Lliw ñakariykunam wiñaypaq chinkanqa

ENTERON pachapim qarikunapas warmikunapas anchata kallpanchakunku ñakariqkunata yanapanankupaq. Doctorkunam kallpanchakunku hampinankupaq, bomberokunawan policiakunañataqmi cuidanankupaq, chaynallataqmi hukkunapas. Arí chayna rurasqankuqa ancha allinmi. Ichaqa manam pipas nitaq runapa mayqan gobiernonpas atinmanchu lliw runakunapa ñakariyninta chinkachiytaqa. Diosmi ichaqa atinqa, hinaspa nirqataqmi chayna rurananmanta.

Qaway runakunapaq Diospa ima rurananmanta, Bibliapa tukuyninpi librom nin: “Diosmi pichanqa paykunapa weqenta, manañam kanqachu wañuypas, lutokuypas, waqaypas nitaq nanaypas. Ñawpaq kaqkunaqa pasarunñam”, nispa (Apocalipsis 21:4). ¿Musyakunkichu ima niwasqanchikmanta? Huk rimaypiqa niwachkanchikmi lliw ñakariykunata chinkachinanpaq Dios tantearusqanta. Chinkachinqam guerrakunata, yarqayta, onqoykunata hinaspa ima ñakarichiwaqninchik kaqkunatawan mana allin runakunatapas. ¿Pitaq kaykuna rurayta atinman?

Diospa Gobiernonmi lliwta allichanqa

Jehová Diosmi atiyniyoq churin Jesucristontakama prometesqanta cumplinqa. Ñam  Jesusqa hanaq pachamanta kay enteron pachata kamachimunqaña. Hinaptinmi manaña pipas presidentekunawanqa nitaq yanapaqninkunawanpas kamachisqaqa kanqañachu. Diospa Gobiernollanmi kanqa, chaypim Jesucristo kamachinqa.

Chay Gobierno runakunapa gobiernonta chinkachinanmantam, ñawpaqtaraq Bibliaqa kaynata willakurqa: “Dios[mi] hatarichinqa mana tuñichiy atina gobiernota, chay gobiernoqa huk runamanqa manam qosqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq”, nispa (Daniel 2:44). Hinaptinmi enteron pachamanta tukuy rikchaq runakuna Diospa gobiernonpi huk sonqollaña kawsanqaku.

Jesucristoqa kay Pachapi kaspanmi achka kutipi Jehová Diospa gobiernonmanta rimarqa. Ejemplopaq, discipulonkunata orakunankupaq yachachispanmi nirqa: “Munaychakusqayki hamuchun. Munasqaykiyá rurasqa kachun kay pachapipas hanaq pachapi hina”, nispa (Mateo 6:10). Qawasqanchikman hinaqa, Jesusqa nirqam Jehová Diospa Gobiernon hamuptin Diospa munaynin kay pachapi rurakunanmanta. Chaymi runakunapa ñakariynintapas chinkachinqa.

Diospa Gobiernonmi runakunapa gobiernonpa mana ruray atinanta ruranqa. Qawasun, Jehová Diosmi Churinta ñoqanchikrayku wañunanpaq kachamurqa, chaymi runakunaqa wiñaypaq kusisqallaña kawsakunqaku. Diosqa ancha kuyakuyninpim ‘wiñaypaq chinkachinqa wañuyta. [. . .] Pichanqam llapallan waqaqkunapa weqenta’ (Isaias 25:8).

Ichapas tapukuchkanki: “¿Imanasqataq manaraq chinkachinchu? ¿Imanasqataq llumpayta unamuchkan?”, nispa. Arí, Jehová Diosqa ñam chinkarachinmanña karqa. Ichaqa allinninchikta munaspanmi ñakariykunataqa saqerqa. Payqa kuyakuq tayta-mamakuna hinam rurarqa, tayta-mamakunaqa churi-wawanku ñakarinantam saqenku tiempopa risqanman hina allinninpaq kasqanta yachaspanku. Bibliapas nintaqmi ñakariykunata saqenanpaq Diospa achka razonkuna kasqanta. Kaykunam tupan imatapas ruranapaq libre kayninchikwan, hucharayku imayna tarikusqanchikwan hinaspa Jehová Dioslla kamachiwananchikpaq derechoyoq kasqanwanpas. Bibliaqa yachachintaqmi kay pachata pisi tiempolla Satanas munaychakunanpaq Dios saqesqanmanta. *

Kay yachachikuykunapiqa manamá anchatachu qawasun chay razonkunamantaqa. Ichaqa kay qatiqnin yachachikuykunapim yuyaymanachwan, kaykunaqa suyakuytawan consuelotam qowasunchik. Punta kaq: Jehová Diosqa aswan bendicionkunatam qowasun tukuy ñakarisqanchikmantaqa. Niwanchiktaqmi ‘punta kaqkuna qonqasqaña chaynataq mana pipapas yuyarisqanña kananmanta’ (Isaias 65:17). Hinaptinqa, Diosmi wiñaypaq allichanqa kay pachapi tukuy mana allin pasawasqanchiktaqa.

Iskay kaq: Diosqa tantearunñam runakunapa ñakariyninta haykapi chinkachinantaqa. Yuyariy, Habacucmi Jehová Diosta tapurqa haykapikama ñakariykunata saqenanmanta. Hinaptinmi Dios nirqa: “Señalasqay tiempopim kay revelacion qosqayqa cumplikunqa [. . .]. Chayamunqapunim chay punchawqa”, nispa (Habacuc 2:3). ¿Haykapitaq chay ‘señalasqa tiempoqa’ chayamunqa? Qatiqnin yachachikuypim qawasun.

[Willakuy]

 [30 kaq paginapi recuadro]

Bibliaqa suma-sumaq kawsakuytam prometewanchik

MANAÑAM GUERRAKUNA KANQAÑACHU

“Hamuspayá qawaychik Tayta Diospa imam rurasqankunata [. . .] imam purmachisqankunata. Guerrakunatam payqa tanirachin” (Salmo 46:8, 9).

WAÑUQKUNAM KAWSARIMUNQAKU

‘Allin runakunatawan mana allin runakunatam hamuq punchawpi Dios kawsarichimunqa’ (Hechos 24:15).

LLIW RUNAKUNAPAQMI MIKUY KANQA

“Kay pachapiyá achka-achka kawsaykuna qespichun. Moqo chakrakunapiyá sumaqllataña kawsaykuna aywityachun” (Salmo 72:16).

ONQOYKUNAM CHINKANQA

“Manañam mayqannikichikpas ninkichikñachu: ‘Onqochkanim’ nispaqa” (Isaias 33:24).

MANA ALLIN RUNAKUNAQA MANAM KANQAÑACHU

“Mana allin ruraqkunam ichaqa kay pachamanta chinkachisqa kanqaku. Traicionaqkunam ichaqa qora pilarusqa hina kay pachamanta qechusqa kanqaku” (Proverbios 2:22).

ALLIN RURAYLLAÑAM KANQA

“Allinkunallata ruraspa gobiernaq reymi [Jesucristo] kanqa. Allinta arreglaspa gobiernaq kamachikuqkunam kanqa” (Isaias 32:1).

[30 kaq paginapi dibujokuna]

Diospa Gobiernonpiqa, tukuy ima ñakariykunam qonqasqa kanqa