Betania llaqtam karqa Jerusalenmanta 3 kilometro puriypi (Juan 11:18). Chaypim huk llaki pasarqa Jesusta wañuchinankupaq semanakunaraq faltachkaptin. Jesucristopa amistadnin Lazarom onqoruspan wañururqa.

Chayna pasasqanmanta Jesus yacharuspanmi discipulonkunaman nirqa Lazaro puñusqanmanta chaynataq rikcharichiq rinanpaq kasqanmantapas (Juan 11:11). Chayna nisqanta mana entiendeptinkum nirqa: “Lazaroqa wañukunñam”, nispa (Juan 11:14).

Betaniamanmi Jesusqa chayarurqa Lazaro pampasqankumanta 4 punchaw pasaytaña, hinaspam Lazaropa panin Martata maskarqa consuelananpaq. Hinaptinmi Marta nirqa: “Señorlláy, qam kaypi kaptikiqa turillayqa manachá wañunmanchu karqa”, nispa (Juan 11:17, 21). Chaymi Jesusñataq nirqa: “Ñoqam kani kawsarichiqpas chaynataq kawsay qokuqpas”, nispa (Juan 11:25).

Nisqan cierto kasqanta qawachinanpaqmi Lazaropa sepulturan lawman rispan kallpawan qayarqa: “¡Lazaro, lloqsimuy!”, nispa (Juan 11:43). Hinaptinmi Lazaro lloqsiramuptin chaypi kaq runakuna llumpayta admirakurqaku.

Chaymanta ñawpaqtapas Jesusqa kawsarichirqañam iskay runakunata. Hukninmi karqa Jairopa warmi churin. Chay kutipipas Jesusqa nirqam chay warmacha puñusqanmanta (Lucas 8:52).

Iskay kutipim Jesusqa nirqa wañusqaña kaptinkupas puñuchkankum nispa, chayna tupachisqanqa allinmi karqa. ¿Imanasqa? Miskita puñuspaqa manam ima nanaytapas nitaq imawan ñakarisqanchiktapas musyakunchikchu. (Eclesiastes 9:5, qaway  “Wañuyqa miski puñuy hinallam” niq recuadrota.) Jesuspa discipulonkunaqa allintam entienderqaku wañusqakuna imayna tarikusqankumanta. “Diosman sonqo wañuqkunapaqqa [. . .] wañuyninkuqa puñuy hinallam karqa, sepulturañataq samanankupaq wasi hina”. (Encyclopedia of Religion and Ethics.) *

 Wañusqakuna mana ñakarisqankumanta yachasqanchikqa maynatam kusichiwanchik, paykunaqa sepulturapi puñuchkanmankupas hinam kachkanku.

Llapallanchikmi munanchik miski puñuyta ichaqa, ¿munachwanchu wiñaypaq puñuruyta? Imaynam Lazaropas hinaspa Jairopa churinpas wañuymanta kawsarimurqaku, ¿kanmanchu ima suyakuypas lliw wañusqakunapaq?

Diosta serviq Job sutiyoq runam wañuypa patanpi tarikuspan kaynata tapukurqa: ‘Sichum huk runa wañukuspanqa ¿yaqachum kawsarimunqa?’, nispa (Job 14:14).

Chaymantapas Tukuy atiyniyoq Jehova Diosmanta rimaspanmi Jobqa tapukusqanmanta nirqa: “Qayakamuptikim ñoqañataq contestamusqayki. Hinaptinqa unanchawasqaykimantachá sientiypaqña-sientiwanki”, nispa (Job 14:15). ¿Yanqapaqchu chayna suyakuyninqa karqa? Diosman sonqo Jobqa manam iskayrayarqachu Jehova Dios kawsarichinanpaq kasqanmantaqa.

Jehova Diosmi Jesusman atiyta qoykun wañuyta chinkachinanpaq chaytam Jesusqa qawachirqa wañuqkunata kawsarichispan. Jesusmantam Biblia nin: ‘Wañuypa llaven’ hapiq kasqanmanta (Apocalipsis 1:18, Chuya Qellqa revisión 2012). Chay atiywanmi sepulturakunapa punkunta kichachkaq hina wañusqakunata kawsarichinqa, imaynam Lazarotapas kawsarichisqanman hina.

Bibliaqa achka kutikamam willan kawsariy kananmanta. Kaypi reparasun huk angelmi Diosmanta willakuq Danielman nirqa: ‘Daniel, qamqa punchawnikikuna tukunankama kawsaspayá samakuyña, qamqa puchukay punchawkuna [pasaruptinmi] hatarimunki tupaqnikita chaskinaykipaq’, nispa (Daniel 12:13). Kawsarimuypi mana creeq saduceokunamanmi Jesuspas nirqa: “Qamkunaqa pantaypim kachkankichik, Bibliapa nisqantapas chaynataq Diospa atiynintapas mana reqsisqaykichikrayku”, nispa (Mateo 22:23, 29). Apostol Pabloñataqmi nirqa: ‘Confianzawanmi suyachkani allin runakunatawan mana allin runakunata hamuq punchawpi Dios kawsarichimunanta’, nispa (Hechos 24:15).

¿Haykapitaq allin runakunapas chaynataq mana allin runakunapas kawsarimunqaku? Danielman angelpa nisqanman hinam ‘puchukay punchawkuna pasaruptinñam’ kawsarimunqaku. Martaqa kawsarimuypi creespanmi turin Lazaro kawsarimunanmanta nirqa: ‘Tukupay punchawpim kawsarimunqa’, nispa (Juan 11:24).

Martapa nisqan ‘tukupay punchawtam’ Biblia tupachin Jesuspa gobiernasqan tiempowan. Apostol Pablom nirqa: “Cristoqa munaychakunanpunim llapallan enemigonkunata Dios saruchinankama. Qepallaña chinkachinapaq kaq enemigoqa wañuymi”, nispa (1 Corintios 15:25, 26). Chayraykum munanchik Diospa Gobiernon chayamunanta chaynataq munaynin kay Pachapi cumplikunantapas. *

Jobpa nisqanman hinam Diosqa munan wañusqakuna kawsarimunankuta. Chay punchaw chayamuptinqa wañuyqa qalaypaq chinkachisqam kanqa, manañam pipas wañunqañachu.