Qanchis yanapakuykuna Bibliata leespa allinta entiendenapaq

“Bibliaqa ñawpaqmantaraqmi ima libromantapas aswan rantikusqa. Kunanpas sapa watam chaynalla kachkan.” (TIME REVISTA)

“Wakillanpim Bibliataqa leeni, ichaqa llumpay qellapakunapaqmi.” (KEITH, SUTIYOQ RUNA)

¡LLAKIKUNAPAQMI! Yaqa llapallan runakunapa Biblian kaptinpas, manam yanapachikunkuchu. Chayna kaptinpas, wakin runakunam ichaqa leespanku allintapuni yanapachikunku. Nancy sutiyoq warmim nin: “Kimsa chunka pichqayoq watam llumpay llakikusqaymanta yanapakuyta maskarqani, tutapaypi sapa kuti Diospa Palabranta leesqaymi chaynataq chay leesqaykunapi yuyaymanasqaymi imamantapas anchata yanapawarqa”, nispa.

Bibliata mana haykapipas leespaykiqa, ¿tapukurqankichu imanasqam kay libroqa hukkunata yanapasqanta? Sapa kuti leespaykiqa, ¿imaynatam allintapuni entiendewaq? Qatiqninpi consejokunam allinta yanapasunkiman.

1 Yanapasunaykita piensaspa leey

▪ Wakin runakunam Bibliata leenku sumaq qellqasqa kasqanrayku, wakinñataq allin consejokunata tarinankurayku, wakinkunañataqmi leenku obligasqa kasqankurayku. Ichaqa Diospa Palabrantaqa leena, Diosmanta yachayta munaspanchikmi hinaspa vidanchikpi imayna yanapawananchikta piensaspam.

Chaynata leenapaqmi Bibliapas rikchanachispan kaynata niwanchik: “Uyarichkaspan mana kasukuq runaqa espejopi uyan qawakuqmanmi rikchakun. Imaynam kasqanta qawakuruspanmi pasakuspanñataq chaylla qonqarun imaynam kasqanta. Ichaqa librawaqninchik  alli-allin leypi yuyaymanaqqa hinaspa mana qonqaspa kasukuqqa mayna kusisqam kanqa tukuy ima rurasqanpi”, nispa (Santiago 1:23-25).

Kay textopi nisqan runaqa, espejopi qawakuspanpas manam imatapas rurarqachu allichakunanpaq. ¿Imanasqa? Yaqapaschá utqayllaman qawakuykusqanrayku otaq manapas munarqachu allichakuyta. Arí, ñoqanchiktapas manam yanapawasunchu qellapakuspa Bibliata leeptinchikqa otaq mana kasukuyta munaspa leeptinchikqa. Ichaqa atencionwan Bibliata leespaykiqa chaynataq piensasqaykipiwan rurasqaykipi yanapasunaykita munaspaykiqa kusisqam tarikunki.

2 Allin Bibliata servichikuy

▪ Castellano rimaypiqa achka Bibliakunam kan. Mayqanpas allinmi kanman, ichaqa allinta entiendeyta munaspaykiqa, allinmi kanman imayna qellqasqa kasqanta qawayniki. Wakinqa manam entiendekunchu sasa entiendenapaq otaq ñawpaq rimaykunawan qellqasqa kasqankurayku (Hechos 4:13). Wakinñataq costumbrenkuta qatikuspanku Diospa yachachisqanta qewirunku. Wakinñataqmi Jehová Diospa sutinta qechuruspanku rantinpi churarunku “Dios” otaq “Señor” niq rimaykunata. Chayraykum facil entiendenapaq hinaspa allin kaq Bibliata maskananchik.

Arí, enteron pachapi millonnintin runakunam ninku Traducción del Nuevo Mundo nisqa Biblia allin kasqanta. * Bulgaria nacionmanta yuyaqña runam Jehová Diospa testigonkunapa huñunakuyninpi chaskirqa chayna Bibliata hinaspam nirqa: “Achka watañam Bibliata leeni, ichaqa manam haykapipas leerqanichu kayna Bibliataqa, kayqa facil entiendenapaqmi hinaspa sonqoymanpas chayanmi”, nispa.

3 Diosta mañakuy

▪ Bibliata leenaykipaq sapa kuti Diosta mañakuspaykiqa, allintam entiendenki. Salmos librota qellqaqmi chaynata rurarqa, paymi Jehová Diosta kaynata mañakurqa: “Admirakuypaq yachachikuynikikunata entiendenaypaqyá [ñawillayta] kichaykuway”, nispa (Salmo 119:18). Diosta mañakuspaqa, agradecekuchwantaqmi Palabranta qowasqanchikmanta, Biblia kaptinmi Diosta reqsiyta atinchik (Salmo 119:62).

Ichaqa, ¿imaynatam yachachwan mañakusqanchikta Dios uyarisqanta? Chaypaq qawasun Uruguay nacionpi iskay sipaskunamanta. Iskayninkum Daniel 2:44 nisqanta mana entienderqakuchu, chaymi Diosta mañakurqaku pipas yanapaykunanpaq. ¿Imam pasarqa? Manaraq Bibliata wichqachkaptinkum, Jehová Diospa testigonkuna punkunkuta takaykamurqaku, hinaspam chay textotapuni leespanku yachachirqaku Diospa Gobiernon runakunapa gobiernonta chinkachinanta. * Chay sipaskunaqa cuentatam qokurqaku mañakusqankuta Dios uyarisqanta.

4 Sapa punchaw leey

▪ Achka runakunam Bibliata leenku sasachakuypi tarikuspallanku. Qawasun, 2001 watapa 11 septiembre killapi terroristakuna hatun wasikunata bombakunawan tuñirachiptinkum, librokunata ruraspanku rantikuqkunapa patronnin nirqa: “Runakunam qonqayllamanta Biblia rantiyta qallaykurqaku”, nispa. Ichaqa Diosmi niwanchik Palabranta sapa punchaw leenapaq: “Kay libropi yachachikuyman hinallam rimanki, kayman hinallataqmi tuta-punchawpas yuyaymananki chaynapi kay libropi qellqasqanman hina ruranaykipaq hinaspa kasukunaykipaq. Hinaptinqa tukuy rurasqaykipas allinmi kanqa”, nispa (Josuey 1:8).

 ¿Imanasqataq sapa kuti Diospa Palabranta leenanchik? Kaypi piensasun. Huk runam corazonninwan onqospan cuidakun imakuna mikunamanta. ¿Yaqachu allinninpaq kanman, nanaptillan imakuna mikunanmanta cuidakuynin? Manamá. Sapa punchawmi cuidakunan allin kananpaqqa. Chaynallataqmi ‘tukuy rurasqanchik allin kananpaqqa’, sapa punchawmi Bibliata leenanchik.

5 Leespa huk yanapakuykunata servichikuy

▪ Bibliapa libronkunata qatinasllanpi leey allin kaptinpas, kanmi huk yanapakuykunapas astawan leeyta munanaykipaq:

Leey Bibliapi huk kaqnin runamanta. Diospa mayqan serviqninmantapas Bibliapa huk kaqnin libronpi otaq capitulonpi maskaspa leey. Wakinmi paykuna kanman:

• Josey: Genesis 37-50.

• Rut: Rut 1-3.

• Jesus: Mateo 1-28; Marcos 1-16; Lucas 1-24; Juan 1-21. *

Leey sapa yachachikuymanta. Huk yachachikuyllamanta textokunata maskaspa leey. Estudiawaqmi oracionmanta Biblia yachachisqanta, leeytaq Bibliapi rikuriq mañakuykunatapas. *

Leey uyarinapaq hina. Bibliaqa ninmi kayna leeyqa achkanpi yanapakusqanta (Apocalipsis 1:3). Tanteachwantaqmi Familiapi leenapaqpas; huk kaqninmi huk-iskay parrafota leenman otaq Bibliapi huk kaqnin runa hina kaspan leenman. Wakinpiñataqmi uyarichwan grabasqa Diospa Palabranta. Huk warmim willakun: “Leeyta qellakusqayraykum, tantearurqani grabasqa Diospa Palabranta uyarinaypaq. Kunanmi ichaqa Bibliata uyariy gustawan ima novelamantapas”, nispa.

6 Tiempochakuspa yuyaymanay

▪ Afanasqa kasqanchikraykum sasachakunchik Bibliapa nisqankunapi hawka yuyaymananapaq. Ichaqa, kay rurayqa allinpunim Biblia leesqanchik yanapawananchikpaqqa. Imaynam vacakunapaqpas mikusqankuta kutipayninku allinpuni, chaynataqmi leespa yuyaymanaypas. ¿Imaynatam yuyaymanachwan Bibliata leespanchik? Piensayllanchikpim yuyarina leesqanchikkunata hinaspam kay tapukuykunata rurakuchwan: “¿Imatam Jehová Diosmanta yachachiwan? ¿Imaynatam vidaypi yanapawanan? ¿Imaynatam servichikuyman hukkunata yanapanaypaq?”, nispa.

Kayna yuyaymanayqa allinpunim Diospa yachachikuynin sonqonchikman chayananpaq. Chaynata leespam salmista hina ancha kusisqa kasun, nirqam: “¡Maynatam yachachikuynikita kuyallani! Chaypim tukuy punchaw yuyaymanani”, nispa (Salmo 119:97). ¿Imanasqataq payqa munarqa Diospa Palabran leeyta? Yuyaymanasqanmi yanaparqa Diospa Palabranpi yachasqanta kuyananpaq.

7 Entiendeqwan yanapachikuy

▪ Diosqa yachanmi kikillanchikmanta Palabranta entiendeyqa sasa kasqanta. Bibliapas ninmi wakin yachachikuyninkuna “sasa entiendena” kasqanta (2 Pedro 3:16). ¿Maypim yanapakuyta tarichwan? Hechos librom willakun Etiopia nacionpi kamachikuq runa Bibliata leespan mana entiendesqanmanta. Chaymi Diosqa huk kaqnin serviqninta kamachirqa entiendechinanpaq. Hinaptinmi chay runaqa ‘kusisqallaña pasakurqa’ (Hechos 8:26-39).

Qampas Bibliapa yachachisqanta entiendeyta munaspaqa, Biblia entiendeqwan yanapachikuy. ¿Imaynata? Jehová Diospa testigonkunawan rimay wasikipi gratislla yachachisunaykipaq otaq qellqay kay revistata ruramuqkunaman (4 paginapim tarinki direccionkunata). Munanikum kay 7 yanapakuykuna Bibliata leeptiki astawan yanapasunaykita.

[Willakuykuna]