Kay chunka watakunapin phisqa chunka millón hinataraq aeropuertopi autoridadkuna qechurqanku avionpi mana apana kaqkunata. 2011 watallapin qechurqanku 1200 pistolakunata. Chayta apaqkunan yaqa llapanku nirqanku saqemuyta qonqamusqankuta.

Askha alumnokunan colegionkuman mana ripunkuchu, chayraykun autoridadkuna alumnokunaq uniformenman huk chip nisqata churashanku, chayqa huk huch’uy maquinacha hinan. Chay maquinachan tayta-mamankuman willan escuelankuman wawanku chayasqanta, iskay chunka minuto tardeta chayasqankutapas.

Iglesia Luterana nisqaqa manañan chay nacionta representaq religionñachu. Chay nacionpi kaq Parlamenton decidirqan leyninkuta cambianankupaq, gobiernoq ruwayninkunamanpas amaña nishutachu religión chapukunanpaq.

Chay nacionmanta llank’aqkunan kuskan mas llank’ay tukusqanku qhepaman kutichinku llank’anankumanta telefonopi waqyamusqankuman, Internetpi celularpipas mensaje apachimusqankuman. Wakintaqmi ninku waqyamuqtinku hina mana kutichiyqa mana respetoyaq kasqanta.

Kay 20 watakunapin India nacionpi mikhuy yapakurqan yaqa kuskan más ñawpa watakunamantaqa, qanchis chunka hukniyoq waranqa millón kilokunan arrozwan trigowan waqaychasqa kashan. Chaywanpas manan aypachikunchu mikhuykunata. Autoridadkunan mana allintachu rakinku, yanqan usuchinku chayraykun chay waqaychasqanku mikhuymanta yaqa kuskallanta runakunaman qonku.