¿Imaynanpitaq yupaychana wasikunaqa rikurirurqa?

SINAGOGA rimayqa griego rimaymantam hamun, chay ninanqa “huñunasqa runakuna” ninanmi. Ñawpaqmantaraqmi chay wasikunapiqa Diosmanta yachanankupaq hinaspa Diosta yupaychanankupaq judiokunaqa huñunakuqku. Bibliapi Genesismanta Malaquiaskamaqa manam kay yupaychana wasikunamantaqa rimanchu. Mateomanta Apocalipsiskamam ichaqa yupaychana wasikunamantaqa rimanña. Chaymi nichwan Jesuspa tiemponpiqa kasqanmantaña.

Yachaysapa runakunam ninku judiokuna Babilonia llaqtapi kachkaspanku yupaychana wasikunata rikurirachisqankumanta. Huk qillqam nin: “Babilonia llaqtapi Diospa wasin mana kasqanraykum, hinaspa sunqunkuta tiyaykachiyta munasqankuraykum judiokunaqa huñunakuqku, yaqapaschá chaytaqa sabado punchawpi ruwaqku. Chaypim Diospa palabranta ñawinchaqku”, nispa. Judiokuna Babilonia llaqtamanta lluqsiramuspankupas hinallachusmi huñunakurqaku Diosta mañakunankupaq hinaspa Diospa palabranta ñawinchanankupaq. Hinaspapas mayman chayasqankupim hatarichirqaku yupaychana wasikunata.

Jesuspa tiemponpaqqa Israelpi hinaspa muyuriqnin llaqtakunapim, chay yupaychana wasikunapi tukuy imata ruwanankupaq huñunakuqku. Lee Levine yachachiqmi nirqa: “Chay wasikunapiqa Diosmantam yachaqku, sabado punchawkunapim mikuqku, juiciokunatam ruwaqku, llaqtankupaqmi qullqita huñuqku hinaspa huk ruwaykunapaqpas huñunakuqkum”, nispa. Nirqataqmi: “Ichaqa astawanqa huñunakuqku Diosta yupaychanankupaqmi”, nispa. Chayraykuchá Jesuspas sapa kutilla riq yupaychana wasikunaman (Mar. 1:21; 6:2; Luc. 4:16). Chaypim Jesusqa runakunata Diosmanta yachachirqa, hinaspa kallpancharqa chaypi kaqkunata. Pablopas may llaqtaman chayaspanpas chayllam riq chay wasikunaman Diosmanta yachachinanpaq, chayman Diosmanta yachay munaq runakuna risqanrayku (Hech. 17:1, 2; 18:4).