Felisa: España nacionmantan kani; familiayqa católica religionmanta karan. Wakinmi cura karanku wakintaq iglesiapi yanapakuranku. Mamaypa primonmi cura karan católica escuelapitaq profesor karan. Pay wañupuqtinmi papa Juan Pablo II “santota” jina declarapuran. Noqaykuqa pusaqmi kayku, wajchataqmi karayku. Papaymi juj fabricapi llank’aran mamaytaq chajrapi.

12 wataypi kashaqtiymi Españapi guerra qallariran. Chay guerra tukuytan autoridadkuna papayta carcelpi wisq’aranku politicapi chaqrukusqanrayku. Mamaypaqqa sasan karan llapaykuta uyway. Chaymi kinsa sullk’aykunata Bilbao llaqtapi conventoman apachiran. Chhaynapi Araceli, Lauri, Ramoni ñañaykuna allin mijusqa kanankupaq.

Araceli: Conventoman jaykupushaspaqa 14 wataypin kasharani, Lauri 12 watanpi, Ramonitaq 10 watanpi. Chaypin monjakuna limpiezapi llank’achiwaranku. Iskay wata qhepamanmi Zaragoza conventoman kachawaranku, chaypiqa kuraq runakunatan cuidaqku. Cocinata limpiaspan llank’arayku, chaymi sapa p’unchay sayk’usqallaña tukuq kayku. Anchatan familiaykuta extrañaq kayku.

Felisa: Ñañaykuna chay conventoman ripusqanku qhepamanmi, mamaywan sacerdote tioywan chay coventoman kachawaranku. Chaytaqa ruwaranku juj waynamanta t’aqawayta  munaspan. Ichaqa manan sientekuranichu, noqaqa Diostan munakurani chaymi conventoman kusisqa rirani. Sapa p’unchaymi misaman riq kani, juj primoy jinan misionero kayta munarani.

Ichaqa manan piensasqay jinachu karan, chaymi mana allinchu sientekurani. Monjakunaqa manan kallpachawaqkuchu juj nacionpi Diosta servinaypaq. Chaymi juj watamanta wasiyman kutipurani sacerdote tioyta cuidanaypaq. Tioywan kuskan tardenkunata rosariota jap’iykuspa rezaq kayku. Kusikuqmi kani iglesiapi t’ikakunata allichaspa, santokunata virgen Mariata ima p’achachispa.

Araceli: Monja kanaypaqmi ñaupaqta Zaragoza conventopi especial promesata ruwarani. Tiempoq pasasqanman jinataq monjakuna ñañaykunamanta t’aqawaranku. Lauri ñanaytan Valencia llaqtapi kaq conventoman kacharanku, Ramoni ñañayta Zaragoza llaqtaman, noqatataq Madrid llaqtaman. Chaypin jujmanta promesata ruwarani monja kanaypaq. Madrid conventopiqa askha estudiantekunan alojakuqku, chaypin kuraq runakunapas tiyaqku, chaymi askha llank’ana kaq. Noqaqa conventopi kaq hospitalpin yanapakurani.

Noqaqa sonqoypin nisharani: ‘Monja kanaypaqqa Bibliatachá estudiasaq’, nispa. Ichaqa manan chhaynachu karan. Manan Diosmantapas Jesusmantapas yachachiwaqkuchu nitaq Bibliatapas estudiaqchu kayku. Aswanmi iglesiapi santokunamanta yachachiwaqku, Mariata adoraq kayku, latín simitataq chikanta yachachiwaranku. Ichaqa llank’aymanmi astawanqa qatiwaqku.

Chaykunawanmi llakikurani. Niqmi kani: ‘Jujkunaq qhapaqyananpaq llank’ashanaymantaqa, aswanchá familiayta yanapanaypaq llank’ayman’, nispa. Chay qhepamanmi monjakunaq jefanta nirani: “Lloqsipuytan munani”, nispa. Chaymi juj cuartopi wisq’aruwaran amaña chaypi piensashanaypaq.

Chay qhepamanpas ripuytapunin munarani. Chayta reparaspa yapamanta iskay kutita wisq’awaranku. Chay qhepamanmi niwaranku: “Ripuyta munaspaqa kayta qelqay: ‘Ripuytan munani Satanasta servinaypaq, manan Diostaqa serviyta munanichu’”, nispa. Anchatan admirakurani chay niwasqankumanta. ¡Maypin chayta qelqayman! Sacerdoteman confesakuq tumpan tukuy ruwawasqankuta willakurani. Paymi obispomanta permisota mañakuspa Zaragoza conventoman kutichiwaran. Iskay killa qhepamanmi wasiyman  kutipurani. Chay qhepallamanmi Lauri, Ramoni ñañaykunapas conventomanta lloqsipuranku.

Felisa: Casarakusqay qhepamanmi Cantabria llaqtaman ripurayku. Sapa semanan misaman riq kani. Juj kutinmi misapi sacerdote sinchi phiñasqa La verdad que lleva a vida eterna nisqa librota orqomuspa niwaranku: “Pipas kay jina librota jap’ishan chayqa noqaman qowachun, mana chayqa q’opaman wijch’uchun”, nispa.

Manan chay libroy karanchu, ichaqa leeytan munarani. Iskay p’unchay qhepallamanmi iskay warmikuna punkuyta takaykamuranku, paykunaqa Jehová Diospa testigonkunan karanku. Chaypin chay munasqay librota qowaranku, jinan chay ch’isinta leeyta qallarirani. Chay Testigokunan kutimuspa estudiota munachiwaranku. Chaymantapachan Bibliata estudiarani.

Noqaqa munakuranin Diosta, chaymi paymanta yachachiwaqtinku astawan munakurani. Jinan 1973 watapi bautizakurani. Llapa runamanmi Diosmanta willayta munarani. Familiaymanpas willaranin, ichaqa manan uyariwaqkuchu, Araceli sullk’aymi astawanqa mana creeqchu willasqayta.

Araceli: Conventopi millayta tratawasqankuraykun religionniywan phiñasqa kasharani. Chaywanpas domingokunatan misaman riq kani, sapa p’unchaymi rosariota jap’ispa rezaqpas kani. Ichaqa Bibliamantan yachayta munarani, chaymi Diostamanta mañakuq kani. Chay qhepamanmi ñañay Felisa Bibliapi yachasqanmanta willawaran, ichaqa manan creeranichu. Payqa sinchi kusisqan willawaran, chaymi sonqoypi nirani: “Kay ñañayqa locayarapunmá”, nispa.

Qhepamanmi Madrid llaqtata llank’aq ripurani, chaypitaqmi casarakapurani. Iglesiaman riq runakunaqa manan Jesuspa yachachisqanman jinachu kausaqku. Chayta qhawarispan religionniypaq phiñakuspa manaña misaman nitaq confesakuqpas ripuranichu. Manañan santokunapi creepuranichu nitaq infiernopipas. Chaymi  wasiypi kaq santokunata wijch’upurani. Ichaqa Diostan niq kani: “Reqsiytan munayki, ¡yanapaway!”, nispa. Testigokunaqa sapa kutillanmi wasiyta jamuqku, ichaqa pakakuqmi kani. Llapa religionkunatan mana allinpaq qhawarirani.

Lauri ñañayqa Francia nacionpin tiyaran, Ramoni ñañaytaq Españapi. Paykunan 1980 watapi jina Testigokunawan Bibliata estudiayta qallariranku. Chaymi nirani: “Ñañay Felisa jinan engañachikushanku”, nispa. Juj vecinaymi Angelines sutiyoq Testigollataq karan, paywanmi qhepaman amigantin kapurayku. Bibliamanta yachay munasqayta reparaspan qosanwan sapa kutilla estudiota munachiwaqku, ichaqa niqmi kani: “Manan religionmantaqa imatapas yachayta munanichu”, nispa. Ichaqa juj kutinmi nirani: “Bibliamanta yachachiwaychis, ichaqa Nácar-Colunga Bibliaywan”, nispa.

Felisa: noqaqa 1973 watapin bautizakurani, Santander llaqtapiqa 70 Testigokuna jinallan karayku. Chay llaqtapin askhan juch’uy llaqtakuna kan. Chaymi chay llaqtakunapi runakunaman predicanaykupaq omnibuspi viajaq kayku, qhepamantaq juch’uy carrokunapi.

Askha runakunamanñan Bibliamanta yachachini. Kunankamaqa 11 runakunañan bautizakunku, yaqa llapankutaqmi católico karanku. Paykunaqa noqa jinan pisi-pisimanta repararanku creesqanku pantasqa kasqanta, chaymi pacienciawan yanaparani. Diospa santo espiritun, Bibliapi cheqaq yachachikuypiwanmi llapa runatapas yanapanman cambianankupaq (Heb. 4:12). Qosayqa polician karan, paypas 1979 watapin bautizakapuran. Mamaypas manaraq wañupushaspan Bibliata estudiayta qallariran.

Araceli: Testigokunawan chayllaraq estudiashaspaqa manan confianzawanchu rimaykuq kani. Ichaqa qhepamanmi repararani yachachisqankuman jina kausasqankuta. Pisi-pisimantan Jehová Diosta munakurani, Bibliapipas astawan confiarani. Chaymi sonqoy kausariran. Chayta reparaspan vecinoykuna niwaranku: “Araceli, estudiashallay Bibliata”, nispa.

Jehová Diostan niq kani: “Gracias sapa kutilla maskhawasqaykimanta. Gracias Bibliapi cheqaq yachayta yachachiwasqaykimanta”, nispa. Felisa ñañaytapas perdontan mañakapurani sonqonta k’irisqaymanta. Chaymantapachan Bibliamanta sumaqta parlariyku. Noqaqa 1989 watapin bautizakurani 61 wataypi.

Felisa: 91 wataypiñan kashani, qosaypas wañukapunñan. Manañan ñaupaqpi jinañachu Diosta servini. Ichaqa kallpachakunin Bibliata sapa p’unchay leenaypaq, atisqayman jinataq juñunakuykunaman rini predicaqpas lloqsini.

Araceli: Sapa kutillanmi sacerdotekunawanpas monjakunawanpas Bibliamanta parlariyku. Askhan chaskikunku revistakunata librokunatapas. Juj kutinmi juj sacerdotewan parlariqtiy niwaran: “Cheqaqmi chay nisqaykiqa. Ichaqa machuñan kani. ¿Maytan kunan riyman? ¿Ima ninkumanmi iglesiaman jamuqkuna familiaykunapas?”, nispa. Chaymi nirani: “¿Ima ninqataq Diosri?”, nispa. Jinan mana ima niyta atispa llakisqa qheparan. Yaqachus jina manchakuran religionnin saqepuyta.

Juj kutinmi qosay niwaran: “Jakuchu juñunakuyniykiman”, nispa. Maytan chay p’unchay kusikurani. Chaypaqqa 80 watanpin kasharan, chaymantapachan mana faltakuranchu. Bibliata estudiasqan qhepamanmi predicayta qallariran. Manan kunankama qonqanichu kuska predicasqaykuta. Payqa bautizakunanpaq iskay killallaña faltashaqtinmi wañupuran.

Felisa: Diosta chayllaraq servishaqtiyqa kinsantin sullk’aykunan contraypi karanku. Ichaqa qhepamanmi paykunapas Testigo kapuranku. Anchatapunin kusikuni chaymanta. Kunanqa juj jinallan kausapuyku. Jehová Diosninchismanta simin qelqamantawanmi sumaqta parlariyku, juj jinallataqmi Diosta adorayku. *