Soqta kaq: Taytacha-mamachakunatam servichikuna

¿Imaynatam kay pantay yachachikuy rikuriramurqa? “Punta cristianokunaqa manam taytacha-mamachakunataqa servichikurqakuchu Diosta yupaychanankupaqqa [. . .]. 300 hinaspa 400 watakunapim, Iglesiaqa nirqa cristianokunapa yachachikuyninta mana estudioyoq runakuna, sermonkunawan otaq librokunawan yachanankumantaqa taytacha-mamachakunata servichikuspanku chaylla yachanankumanta.” (Cyclopedia of Biblical, Theological, and Ecclesiastical Literature, McClintock y Strong.)

¿Imatam Biblia yachachin? “Amam taytacha-mamachataqa rurankichu imaman rikchakuqtapas, hanaq pachapi kaqman rikchakuqtapas, kay pachapi kaqman rikchakuqtapas nitaq allpapa ukun yakupi kaqman rikchakuqtapas. Amam qonqorakunkichu chaykunapa ñawpaqninpiqa, amataqmi adorankichu.” (Exodo 20:4, 5.) Apostol Juanpas cristianokunamanmi nirqa: “Churillaykuna, karunchakuychikyá taytacha-mamachakunamantaqa”, nispa (1 Juan 5:21).

Achka religionkunam ninku retratokuna mana taytacha-mamachakuna kasqanta, piensankum chaynintakama paykunaman asuykuspa alabay atisqankuta. ¿Cheqapchu chay kanman? Huk libropa nisqanman hinaqa, “retratokunataqa yaqachusmi yachachinapaq hinaspa perqakunaman churanapaq servichikurqaku; chaynatam imanasqa servichikusqankumanta nirqaku. Ichaqa chayllam yupaychanapaq servichikuyta qallaykurqaku. Sutillam chayqa qawakun Iglesia Ortodoxa Oriental nisqa religionpi, paykunam yupaychayninkupi retratokunata servichikunku” (The Encyclopedia of Religion). ¿Yanapawanchikmanchu chay retratokuna? Manamá, Diosmanta willakuq Isaiasmi nirqa: “¿Pimantaq rikchachinkichik Tayta Diostaqa? ¿Imaman rikchakuqtataq rurawaqchik paytaqa?”, nispa (Isaias 40:18).

Qaway kay textokunata: Isaias 44:13-19; Hechos 10:25, 26; 17:29; 2 Corintios 5:7.

CHEQAP KAQ:

Diosqa manam munanchu taytacha-mamachata servichikuspa yupaychananchiktaqa.

¿PANTAY YACHACHIKUYTACHU ICHA CHEQAP KAQTACHU AKLLANKI?

Hinaptinqa, ¿imatam kaykunamanta yachachwan? Iglesiakunapa kayna pantay yachachisqankunaqa, manam Bibliapa hawkayachikuq yachachisqankunawanqa tupachisqa kanmanchu (2 Pedro 1:16).

Chaynaqa kallpanchaykikum yachachisusqaykikunapi yuyaymanaspa Bibliapa cheqap yachachisqankunawan tupachinaykipaq (Juan 17:17). Chaynapim Bibliapa kayna nisqanta qawanki: “Yachankichikmi cheqap kaqmanta, chay cheqapmi libreyachisunkichik” (Juan 8:32).

[9 kaq paginapi reqsikusqanchikmanta]

Pictorial Archive (Near Eastern History) Est.