nisqankuta pukllachkani, ichaqa wakin kutillapiñam. Mozo kaspay béisbolpi pukllaspayqa qullqisapa hinaspa ancha riqsisqam karqani, ichaqa chaykunaqa tukuruqllam. Dioswan amistad kasqay hinaspa iñiqmasiykunawan amistad kasqaymi ichaqa wiña-wiñaypaq takyanqa. Bibliam nin: “Diosta mana yupaychaq runakunaqa wañunqakum [...]. Diospa munayninta ruwaqmi ichaqa wiñaypaq kawsanqa”, nispa (1 Juan 2:17). Kunanqa Jehova Dios serviyta hinaspa llaqtanpi kaytam anchata chaninchani.

[Willakuy]