Revistanchikta leeqkunam tapukunku

¿Imaynatam Diosqa qawan cigarro pitasqayta?

▪ Wakin runakunaqa yaqapaschá chaynata tapukunku, cigarromanta Bibliapi imatapas mana nisqanrayku. Ichaqa, ¿atichwanchu yachayta chaykunamanta Dios ima piensasqanta? Arí, atichwanmi.

Diosqa niwanchikmi: “Bibliapi llapallan qellqasqa kaqkunaqa Diospa Espiritunpa qosqanmi”, nispa (2 Timoteo 3:16). Bibliaqa niwanchikmi vidanchikta imayna cuidanamanta. Puntata qawasunchik runakunapa vidanta tabaco imayna yanqachasqanmanta, hinaspa qawasuntaq Bibliapa nisqan imayna yanapawananchikmanta.

Cigarro pitaqkunaqa onqoytam tarinku hinaspapas chaywanmi achka wañunku. Estados Unidospim 5 runakunamanta 1 runa wañun cigarro pitasqanwan. Chay nacionpi “tragowan, drogawan, wañuchinakuywan, carrowan hinaspa sida onqoywan” wañunankumantaqa astawanmi wañunku tabacowan, chaynatam nin Instituto Nacional sobre el Abuso de Drogas.

Cigarro pitaqkunaqa mana pitaqkunatapas onqochinmi. Pipas manam ninmanchu cigarropa qosnin mana imanawasqanchiktaqa. Mana pitaqkunaqa cigarropa qosniyninwanmi astawan onqonku cancerwan hinaspa sonqomanta onqoykunawanpas. Kay watakunallapim doctorkunaqa tarirunku cigarropa qosnillanwan astawan onqosqankuta. Kaywanqa nichkanchikmi qosniyninwan lloqsimuqkuna qitya hina quedasqanmanta, chaymi atirunman pachata, alfombrata hinaspa imatapas, chayqa unaytam chinkan qosniynin manaña kaptinpas. Chaykunaqa veneno hinam, astawanraqmi estudiaq warmakunapaqqa.

Cigarro pitayqa viciom. Cigarro pitaqqa chayllamanñam qokurun. Yachaysapa runakunam ninku cigarropi tarikuq nicotina nisqa, sasa saqey atina kasqanmanta.

¿Bibliapa ima nisqankunataq chayta atipanapaq yanapawachwan? Qawasun wakin yanapakuykunata.

Diosqa munan vidanchik cuidananchiktam. Israel nacionman kamachikuyta qospanmi Diosqa nirqa yupaychaqninkuna, hukpa vidanta cuidanankumanta (Deuteronomio 5:17). Israelitakunaqa wasinkupa qatanpi muyuriqnintam taksa perqata hatarichinanku karqa. Wasikunapa qatanqa pampam karqa, chaypim israelitakunaqa sapa punchaw imatapas ruraqku. Chay perqa hatarichisqankum runakunata harkarqa wichiykuspa mana wañunankupaq (Deuteronomio 22:8). Uywankutapas cuidanankum karqa pitapas mana wañurachinanpaq (Exodo 21:28, 29). Cigarro pitaqqa manam kasukunchu Bibliapa kayna kamachisqantaqa, yachachkaspanmi kikinpa vidanta hinaspa hukkunapa vidantapas mana allinpi tarichin.

Diosqa munanmi paytawan runamasinchikta kuyananchikta. Jesucristoqa nirqam qatiqninkuna kay iskay kamachikuykunata kasukunankupaq: Diosnikitam kuyanki tukuy sonqoykiwan, tukuy vidaykiwan, tukuy yuyaynikiwan hinaspa tukuy kallpaykiwan chaynataq kuyankim runamasikitapas kikikita hina (Marcos 12:28-31). Vidanchikqa Diospa regalo qowasqanchikmi, cigarrota pitaspaqa chay regalo qowasqanchiktam mana chaninchachkanchikchu nitaq Diostapas kuyachkanchikchu (Hechos 17:26-28). Cigarro pitayman qokuruqkunaqa hukkunatam mana allinpi tarichin, runamasiytaqa kuyanim nispankupas rurasqankuqa manam qawachinchu chayna kasqantaqa.

Jehová Diosqa manam munanchu kay viciokunaman wichiykunanchiktaqa. Dios serviqkunatam Bibliaqa kaynata nin: ‘Aychapi hinaspa espiritupi tukuy mana allinmantayá chuyanchakuychik’, nispa (2 Corintios 7:1). Cigarroqa aychanchiktam qachachan. Diosta kasukuy munaqkunapas sasachakunkum chayta saqenankupaqqa, ichaqa Diospa yanapakuyninwanqa saqeytam atiwaq.