1, 2. (1) ¿Imakunataq Diospa ancha-ancha kuyakuyninqa? (2) ¿Ima tapukuykunamantam kaypi yachachkasun?

JEHOVA DIOSQA ancha-anchata kuyawaspanchikmi kuyasqan churinta kay pachaman kachamurqa ñuqanchikrayku wañunanpaq (Juan 3:16; 1 Juan 4:9, 10). Kay ruwasqanmi runakunapaq hatun kuyakuynin. Chaymi apostol Pabloqa nirqa Jehova Dios ‘ancha-ancha kuyakuynin quwasqanchikmanta’ (2 Cor. 9:15). ¿Ima niytataq kaywanqa munachkarqa?

² Pabloqa Jesuspa wañukusqanwanmi mana iskayrayarqachu, Jehova Diosqa tukuy ima nisqankuna ruwananmanta (leey 2 Corintios 1:20). Kaywanmi nichkan chay ancha-ancha kuyakuyninqa, manam ñuqanchikrayku Jesuspa wañusqallanchu. Aswanqa hamuq tiempopi Diospa tukuy ima quwasqanchikpiwanmi. Tukuy chaykuna quwasqanchikqa mana ima niytapas atinapaq hinam. ¿Imaynam tarikunanchik Jehova Diospa chayna kuyawasqanchikmanta yachaspa? Jesuspa wañukusqantam kay 2016 watapi yuyarisun miercoles 23 marzo killapi. Chaynaqa,  ¿imatam ruwananchik chay punchaw hichpamusqanrayku? Kay tapukuykunamantam kaypi yachasunchik.

3, 4. (1) ¿Imaynam tarikunchik pipas imallatapas quykuwaptinchik? (2) ¿Imatam ruwachwan pipas ñuqanchikrayku wañuptin?

³ Pipas kuyawaspanchik imallatapas quykuwaptinchikqa kusisqam tarikunchik. Wakiqninpa quykuwasqanchikqa kawsakuyninchiktapas allinyarachinmanmi. Kaypi yuyaymanay: Ichapas ima mana allintapas ruwasqaykirayku autoridadkuna tantearunmanku wañuchisqa kanaykipaq. Hinaptinñataq mana riqsisqayki huk runa ninman qanmantaqa payña wañunanpaq. ¿Imatam ruwawaq?

⁴ Ichapas allinkunataña ruwaspa kawsakuyta tantearuwaq. Astawan kuyakuq kaspa, hukkunatapas yanapaspa utaq mana allin ruwasuqniki runakunatapas pampachaykuspa. Yaqapaschá sapa punchaw kawsakuwaq qamrayku chay runapa ruwasqanta yuyaristin.

5. ¿Imaynanpitaq Jehova Diospa kuyakuyninqa pipa kuyakuyninwanpas mana tupachiy atina?

⁵ Jehova Diospa kuyakuynin quwasqanchikqa manam rimamusqanchik runapa ruwasqan hinallachu (1 Ped. 3:18). Ñuqanchikqa huchasapa kasqanchikraykum llapallanchik wañunchik (Rom. 5:12). Chaymi Jehova Diosqa ancha-ancha kuyawasqanchikrayku churinta kachamurqa ñuqanchikrayku wañunanpaq (Heb. 2:9). Jesuspa chayna wañusqanraykum wañuypas wiñaypaq chinkanqa (Is. 25:7, 8; 1 Cor. 15:22, 26). Jesuspi iñiqkunaqa hawka hinaspa kusisqam wiñaypaq kawsakunqaku, wakiqninkum hanaq pachapi Jesuswan kuska, wakinñataqmi kay pachapi (Rom. 6:23; Apoc. 5:9, 10). Ichaqa manam chaykunallatachu Jehova Diosqa quwasunchik.

6. (1) ¿Imayna kawsakuytam hamuq tiempopi munanki? (2) ¿Imatam ruwachwan agradecekusqanchikta qawachinapaq?

⁶ ¿Imakunatawanmi Jehova Diosqa kuyawasqanchikrayku ruwanqa? Kay pacham sumaq huertayachisqa kanqa, unquqkunam allinyanqaku, wañusqakunapas kawsarimunqakum (Is. 33:24; 35:5, 6; Juan 5:28, 29). Kaykuna ruwasqanraykum Jehova Diostawan Jesustaqa anchata kuyanchik. ¿Imatam ruwachwan agradecekusqanchikta qawachinapaq? Jesuspa ruwasqantam qatipakuna, iñiqmasinchikkunatam kuyana, chaymantapas runamasinchikkunatam sunqumanta pampachana.

7, 8. (1) ¿Ima ruwaytam munasun kuyawasqanchikmanta Jesusta agradecekuspaqa? (2) ¿Imatam ruwananchik Jesus kuyawasqanchikrayku?

⁷ Apostol Pablopa nisqanman hinaqa Jesusta hatunchanapaqmi kawsakunanchik. Paymi nirqa: ‘Cristo kuyawasqanchikraykum kaykunata ruwananchik’, nispa (leey 2 Corintios 5:14, 15). Jehova Dioswan Jesusqa kuyawasqanchikraykum tukuy imata ruwanku. Chaykunamanta allinta yachaspaqa Pablo hinam tukuy sunqunchikwan agradecekuspa Jesuspa munasqanman hina kawsakuyta munasun. ¿Imaynatam chayta ruwasun?

⁸ Jesuspa imayna kawsakusqanta allinta qawarispam chayman hina kawsakunanchik (1 Ped. 2:21; 1 Juan 2:6). Jehova Diostawan Jesusta kasukuspanchikmi paykuna kuyasqanchikta qawachinchik. Jesusmi nirqa: ‘Kamachikuyniykunata yachaspa kasukuq runaqa kuyawanmi, taytaypas kuyanqam chayna kuyawaqniytaqa. Ñuqapas kuyaspaymi riqsichikusaq paywanqa’, nispa (Juan 14:21; 1 Juan 5:3).

9. ¿Ima sasachakuypim sapa punchaw tarikunchik?

⁹ Jesuspa wañukusqanta yuyarinapaq punchawqa ñam chayaykamuchkanña, chaynaqa  yuyaymanasunyá imayna kawsakusqanchikpi. Chaymi tapukunanchik: “¿Imakunapim Jesusta qatipakuchkani? ¿Imakunapim astawanraq kallpanchakunay?”, nispa. Chayna tapukuyqa allinninchikpaqmi kanqa. ¿Imanasqa? Sapa punchawmi Diosta mana riqsiq runakunapa chawpinpi tarikunchik, chaymi wakinpiqa imapas ruwasqankuwan aysaykachikuchwan (Rom. 12:2). Mana qawan-qawanlla kawsakuspaqa, yachaysapa runakunapa, ancha riqsisqa kaqkunapa, pelota haytaypi pukllaqkunapa utaq takiqkunapa imapas ruwasqankutam mana musyaylla qatipakuyta qallaykuchwan (Col. 2:8; 1 Juan 2:15-17). ¿Imatam ruwachwan chaykunawan mana aysachikunapaq?

10. (1) ¿Imakunatam tapukunanchik Jesuspa wañukusqanta yuyarinapaq punchaw hichpamusqanrayku? (2) ¿Imakunatam ruwachwan? (Qaway 9 kaq paginapi dibujota).

¹⁰ Jesuspa wañukusqanta yuyarinapaq punchaw manaraq chayamuchkaptin chaynataq pasaruptinpas, allinmi kanman pachanchikkunata, uyarisqanchik takikunata, qawasqanchik videokunata, celularninchikta, computadoranchikta hinaspa tablet nisqa aparatonchiktapas qawariyninchik. Hinaspam tapukuchwan: “Jesus qawaykuwaptinqa, ¿pinqakuymanchu imayna pachakusqaymanta? (Leey 1 Timoteo 2:9, 10). ¿Jesusta qatikusqaytachu qawachin imayna pachakusqay? ¿Allinpaqchu Jesusqa qawanman qawasqay videokunata hinaspa uyarisqay takikunatapas? ¿Mana imamantapas pinqakuspaychu Jesusman hapiykachiyman celularniyta hinaspa tabletniyta qawaykunanpaq? ¿Mana pinqakuspaychu Jesusman qawaykachiyman computadoraypi pukllaykunata?”, nispa. Jehova Diosta kuyaspaqa, imapas mana allinkunataqa wischunanchikmi, mayna qullqipa chaninña kaptinpas (Hech. 19:19, 20). Jehova Diosman qukusqanchikpim nirqanchik, Jesusta qatipakuspa kawsakunanchikpaq. Chaynaqa amayá imawanpas harkachikusunchu Jesuspa kawsakusqanman hina kawsakunapaqqa (Mat. 5:29, 30; Filip. 4:8).

11. (1) ¿Imatawanmi ruwasun Jehova Diostawan Jesusta kuyaspanchikqa? (2) ¿Imatam ruwachwan iñiqmasinchikkunata yanapanapaq?

¹¹ Jehova Diostawan Jesusta kuyaspataqmi, kusikuywan wakin runakunaman Diosmanta willakunanchik hinaspa yachachinanchik (Mat. 28:19, 20; Luc. 4:43). ¿Yaqachu Jesuspa wañukusqanta yuyarinapaq punchawpa ñawpaqninta hinaspa pasayninta precursor auxiliar kanapaq tanteakuchwan? Kanmanmi 30 utaq 50 hora Diosmanta willakunapaq. 84 watanpi kaq huk iñiqmasinchikpa ruwasqanpi yuyaymanay. Payqa yuyaqña hinaspa unqusqanraykum piensarqa precursor auxiliar kaytaqa mana atisqanta. Ichaqa hichpallanpi yachaq precursorkunam tantearurqaku mana sasachakuspalla purina lawpi Diosmanta willakuq pusanankupaq. Chaywanmi payqa killapi 30 horata Diosmanta willakurqa. Ñuqanchikpas, ¿yanapachwanchu marzo utaq abril killapi precursor auxiliar kanankupaq, ñuqanchikwan huñunakuq huk kaqnin iñiqmasinchikta? Manamá llapanchikchu precursor kaytaqa atinchik. Ichaqa atichwanmi Diosmanta willakunapaq astawan tiempochakuytaqa. Chayta ruwaspaqa apostol Pablo hinam kuyawasqanchikmanta Jesusta agradecekusqanchikta qawachisun. ¿Imatawanmi ruwachwan kuyawasqanchikmanta Diosta agradecekusqanchikta qawachinapaq?

12. ¿Imatam ruwananchik Jehova Dios kuyawananchikta munaspaqa?

¹² Jehova Dios kuyawasqanchikraykum iñiqmasinchikkunatapas kuyananchik. Apostol  Juanmi qillqarqa: ‘Sichum chaynata Diosninchik kuyawachkaptinchikqa ñuqanchikpas kuyanakuytam debenchik’, nispa (1 Juan 4:7-11). Jehova Dios kuyawananchikta munaspaqa, ñuqanchikpas iñiqmasinchikkunatam kuyananchik (1 Juan 3:16). ¿Imaynatam iñiqmasinchikkuna kuyasqanchikta qawachichwan?

13. ¿Imakunatam Jesusqa ruwarqa kay pachapi kaspan?

¹³ Jesusqa paypuni kuyakuq kaspanmi yachachiwarqanchik runamasinchikkuna kuyayta. Payqa kay pachapi kaspanmi llampu sunqu runakunata astawan yanaparqa. Chaymantapas unquqkunata, suchukunata, ñawsakunata, mana uyarikuqkunata hinaspa mana rimaqkunatapas allinyachirqam (Mat. 11:4, 5). Jesusqa manam punta apaq religiosokuna hinachu karqa, aswanqa Diosmanta yachay munaq runakunatam yachachiyta munarqa (Juan 7:49). Mana hatun tukuq kaq runakunatam kuyarqa hinaspapas astawan yanapaytam munarqa (Mat. 20:28).

14. ¿Imaynatam qawachinchik iñiqmasinchikkunata kuyasqanchikta?

¹⁴ Jesuspa wañukusqanta yuyarinapaq punchawkunaqa ancha allinmi iñiqmasinchikkunata yanapananchikpaq, astawanraqmi yuyaqyasqa iñiqmasinchikkunataqa. Ichapas, imallatapas apaspa paykunaman watukuchwan, ima ruwayninkupipas yanapaykuchwan, pusachwantaqmi huñunakuykunaman utaq Diosmanta willakunapaqpas (leey Lucas 14:12-14). Jehova Dios kuyawasqanchikraykum kallpanchasqa tarikunchik iñiqmasinchikkunata astawan kuyananchikpaq.

15. ¿Imatam llapallanchik riqsikunanchik?

¹⁵ Jehova Dios kuyawasqanchikraykutaqmi iñiqmasinchikkunatapas pampachayta atichwan. Adanpa miraynin kasqanchikraykum pantaq runa kanchik, chaymi llapanchik necesitanchik Jesuspa wañukusqanwan huchanchikmanta pampachaykuwananchikta. Jehova Dios yupaychaqkunataqa llapanchiktam achka-achka manumanta hina huchanchikmanta pampachaykuwanchik. ¿Imanasqam chayta riqsikunanchik? Jesuspa yachachisqanmantayá qawasun.

16, 17. (1) ¿Imatam Jesusqa niyta munarqa kamachiqpa pampachasqanmanta willaspan? (2) ¿Imatam ruwananchik pampachaykuwasqanchikmanta Jehova Diosta agradecekuspanchik?

¹⁶ Jesusmi willakurqa, huk kamachiqman sirvienten 60 wara-waranqa qullqi debesqanmanta. Ichaqa chay kamachiqmi debeqnintaqa llakipayariykuspan pampachaykurqa. Chay sirvientem ichaqa 100 qullqilla debeqnin sirvientemasintaqa mana pampacharqachu. Sichum chay kamachiqta pampachasqanmanta agradecekuspanqa, sirvientemasintapas pampachaykunmanmi karqa. Kamachiq runaqa chay sirvientepa mana allin ruwasqanmanta yacharuspanmi llumpayta piñakururqa. Chaymi qayachispan nirqa: ‘Ruegawaptikim pampacharqayki lliw debewasqaykita. Qampas llakipayariykuwaqchá karqa  sirvientemasikitaqa qanmantapas llakipayariykusqayman hina’, nispa (Mat. 18:23-35). Kay willakuywanqa, ¿imatam Jesusqa niyta munarqa? Huchanchikkunamanta Jehova Dios pampachaykuwaspanchikqa, llumpa-llumpay debesqanchikmantapas hinam pampachaykuwanchik. Chaynaqa, ¿imatam ruwachwan payta agradecekuspanchikqa?

¹⁷ Jesuspa wañukusqan punchaw yuyarinanchikpaq manaraq chayamuchkaptinmi, kaypi yuyaymanananchik: “¿Hukmanyachiwananpaq hinachu pi iñiqmasiypas rimapayawarqa? ¿Sasachakunichu pampachanaypaq?”. Chayna kaptinqa Jehova Diostam qatipakunanchik, payqa pampachaykuwananchikpaq listollam kachkan (Sal. 86:5; Neh. 9:17). Sichum pampachaykuwasqanchikmanta Jehova Diosta agradecekuspanchikqa, hukkunatapas sunqumanta pampachaytam atisun. Dios kuyawananchikta hinaspa pampachaykuwananchikta munaspaqa iñiqmasinchikkunatapas pampachananchikmi hinaspapas kuyananchikmi (Mat. 6:14, 15). Mana allin ruwawasqanchikkuna llumpayta llakichiwaptinchikpas, pampachaykuspaqa hamuq tiempopim kusisqa tarikusun.

18. ¿Imataq Lilyta yanaparqa Carolta hinalla yanapananpaq?

¹⁸ Wakinpiqa sasamá kanman iñiqmasinchikkunapa pantasqankuta sapa kuti pampachayqa (leey Efesios 4:32; Colosenses 3:13, 14). Lily sutiyuq iñiqmasinchikpa ima ruwasqanmantayá yachasun. ^[1] Paymi Carol sutiyuq viuda iñiqmasinchikta yanaparqa, maymanpas riy munasqanman apaspan, imatapas rantipamuspan hinaspa ima necesitasqanpipas. Tukuy imapi yanapachkaptinpas Carolpaqqa manam imapas gustonpaqchu kaq. Lilym ichaqa kallpanchakurqa Carolpa allin ruwasqankunata qawananpaq. Chaymi Lily iñiqmasinchiktaqa kallpancharqa unay watakuna wañukunan punchawkama Carol iñiqmasinchikta yanapananpaq. Lilym nin: “Tukuy sunquywanmi munachkani Carol kawsarimunanta, chaypiqa mana pantaqtañam qawasaq”, nispa. Kuyawasqanchikmanta Jehova Diosta agradecekuspaqa, ñuqanchikpas manam iñiqmasinchikkunapa pantasqankutaqa qawachkasunchu. Chayna kuyakuytaqmi yanapawasun mana pantaqña kanapaq punchawta suyananchikpaqpas.

19. ¿Imatam ruwasun tukuy ima ruwasqanmanta Jehova Diosta agradecekuspanchikqa?

¹⁹ Jehova Diosqa ancha-ancha kuyakuynintamá quwarqanchik. Jesuspa wañukusqanta yuyarinapaq punchawpiqa allinmi kanman Jehova Dioswan Jesus ñuqanchikrayku tukuy ima ruwasqankupi yuyaymanayninchikqa. Sapa punchawyá qawachisun chaykuna ruwasqankumanta agradecekusqanchikta. Jesuspa kawsakusqanman hinayá kawsakusun, iñiqmasinchikkunata kuyasun hinaspa sunqumanta pampachanakuq kasun.