Costa Rica nacionpi Puerto Limón llaqtapin wiñarani. Tayta-mamayqa pusaq wawayoqmi karanku, noqaqa qanchiskaqmi kani. Papaymi ichaqa pusaq watayoq kashaqtiy wañupuran, chaymi mamallay uywawaranku.

Béisbol * pujllayqa wawa kasqaymantapachan gustawaqpuni. Adolescente kashaspan juj equipoman jaykurani. 20 wataypin allin pujllaqkunata maskhaq runa invitawaran Nicaragua nacionman, profesional equipopi pujllanaypaq. Ichaqa chay tiempopiqa mamitaymi onqosqa kasharan, chaymi mana ripuyta atiranichu. Tiempowanqa jujñataqmi invitawaran Costa Rica nacionpi béisbol equipoman jaykunaypaq. Chaypiqa mana profesional equipokunamanta ajllasqa pujllaqkunan kasharanku. Kay kutipiqa aceptaranin. Equipo nacionalmanmi pertenecerani 1949 watamanta 1952 watakama, askha partidokunapitaqmi pujllarani Cuba, México, Nicaragua nacionkunapi. Defensapin karani, kusatataqmi pujllaq kani. 17 partidokunapin seguidota mana fallaspa pujllarani. Gustawaqmi sutiywan barra ruwasqankuta uyariy.

Qhepamanqa mana allin ñanpin purirani. Karanmi parlaqmasiy, ichaqa juj warmikunawanmi kallaranitaq. Alcoholtan nishuta ujaq kani, chaymi juj p’unchaypas mana yuyakuranichu imaynatachus wasiyman chayasqayta. Chaymantapas dominó nisqatan pujllarani qolqeta apostaspa, jinallataq loteriapi pujllanaypaq boletota rantiq kani.

Chay tiempopin mamitay Jehová Diospa testigonman tukupuran. Payqa Bibliamantan rimapayawallaqpuni, ichaqa manan kasuranichu, umayqa pujllayllapiñan kasharan. Entrenaqtiyqa manan yarqaypas chayawaqchu, mijuna horasña karan chaypas. Béisbol pujllaymi nishutapuni gustawaq.

29 wataypi kashaqtiymi pujllashaspa nishuta k’irikurani. Allinyapuraniña chaypas, lloqsipuranin chay profesional equipomanta. Ichaqa chaywanpas juj mosoq equipotan entrenaq kani wasiy cercapi.

1957 watapin rirani Jehová Diospa testigonkunaq asambleanman, chaymi apakuran beisbolta pujllasqay estadiopi. Chaypi tiyashaspan rikurani Testigokunaq allin comportakusqankuta, manan partidokuna pujllakusqanpi jinachu estadiopi desorden karan. Chay asambleapi rikusqaymantapachan munarani Biblia estudiayta, juñunakuyninkuman riytapas.

Nishu admirasqan kasharani Bibliapi yachasqaywan. Ejemplopaq, Jesusmi willaran tukukuy p’unchaykunapiqa discipulonkuna Diospa gobiernonmanta allin noticiakunata willanankuta (Mateo 24:14). Chaymantapas yacharanin cheqaq cristianokunaqa mana qolqellapaq predicasqankuta. Jesusmi niran: “Gratisllan chaskirankichis, gratisllataqmi qonkichispas”, nispa (Mateo 10:8).

Bibliata estudiasqayman jinan yachachikuyninta comparaq kani Testigokunaq kausasqanwan. Gustawaranmi Diospa gobiernonmanta pachantinpi predicanankupaq kallpachakusqanku. Repararanin Jesuspa yachachisqanman jina, qoykukuq sonqo kasqankuta. Chaymi Marcos 10:21 textopi “qatikamuway” nispa Jesuspa nisqanta leespay, Jehová Diospa testigonman tukupuyta munarani.

Ichaqa manan facilchu karan wakinta decidiy. Ejemplopaq, askha watakunañan sapa semana apostarani loteriapi suertepaq numeroywan. Bibliapin ichaqa yacharani Diosqa “allin suertepaq” ruwaykunata, sinchita munapayaqkunatapas mana allinpaq qhawarisqanta (Isaías 65:11; Colosenses 3:5). Chaymi decidikurani amaña pujllanaypaq. Loteriapi pujllanaypaq boletokunata manaña rantisqay semanapin suertepaq numeroy ganasqa. Chaymi runakuna asipayawaranku chay semanapi mana pujllasqaymanta, animawarankutaq pujllashanallaypaq; ichaqa manañan jayk’aqpas apostaranichu.

Jehová Diospa testigonkunaq asambleanpi bautizakusqay p’unchaymi ‘mosoq runaman tukupusqay’ pruebaman churasqa karan (Efesios 4:24). Ch’isinta alojakusqay hotelman kutipuqtiymi ñaupaq parlaqmasiy cuartoy punkupi suyawashasqa. Niwaranmi: “Sammy, jakuyá juj rato sumaqta pasarisun”, nispa. Kaq raton “¡manan!” nirani. Willaranitaq kunanqa Bibliaq kamachisqanman jina limpiota kausasqayta (1 Corintios 6:18). Paytaq “¡imá!” niwaran. Paymanqa manan imapas qokuranchu qhelli juchapi puriymanta Bibliaq nisqanqa, chaymi munaranpuni jujmanta kutinakunaykuta. Ichaqa cuartoyman jaykuruspan punkuta allinta wisq’akamurani. Kunanqa kusisqan niyman 1958 watapi Testigoman tukupusqaymantapacha, vidayta cambiasqayman jinapuni kausasqayta.

Sichus Bibliaq nisqanman jina kausasqaymanta llapan bendicionkunata willayman chayqa, juj librotachá qelqanay kanman. Kunanqa cheqaq amigokunayoqmi kani, vidaypitaq cheqaq kusikuyta tarini.

Mayninpiqa pujllaniraqmi beisbolta, ichaqa qhawariranin imakuna aswan importante kasqanta. Beisbolta pujllaspaqa qolqeyoqmi karani, allin reqsisqataq kanpas, ichaqa chaykunaqa manan wiñaypaqchu. Wiñaypaq kaqqa Dioswan cristiano hermanoykunawan ima amistadnintin kasqaykun. Biblian nin: “Kay pacha kausayqa pasashanmi, jinallataq millay munapayayninkunapas, Diospa munayninta ruwaqmi ichaqa wiñaypaq kanqa”, nispa (1 Juan 2:17). Kunanqa Jehová Diosta serviy llaqtanpi kay iman anchata gustawan. Chaymi noqapaqqa imamantapas aswan importante.