Jobmantam biblia nin ‘mana huchallikuspa Diospa munasqanman hina allin ruwaq’ kasqanmanta (Job 1:1). Lotmantapas ninmi “allin ruwaq” runa kasqanta (2 Pedro 2:8). Davidmantapas ninmi Diospa ‘munasqanman hina kawsaq’ kasqanmanta (1 Reyes 14:8). ¿Allinchu kanman paykunamanta astawan yachayninchik? Arí, yachasunmi pantasqankumanta hinaspa ima ruwasqankumanta, chaynallataq pantaq runa kaptinchik Diosta imaynata kusichinamantapas.

Jobmi achka sasachakuykunapi tarikurqa, chaymi payqa piensarqa kasukuptinpas utaq mana kasukuptinpas Dios ñakarichisqanta, ichaqa manam chaynachu karqa (Job 9:20-22). Chaymantapas Jobqa nirqam allin ruwaq runa kasqanta. Chaymi amistadninkunaqa uyarispanku niqku Diosmantapas aswan allin ruwaq kasqanpaq hapikusqanta (Job 32:1, 2; 35:1, 2).

Lotqa iskayrayarqam Diosta kasukuypi. Sodoma hinaspa Gomorra llaqtapi yachaq runakunaqa  llumpay millakuypaq huchakunatam ruwaqku, chaymi Lotqa llumpayta amirurqa chayna ruwasqankuta qawaspan. Hinaspam “sunqunpi llakikurqa” (2 Pedro 2:8). Diosmi willarqa chay llaqtapi runakunata chinkachinanmanta nirqataqmi ayllunwan kuska salvakuyta munaptinqa chay llaqtamanta lluqsinankupaq. Allinmi kanman karqa chaylla kasukuyninku ichaqa manamá chaynachu karqa, Lotqa wasin saqiytam mana munarqachu. Diospa kachamusqan angelkunañam Lotta hinaspa ayllunta makinmanta hapiykuspan chay llaqtamanta hurqurqaku (Genesis 19:15, 16).

Davidqa casada warmita llumpayta munaruspanmi paywan huchapakururqa. Tantearurqataqmi chay warmipa qusanta wañuchinanpaq, chaynapi huchallikusqankuta mana yachananpaq (2 Samuel 11). Bibliam willawanchik Davidpa chay ruwasqan Diosta mana agradasqanmanta (2 Samuel 11:27).

Kay kimsa runakunaqa pantarurqakum, wakinqa hatun huchakunatam ruwarurqaku. Qatiqninpim ichaqa qawasun sunqumanta Diosta kasukuyta munasqankumanta. Wanakusqankuta qawachispankum Diospa munasqanman hina kawsakunankupaq tanteakururqaku, chaywanqa Diostam kusichirqaku. Chayraykum bibliaqa nin pantaq runakuna kaptinkupas iñiyniyuq kasqankumanta.

Llapallanchikmi pantanchik (Romanos 3:23). Ichaqa huchanchikmanta wanakuytaqa atichwanmi, atichwantaqmi Dioswan allinyanakuytapas.

¿Imatam ruwarqaku Job, Lot hinaspa David huchankumanta Dios pampachananpaq? Jobqa llampu sunqu kasqanraykum rimasqanmanta  wanakurqa hinaspapas Dioswan rimaruspanmi piensasqanta tikrarqa (Job 42:6). Lotqa Dios hinam qawarqa Sodoma hinaspa Gomorra llaqtapi mana allin ruwasqankutaqa. Ichaqa iskayrayarqam wasin saqinanmanta. Iskayrayaspanpas kasukurqam. Tukuy imankunatapas saqiruspanmi lluptikurqa. Diospa kamachisqanta David mana kasukuspanpas wanakusqanwan hinaspa Dios pampachananpaq mañakusqanwanmi llampu sunquyuq kasqanta qawachirqa (Salmo 51).

Diosqa yachanmi pantaq runa kasqanchikta. Chaymi chay runakuna pantaptinkupas hinalla paykunata kuyarqa. Diosqa mana ruway atisqanchiktaqa manam mañawanchikmanchu ‘payqa yachanmi imamanta ruwasqa kasqanchikta yuyanmi allpamanta ruwasqa kasqanchikta’ (Salmo 103:14). Chaynaqa, ¿ima ruwananchiktataq munan?

Diostaqa kusichichwanmi Davidpa nisqanpi yuyaymanaspa nirqam: ‘Churilláy Salomon, kay taytaykipa Diosniyta riqsikuspaykiyá serviy tukuy sunquykiwan’, nispa (1 Cronicas 28:9). ¿Ima ninantaq tukuy sunquwan Diosta serviyqa? Chayqa tukuy sunquwan Diosta kuyaymi hinaspa lliw kamachisqanta riqsispa kasukuymi. Manam mana pantaq kaychu. Tukuy sunquwan Diosta serviqqa munanmi paypa yachachisqanman hina kawsakuyta hinaspa corregisqa kaytapas. Chayna runa kasqankuwanmi Diosqa Jobta nirqa ‘mana huchallikuq’ runa kasqanta, Lottañataq ‘allin ruwaq’ runa kasqanta, Davidtañataq nirqa Diospa ‘munasqanman hina kawsaq runa kasqanta’. Pantaq runakuna kaspankupas Diostam kusichirqaku.

Mana allinkuna umanchikman chayamuptin, imatapas llutanpi rimaruspanchik utaq imatapas mana allinta ruwasqanchikta musyakuruspanchikqa, ama chayllaqa hukmanyarusunchu. Kaypi rimamusqanchik Diospa serviqninkuna imayna kasqankupi yuyaymanasun. Payqa yachanmi pantaqllaña kasqanchikta. Ichaqa munanmi tukuy sunquwan kuyaspa kasukunanchikta. Chaynata ruwaptinchikqa anchatachá kusichisunchik.