Mulhouse llaqtapin nacerani, chayqa Francia nacionpin kashan. Millay barriopin wiñarani, yuyashanin wawa kashaqtiy familiakuna juj familiakunawan maqanakusqankuta. Barrioypiqa qharikunan warmikunata despreciaqku. Niwaqkun: “Warmikunaqa cocinapin kananku, qosankuta wawankutan atiendenanku”, nispa.

Erqellaraq kashaqtiyqa sasan kausayniy karan, chunka watayoq kashaqtiymi papay wañupuran alcohol vicionwan. Pisqa wata qhepatataq kuraq wayqey wañuchikuran. Chaymantapas rikuranin juj familiapi maqanakuspa wañuchinakuqta, chaymi traumawaran. Wakin parienteykunan yachachiwaranku cuchillota, pistolata utilizanaypaq. Imaymana problemakunatan ruwaq kani, cuerpoypipas tatuajetan ruwachikurani.

Sapa p’unchay 10 otaq 15 cervezata tomaq kani 16 wataypi kashaspa, drogatapas consumiyta qallarirani. Chaykunata paganaypaqtaq chatarrata vendeq kani suwakuq ima kani. 17 wataypiqa ñan carcelpiña karani, llapanpiqa 18 kutitan apawaranku suwakusqaymanta maqanakusqaymanta ima.

Aswan mana allinkunataraqmi ruwaq kani 20 watapi kashaspayqa. Sapa p’unchaymi marihuanamanta ruwasqa 20 cigarrota fumaq kani, heroinatapas juj drogakunatapas consumiq kani. Chayraykun askha kutipi wañuy patapi tarikurani. Drogatan vendeq kani armasqallataqmi puriqpas kani. Juj kutinmi juj runata balearani, aswanpas balan correanpa fierronman chayaran. 24 wataypi kashaqtiymi mamay wañupuran, chaymi aswan millaymanraq tukupurani. Runakunaqa manchakuspan ayqerikuwaqku. Yaqa sapa semana tukuytan comisariaman apawaqku otaq hospitalman k’iriykunata sirawanankupaq.

Casarakuranin 28 wataypi. Esposaytaqa insultaqmi kani maqaq kani ni tiempotapas paywan pasaqchu kani. Suwakamusqay sortijakunata qosqay suficiente kananpaq piensaq kani. Ichaqa chayllamanmi payqa Jehová Diospa testigonkunawan Biblia estudiayta qallariran. Estudiota qallarispan manaña fumaranchu. Manañan chaskiwaranchu suwasqa qolqeta, llapan sortijakunatataq kutichipuwaran. Noqaqa prohibiranin Biblia estudiananta. Nishuta phiñakuspan uyanpi cigarroq q’osñinta phukuyuq kani, jinaspapas barriontinpin p’enqayman churaq kani.

 Juj tutan nishu machasqa kaspa tiyasqayku wasita ruphaykachirani. Esposaymi noqatawan juch’uy ususiytawan salvawaranku. Yuyayniyman kutispan mal sientekurani ruwasqaymanta. Piensaranin Diosqa mana jayk’aqpas perdonawananpaq. Yuyariranin juj sacerdoteq nisqanta, paymi niran: “Millay runakunaqa infiernomanmi rinqaku”, nispa. Psiquiatra doctorniypas niwaranmi: “Qanpaqqa manañan remedio kanchu, manan pipas yanapasunkimanñachu”, nispa.

Chay qhepamanmi suegroykunaq wasinman ripurayku. Testigokunan esposayta visitaq jamuranku, chaypin tapurani Dios perdonawanmanchus juchayta chayta. 1 Corintios 6:9-11 textota leepuwaranku. Chaypin willashan Diospa juchachasqan ruwaykunamanta, ichaqa nillantaqmi: “Chay jinan qankunapas wakinniykichisqa karankichis”, nispa. Chay nisqanmi piensachiwaran cambiay atisqayta. Leepuwarallankutaqmi 1 Juan 4:8 textota, chaypin yacharani Dios munakuwasqanta. Chaymi anchata animawaran, jinan semanapi iskay kutita Bibliamanta yachachiwanankupaq valekurani. Juñunakuykunamanpas riytan qallarirani, tukuy tiempotaq Diosmanta mañakuq kani.

Juj killallapin decidikurani drogakunata alcoholtapas saqepunaypaq. Ichaqa cuerpoymi mañakuwashallaran. Mana consumipusqayraykun onqorani, umay nishuta nanaq, calambre jap’iwaq, wijsay nanawaq, tutakunapipas pesadilla jap’iwaq. Ichaqa repararanin Jehová Diospa yanapayninta, pay kallpata qowashasqanta. Apóstol Pablo jinan sientekuq kani, paymi Dios yanapasqanmanta niran: “Tukuy imapaqmi kallpa qowaqniyqa kallpata qowan”, nispa (Filipenses 4:13, NM). Tiempowanqa manañan fumaraniñachu (2 Corintios 7:1).

Biblian yanapawaran vidayta controlanaypaq jinallataq familiaypi allinta kausanaykupaq. Esposaytan sumaqta tratayta qallarirani, “gracias”, “ama jina kaspa” nispa. Chaymantapas ususiywanmi imaymanata ruwaq kani. Juj wata Bibliata estudiashaspaymi esposaypa ejemplonta qatikurani, Jehová Diospa testigon kapunaypaqmi decidikurani, jinan bautizakapurani.

Biblian yanapawaran vidayta cambianaypaq. Mana testigo familiaykunapas niwankun: “Vidaykita mana cambiawaqchu karan chayqa, wañupuwaqñachá karan”, nispa.

Familiapi kausayniykuqa cambiapuranmi qosa jina, tayta jina ruwanaykunata Bibliaq nisqanman jina cumpliqtiy (Efesios 5:25; 6:4). Kunanqa kuskan imatapas ruwapuyku. Manañan munanichu esposay cocinallapi kashananta, aswanpas payqa askha tiempotan predican, chaymi kusisqa yanapani. Paypas allintan yanapawan iñiq t’aqapi umalli kaspa ruwanaykunata allinta cumplinaypaq.

Diospa munakuynin khuyapayakuynin iman yanapawaran vidayta cambianaypaq. Kunanqa allintan yachani Bibliaq yanapayninwanqa pi runapas vidanta cambiay atisqanta, kusisqa kausay atisqantapas. Chaymi sonqomanta yanapayta munani lliu mana remedioyoq jina kaqkunata, paykunapas noqa jina Jehová Diosta reqsinankupaq. Biblian yanapawaran lliu runata respetowan tratanaypaq, qhariña warmiña kaqtinkupas. Ichaqa yanapawallarantaqmi kikiyta respetakunaypaq.