¿IMA NINMI BIBLIA?
¿Imaynan Dios?
¿Imayna rikch’ayniyoqmi Dios?
“Diosqa Espiritun” (Juan 4:24)
¿IMA NINMI BIBLIA?
Diosqa espiritun (2 Corintios 3:17). Chayraykun payqa ñoqanchismanta aswan atiyniyoq. 1 Timoteo 1:17 texton willan Diosqa ‘wiñay-wiñay Rey, mana wañuq, mana rikuna’ kasqanta, paytaqa manapunin rikusunmanchu. Chayraykun Bibliaqa nin: “Manan pipas Diostaqa hayk’aqpas rikurqanchu”, nispa (1 Juan 4:12).
Kamaqninchisqa ancha atiyniyoqpunin. Imayna rikch’ayniyoq kasqantaqa manan yuyaykuytapas atisunmanchu. Isaías 40:18 texton nin: “¿Imawantaq Diosta rikch’anachinkichis?”, nispa. Tukuy rikusqanchispas ancha munay kashaspa manan imapaschu paywan tupanachiqtinchisqa kanman (Isaías 40:22, 26).
Ichaqa kanmi Diosta rikuqkuna paywan uya-uyapura rimaqkunapas, paykunapas espiritullataqmi kanku hanaq pachapitaqmi kawsankupas (1 Reyes 22:21; Hebreos 1:7). Paykunaqa angelkunan, Jesusmi nirqan: “Hanaq pachapi angelninkunaqa hanaq pachapi kaq Yayaypa uyanta qhawashankupunin”, nispa (Mateo 18:10, Mosoq Rimanakuy).
¿Tukuy ladopichu Dios kashan?
“Qankunaqa kay hinata mañakuychis: Yayayku hanaq pachapi kaq” (Mateo 6:9)
¿IMA NINMI BIBLIA?
Diosqa manan tukuy ladopichu kashan imaynan wayraqa tukuy ladopi kashan hinaqa. Mateo 6:9; 18:10 textokunapin Jesús nirqan Diosqa huk Tayta kasqanta maypi tiyasqanpas ‘hanaq pacha’ kasqanta (1 Reyes 8:43).
Kay pachapi pisillaña kawsananpaq kashaqtinmi Jesús nirqan: ‘Kay pachata saqespan Yayaman ripushani’, nispa (Juan 16:28). Wañusqan qhepamanqa espíritu cuerpopin kawsarimpurqan, hinan hanaq pachaman ripuspa ‘Diospa qayllanman’ haykurqan (Hebreos 9:24).
Chayta yachaspan reparanchis Diosman asuykuy atisqanchista payta reqsiy atisqanchistapas (Santiago 4:8). Hinaspapas Diosmanta cheqaqta yachasqanchismi yanapawanchis yanqa kaqkunata mana yupaychanapaq. 1 Juan 5:21 textopin niwanchis: “Wawallaykuna, idolokunataqa amapuni yupaychaychischu”, nispa.
¿Imaynapin Diospa rikch’ayninman hina ruwasqa kashanchis?
“Diosqa runata kamarqan, Diosman rikch’akuqtan paytaqa kamarqan, qharita warmitawanmi kamarqan” (Génesis 1:27)
¿IMA NINMI BIBLIA?
Diosqa munakuqmi, chaninmi, yachayniyoqmi, runakunapas chaykunapiqa pay hina kaytan atinchis. Chayraykun Biblia niwanchis: “Diospa munasqa wawankunan kankichis, chayrayku payman rikch’akuq kaychis. Munanakuypi kawsaychis”, nispa (Efesios 5:1, 2).
Hinaspapas Diosqa kamawarqanchismi kikillanchismanta decidinapaq, chaymi atinchis allinkaqta ruwanapaq akllakuyta, atillanchistaqmi runamasinchis munakuytapas (1 Corintios 13:4-7). Hinaspapas yuyayniyoqtan kamawarqanchis imaymanakunata ruwanapaq, kusikunchistaqmi kay pachapi imaymana kamasqakunata qhawaspapas. Chaymantapas runakunaqa yachaytan munanchis Diosmanta munayninmantapas, chhaynatan Diosqa kamawarqanchis (Mateo 5:3).
¿Imaynatan yanapawanchis Bibliamanta cheqaqta yachay? Sichus Diosta astawan reqsisun pay hinataq kasun chayqa, astawanmi munasun paypa munasqanman hina kawsayta. Chayta ruwayqa kusichiwasunmi thakpitaqmi kawsasun (Isaías 48:17, 18). Hinaspapas, sichus Diosta reqsiyta munaspapuni payman asuykusunchis chayqa, wiñay kawsayman apaq ñantan tarisunchis (Juan 6:44; 17:3).
Astawan yachanaykipaq
BIBLIAMANTA TAPUYKUNA
¿Juj kallpallachu Dios?
Bibliapin nin Dios tukuy imaynata kallpanwan kamasqanta, ichaqa ¿llakikunchu pay noqanchismanta?
BIBLIAMANTA TAPUYKUNA
¿Tukuy ladopichu Dios kashan?
¿Yachachinchu Biblia Dios tukuy ladopi kashasqanmanta? ¿Imaraykun nisunman Jehová Diosqa juj lugarllapin tiyan, ichaqa sapankanchista riqsiwanchis nispa?
BIBLIAMANTA TAPUYKUNA
¿Atisunmanchu Diosta rikuyta?
Bibliapin nishan: “Diostaqa manan pi runapas jayk’aqpas rikurqanchu”, nispa. Ichaqa nishallantaqmi Moiseswan juj israelitakunapiwan “Israelpa Diosninta rikurqanku” nispa. ¿Imaraykun Bibliapi chhaynata nin?
