Jesusmi willaranña Diospa gobiernon kamachikuyta qallarinanpaq imakuna pasananmanta, pichus chaypi kamachikuq kananmantapas.

Biblian willan Jesucristo janaq pachapi kamachiyta qallariqtinqa Satanasta supayninkunatawan kay pachaman wijch’uykamusqanmanta. Chayraykun 1914 watamantapacha Saqraqa supayninkunantin imaymana llakikuykunata kay pachapi rijurichishanku (Apocalipsis 12:7, 9).

Kay mundopiqa mana allinkunallan kashan, Jesusmi ichaqa imaymanata ruwashan runakunata yanapananpaq. Chaymi paypa umallisqan pachantinpi runakunaman Bibliamanta yachachimushanchis, chay runakunataq Diospa munayninman jina kausashanku (Isaías 2:2-4). Diospa munayninman jinan llank’anankutapas qhawarinku, familiankuwanpas allintan kausanku, imankuchus kasqallanwanmi kusisqa kausanku. Bibliata estudiaspan allin runaman tukupunku, chhaynapitaq preparasqa kashanku Diospa gobiernonpi kausanankupaq.

Jesusña kamachikushan janaq pachapi chaypas, kay pachapiqa runakunallan kamachikushan. Diosmi ichaqa Jesusta niran: “¡Auqaykikunata kamachiy!”, nispa (Salmos 110:2). Pisillamantan Jesusqa Diosta mana kasukuq runakunata tukuchipunqa, chaymantapas Dios serviy munaq runakunaq llakikuynintan tukuchillanqataq.

Jesús kamachikuyta qallarispaqa kaykunatan ruwanqa:

• Pantasqa religionkunatan chinkachipunqa. Pantasqa religionkunatan Bibliapi tupanachin qhelli kausaypi puriq warmiwan, chaymi chinkachipunqa. Chhaynapiqa manañan pipas runakunaman pantasqata Diosmanta yachachinqañachu, chhaynapin allinta kausanqaku. Qonqayllan tukukuyqa chayamunqa (Apocalipsis 17:15, 16).

• Runaq kamachikuynintan tukuchipunqa. Diospa gobiernonmi runa gobiernokunata tukuchinqa (Apocalipsis 19:15, 17, 18).

• Millay runakunatan tukuchipunqa. ¿Iman pasanqa Diosta mana kasukuq runakunawan? Kay pachamantan “wijch’usqa kanqaku” (Proverbios 2:22).

• Satanastan supayninkunantinta chinkachipunqa. Satanasqa supayninkunantin manaña ‘nacionkunata pantachinqakuñachu’ (Apocalipsis 20:3, 10).

¿Iman pasanqa Diospa gobiernonpi kausayta munaq runakunawan?

Jesucristoqa janaq pachamantan kamachikamunqa, mana mayqen gobiernoq ruwasqantan ruwanqa. Payqa 144.000 kay pachamanta ajllasqakunawanmi kamachikamunqa (Apocalipsis 5:9, 10; 14:1, 3). Jehová Diospa munaynintan kay pachapi ruwanqa. ¿Imatan Diospa gobiernon ruwanqa runakunarayku?

• Onqoytan wañuytawan tukuchinqa. “Manan mayqellanpas: ‘Onqosqan kani’, ninqachu”, “manan wañuypas kanqañachu” (Isaías 33:24; Apocalipsis 21:4).

• Thaj kausaymi kanqa. “[Wawaykikunan] ancha allintapuni kausanqaku”. “Sapanka runan tiyaykunqa uvas yuran k’uchupipas higos sach’an k’uchupipas, manataqmi pipas manchachiqninku kanqañachu” (Isaías 54:13; Miqueas 4:4).

• Llank’ayqa kusikunapaqmi kanqa. “Ajllakusqaykunaqa llank’asqankuq rurusqantan kusisqa mijunqaku. Manan yanqachu llank’anqaku” (Isaías 65:22, 23).

• Kay pachanchisqa limpion kapunqa. “Ch’inneqpas ch’aki pampapas kusikunqan, wajmanta t’ikarispan q’ochukunqa” (Isaías 35:1).

• Runakunatan yachachikunqa wiñay kausayta aypanankupaq. “Paykuna wiñay kausayta chaskinankupaqqa qan sapallan cheqaq Diostan reqsinanku, reqsinallankutaqmi kachamusqayki Jesucristotapas” (Juan 17:3).

Diosqa munanmi chay sumaq kausayman aypanaykita (Isaías 48:18). Qatimuq yachachikuypin yachanki imatan ruwawaq chay kausayman aypanaykipaq chaymanta.