Testigo kananpaq bautizasqa iñiqmasiyku manaña huñunakuptinqa utaq Diosmanta willakunanpaq manaña lluqsiptinqa kallpanchanikum Diosta hinalla yupaychananpaq.

 Bautizasqa testigo mana allinta ruwaruptinqa, Diospa llaqtanmantam qarqusqa kanku. Puntatam yanapanku huchanmanta wanakunanpaq, hinalla huchallikuptinqa Diospa llaqtanmantam qarqusqa kanku, chayna qarqusqa kaptinkuqa testigokunaqa manañam paywanqa rimanakunikuñachu. Bibliam nin: “Qamkuna ukupi kaq chay mana allin runataqa wischuychikyá”, nispa (1 Corintios 5:13).

 ¿Imataq pasan Diospa llaqtanmanta qarqusqa runapa warmin hinaspa churinkuna Jehova Diospa testigon hinalla kaptinkuqa? Diosta yupaychayninkumanta manaña rimaspankupas, ayllu kasqankuraykum hina rimanakunku. Warminwan churinkunaqa hinallam paywan kuska kawsakunmanku.

 Diospa llaqtanmanta qarqusqakunaqa atinmankum huñunakuyniykupi kayta, munaspankuqa iñiqkunapi punta apaqkunapaq yanapaynintam chaskinmanku. Chaynata ruwasqankuqa Jehova Diosman kutinankupaqmi yanapan. Huchallikusqankumanta tukuy sunqunkuwan wanakuspaqa kaqmantam atinmanku Jehova Diospa testigon kayta.