¿Imaynapin sinagogakuna rijuriran?

SINAGOGA simiqa “asamblea” otaq “juñunakuy” ninantan nin. Sinagokunapin ñaupaq tiempopi judiokunaqa juñunakuqku Diosta adoranankupaq, yachachisqa kanankupaqwan. Hebreo simi qelqakunapiqa manan willanchu sinagoga wasikunamanta. Griego simi qelqakunapin ichaqa willan, Jesuspa tiemponpaqqa ñan chay wasikunaqa karanña.

Yaqa llapa estudioso runakunan ninku judiokuna Babiloniapi kashaqtinku sinagogakunata ruwasqankuta. Juj libron nin: “Chay judiokunaqqa manañan templonku karanchu, llakisqataqmi kasharanku karu llaqtapi kasqankumanta, chaymi kallpachanakunankupaq mayninpi sabadonkuna juñunakuspa Bibliata leeranku”, nispa. Yaqachus Babiloniamanta lloqsinpusqanku qhepamanpas juñunakushallaranku Bibliata leenankupaq Diosmanta mañakunankupaqpas, chaymi tiyasqanku llaqtakunapi sinagogakunata ruwaranku.

Jesuspa tiemponpiqa sinagogakunapin judiokunaqa Diosta adoraqku juj juñunakuykunatapas ruwaqku. Chay tiempopiqa askha nacionkunapin maypichus judiokuna kaqku chaypi sinagogakunaqa kallarantaq. Universidad Hebrea de Jerusalén nisqamanta profesor Lee Levine nin: “Sinagogakunapin estudiaqku, mijunakunata fiestakunapi mijuqku, juiciokunata ruwaqku, qolqeta churaqku politicamantapas rimaqku. Ichaqa astawanqa Diosta adoranankupaqmi chaypiqa juñukuqku”, nispa. Chaymi Jesuspas rillaqpuni sinagogakunaman (Mar. 1:21; 6:2; Luc. 4:16). Chaypin Diosmanta yachachiqku kallpachanakuqku ima. Cristianokunaq tiemponpipas apóstol Pabloqa rillaqpunin sinagogakunaman chaypi predicamunanpaq. Diosmanta yachayta munaqkunan sinagogakunamanqa riqku chaymi apóstol Pabloqa may llaqtaman chayaspapas sinagogaman riq chaypi predicamunanpaq (Hech. 17:1, 2; 18:4).